1 Timoteo 4 - Nouveau Testament en Ngombe 1961

Bileho ai Timoteo a Mojɔ Moelomu Ende

¹ Mwembo mobalaka na bohu mɛnɛ bo bakina bato badi bolaboa a ejimeli a masu masuka. Bâhokea miembo Mibokosea, na bokoja bomiembo Mibe,

² cina epoloso ebakoja babokosea. Milema Mibato bamina midi o migo.

³ Balembaka bato bo batalongana, na bakojaka bo bato badi bokia leka. Njambe yo mɛnɛ akɔ leka lomina, bo baya bajimaka na bajebaka mijɔ misoti, baloyaka na sepi na bo’nga.

⁴ Mojɔ bo leka losusu lokɔ Njambe lodi lopele. Pɛpɛ nongo eka emɔci edi na ekia; bobwani bosɔ leka losusu na bosakoa;

⁵ edi eka esɛnɔke a mojɔ moEbaeli eNjambe na bo’nga.

⁶ Okalɛjɛ baninga ngando jimina, ôda mokɔmɛli mopele oMasiya Yesu yona obeki na bikenge biejimeli, na bokoja bopele boma wɛ sɔ.

⁷ Toma lona ko masɔ mangasa maya mapeliti cina. Kɔ bo odae mopingake a ngando jiNjambe.

⁸ Bopingeja bomokuku bodi mojɔ mopele mweka; ngando jiNjambe ko jibɔngejaka a njea jisusu, na jidi na sako a mojɔ momohelo mu, na mua modi ngɔngɔ.

⁹ Mojɔ momina modi soti mɛnɛ, na mobwani na ejimeli esusu.

¹⁰ A mojɔ momina so bokɔkɔ elomu na bosamboaka, cina bo njingo esu edi ai Njambe obomɔ, yona odi Moheleja obato boya, gbo oko baya bajimaka.

¹¹ Leha na koja ngando jimina.

¹² T’okine oko bo moto asɛtojae wɛ mojɔ bo odi oko mwɛnga pɛ. Aneja bato baejimeli ekoaneli epele na ebaeli ewɛ na moda mowɛ, a mojɔ moepaeli, na ejimeli, na bosɛnɔ.

¹³ Adi mbi pɛ bopeta doa, toma da na bingi a bolanga mokanda moNjambe, a botɔndɔ mwako moNjambe, na a bokoja.

¹⁴ T’onamejae oko epeeli yena edi a tei ewɛ; oesɔ na bileho yana abakea basuku baDenga mɔmɔ mabu ai wɛ.

¹⁵ Kɔ ngando jimina na bingi; kɔ na molema mowɛ mosusu, bo bato basusu badi bonɛ bo ohɛkɛ na ngulu.

¹⁶ Toma sɛnjɛlɛ bopele a mojɔ mowɛ mɛnɛ, na a mojɔ mobokoja bowɛ. Okakɔ boa, odi bohela wɛ mɛnɛ, na odi boheleja bato baya bakaka wɛ.