Boboloja 18 - Nouveau Testament en Ngombe 1961

¹ Yana asia ngando jimina, nanɛ okina obwɛnji otongo akahule oho Diko. Iyo adaka na kpaci enɛnɛ, na ngondo esusu ehoa na bolailai boekumu ende.

² Abekoa na kɔpi epipo bo, Ekwi! Babilo, ngando yena enɛnɛ ekwi; Edi oko ekokolo ebajabolo, Esika emiembo misusu Mibe, Esika embulu basusu babosɔtɔ na bamaneene.

³ Mojɔ bo makota masusu malangoi na vino elisɔngi linde; Bakumu bangondo ba’ngi na nde bɔɔli, Na bato babwasa bangondo bahɛjɛ likonja libu linɛnɛ a mojɔ mobikɔmɛli binde binɛnɛ bibosambolu.

⁴ Naka koko kɔpi etongo ekahule Diko na ekabale bo, Bato bambi, imanani, mokinani yo, osaka cingamani na nde a jibe jinde, osaka katanani na nde a madingoa mande.

⁵ Mojɔ bo jibe jinde jidi o mono monɛnɛ mua momeaka a Diko, Na Njambe alɛi mojɔ mojibe jinde.

⁶ Sɔmbejani ai yo oko na mwɛngi mopaka yo mɛnɛ, Na nɛngejani mokindo monde a mojɔ mobikɔmɛli binde; Lumejani kɔpɔ enusa yo na bato batongo bihole bibae, a mojɔ monde mɛnɛ.

⁷ O asakumejaka yo, na adaka yo na bikɔmɛli bibosambolu, Oko boa mopani yo molɔbɔ na bio oko na mwɛngi momina. Mojɔ bo abalaka a molema monde bo, Mbi nadi a ngɛndɛ ekumu, Naditi nongo mwali-obogwa, nitada nongo na mokwea.

⁸ A mojɔ momina, madingoa mande madi bodoa ai yo a busa bomɔci, mogweli, mokwea, na linjale. Na atumbama na mosa, Mojɔ bo Kumu Njambe yona omosambejaka adi mopipo.

⁹ Bakumu bangondo baya bangɛ na nde bɔɔli na bakatana na nde a bikɔmɛli binde bibosambolu, bakanɛ modidi mobotumba bonde, badi bomoyea kɔndɔ.

¹⁰ Badi bo’ma bohali a mojɔ mobɔ bobodi-ngoa bonde. Badi bobala bo, Monɔngɔ! Monɔngɔ! Wɛ ngando enɛnɛnɛ! Wɛ Babilo ngando epipo! Likundu liwɛ limei bundumo.

¹¹ Bato babwasa bangondo bayeaka mbisoli na bamoyeaka kɔndɔ, mojɔ bo bato te bayake somba na bu leka lobwasa,

¹² leka lowɔlɔ, na palata, matai mayumu, na mayaka mayumu, bisenja bibotɛlɛtɛlɛ bikpetu na bikpetu bosɔɔ, soa ekpetu, na mele misusu miyumu, leka longɔlu jimbongo, na leka losusu lua lokɔmɔ na mele na matai, na leka lua loluama na ebende na mboa,

¹³ sinamona, na lihengako, na midikadika, na malasi, na male, na vino, na minɛ, na mitɛkɛ mipele, na ndongo, na ngɔmbɔ, na bata, na punda, na mituka, na mikuku na milema mibato.

¹⁴ Molema mowɛ modaka na posa embuma jikpetu, na jicia wɛ bohali. Leka lowɛ losusu loyumu, na leka lowɛ losusu loekumu lobungi na wɛ, na bato bata-loboloja koko.

¹⁵ Bato baya bakɔ masa na leka lomina, baya badiba likonja linɛnɛ a mojɔ monde, badi bo’ma bohali oko na bio na bolɛbɛ, na bɔ pongono, a mojɔ mobodingoa bonde, na badi bobala bo,

¹⁶ Monɔngɔ! monɔngɔ! ngando yena enɛnɛnɛ! yena elwaka oko bisenja bibotɛlɛtɛlɛ bikpetu na bikpetu bosɔɔ, yena edaka na molilo mowɔlɔ, na matai mayumu, na mayaka mayumu,

¹⁷ Makonja ma manɛnɛ mɛnɛ manami na heure emoɔci pɛ. Bakapitɛni bamasua, na bato bamasua masusu, na bato basusu bamadiba, na bato basusu baya bakɔkɔ elomu ebu a madiba, ba’ma oko bohali.

¹⁸ Banja modidi mobotumba bonde na babekoa bo, Ngando yena ebwani na ngando ye enɛnɛnɛ nda?

¹⁹ Basopa dutu a melo mibu; bayea, balɛbɛ na babekoa bo, Monɔngɔ! monɔngɔ! ngandoye enɛnɛnɛ! Bato basusu baya badaka na masua a madiba-mamukwa badiha likonja linɛnɛ a mojɔ molituna linde. Edikai o mopɔtu na heure emɔci pɛ.

²⁰ Sepani oho Diko a mojɔ mongando emina; Ino basɛnɔke, na babwɛnji-baDiko, na batɔndɔi, sepani koko, Mojɔ bo Njambe alongejai no na amodumbi yo.

²¹ Ngɔngɔ jimina, okina obwɛnji mopipo atomba litai linɛnɛnɛ, alidumba a madiba-mamukwa na abala bo, Babilo, ngando yena enɛnɛnɛ, êdumbama nase na bopipo boa, na etaboloa koko.

²² Bato bata’ka koko doi egongo, na bibumba, na poolo na mindule, a tei ewɛ. Pɛpɛ nongo moto yona okɔkɔ ekina elomu odi boboloa koko a tei ewɛ. Bata’ka koko a tei ewɛ doi libon’nda ndongo.

²³ Eyoi epaka etaya hoja modidi a tei ewɛ. Bata’ka koko a tei ewɛ kɔpi emomi na mwali obolongana, Mojɔ bo bato bawɛ bamasa badaka bakumu bangondo, Na wɛ osela makota masusu na male mawɛ.

²⁴ Makia mabatɔndɔi na mabasɛnɔke maboloi a tei ende, Na makia mabato basusu baya bawama a ngondo.