Boboloja 10 - Nouveau Testament en Ngombe 1961

Obwɛnji Yona odoa na Mokatida

¹ Nanɛ koko obwɛnji otongo akahule oho Diko, obwɛnji ongulu. Eyembi emohuaka, na moyama modaka a molo monde. Boso bondebodaka o modika-busa, na mako mande madaka o makwe mamosa.

² Adaka na mokanda mokɛkɛ bwase a ebɔ ende. Abakea ebota ende ebami a diko dimadiba-mamukwa, na ebota ende ebali a diko dingondo.

³ Abekoa na kɔpi epipo o agbomaka gbɔngɔ. Yana abekoa yo, bɛi sambo bagama oko bogama.

⁴ Yana asia bɛi sambo bogama, mbi nakɔ bo nasɔne; naka ko kɔpi ekahule oho Diko bo, Kanda na bakea embete a mijɔ Mibali bɛi sambo; Pojisɔne oko.

⁵ Na obwɛnji onɛkɛ mbi ami a madiba-mamukwa na a ngondo, angɔjɔ ebɔ ende ebami diko,

⁶ na abɛlɛ bɛli na yona odi na bomɔ oko na bosusu, yona okɔ Diko na leka losusu lua lodi ena, na ngondo pongono, na leka losusu lua lodi ena, na madiba koko, na leka losusu lua lodi ena. Abɛlɛ bɛli na nde bo ehole ebo’mba esii,

⁷ na bo obwɛnji osambo akahuea mondule, mojɔ mobombamake moNjambe mongame a masu mamina, o ajebeja yo batɔndɔi bakɔmɛli bande.

⁸ Kɔpi eka mbi ekahule Diko ebala na mbi koko bo, Kɛ atombe mokanda mokɛkɛ mua modi bwase a ebɔ eobwɛnji yona odi ami a diko di madiba-mamukwa na a diko dingondo.

⁹ Oko boa mbi nakɛ ai obwɛnji, nabala na nde bo apɛni mokanda mokɛkɛ. Yo abala na mbi bo, Tomba mokanda, moyaka. Môda na boyo a sɔpɔ, a monɔkɔ ko bolɛbulɛbu o pɔki.

¹⁰ Natomba mokanda mokɛkɛ a ebɔ eobwɛnji, na namomea oko bomea. Modaka na bolɛbulɛbu bopɔki a monɔkɔ mombi; yana ko amea mbi mokanda, modaka na boyo a sɔpɔ.

¹¹ Na abala na mbi bo, Toma pa koko biseko a mojɔ mobato banɛnɛ, na makota, na kɔpi, na bakumu.