మత్తయి 21 - ମାପୁରୁଦି ସତ୍ ବାକ୍ୟ ପୁନି ନିୟମ୍ଜିରୁସାଲମ୍ତୁ ଜିସୁଦି ଗୌରବ୍ମୟ୍ ଡ଼ୁଗୁନିକା ( ମାର୍କ ୧୧:୧-୧୧ ; ଲୁକ ୧୯:୨୮-୪୦ ; ଜୋହନ ୧୨:୧୨-୧୯ ) 1 ଜିସୁ ନି ୱାନି ସିସୁର୍ ଜିରୁସାଲମ୍ତି ଲାକ୍ତୁରି ଜିତ୍ ଗରନ୍ ମୁସ୍କୁ ମାନି ବେତ୍ପାଗି ନାଟ ଇତାର୍ । ନାସ୍ତିୱାଲେ ଜିସୁ ରିଏର୍ ସିସୁରିଙ୍ଗ୍ ଇୟା ମାଟା ୱେର୍ସି ପୋକ୍ତାନ୍ । 2 “ମି ଆଗ୍ଡ଼ିରି ଆୟା ନାଟ ସାନ୍ଡ୍ରୁ, ଆବେ ଇତି ଦାପ୍ରେନେ ତରାତିମାନି ଉନ୍ଡ୍ରି ଗଦଦିଙ୍ଗ୍ ମାରି ତାନେୱାଲେ ଉନ୍ଡ୍ରି ଗଦପିଲାଦିଙ୍ଗ୍ ସୁଣିଦେର୍; ୱାନିକାଙ୍ଗ୍ କୁତ୍ସ ନା ଲାକ୍ତୁ ଆସ୍ସୋ ରାଦୁ । 3 ମାରି ଏନ୍ ମିଙ୍ଗିଁ ଇନିକା ୱେନ୍ବାତିଙ୍ଗ୍, ଆର୍ତିଙ୍ଗ୍ ଇନିଦେର୍, ୱେନିକାମାନୁ ପ୍ରବୁଙ୍ଗ୍ ଦର୍କାର୍ ମାନାତ୍ । ଆୟାଦାପ୍ରେନେ ୱାନ୍ ୱାନିକାଙ୍ଗ୍ ଡ଼ିସ୍ନାସିନାନ୍ ।” 4 ବାବବାଦିରି ମାଣାନ୍ ରାସ୍ତିମାନି ଇୟା ବାକ୍ୟ ଏଣ୍ତେସ୍ ପୁରା ଆନାତ୍, ଆୟାଉଣ୍ତିଙ୍ଗ୍ ଇକା ଗଟାତାତ୍ । 5 “ସିୟୋନତି ଗାଡ଼୍ତିଙ୍ଗ୍ ଇନ୍ଆଁ, ସୁଡ଼୍ଦୁ, ନି ରାଜା ମି ଲାକ୍ତୁ ୱାଜିନାନ୍; ୱାନ୍ ସାନ୍ତି ମାରି ଗଦପିଲା ନି ଗଦଦି ମୁସ୍କୁ ବାସ୍ତାନ୍ନୋ ୱାଜିନାନ୍ ।” 6 ସିସୁର୍ ସୋର୍ହାର୍ନୋ ଜିସୁ ୱେର୍ତି ଇସାବ୍ତାନ୍ ପାଣି କିତାର୍ । 7 ଗଦ ନି ଗଦପିଲାଦିଙ୍ଗ୍ ତାତାରୋ ୱାନିକା ମୁସ୍କୁ ନିଜେନିଜେଦି ୱାତିଙ୍ଗ୍ ପିଡ଼ିକ୍ତାର୍, ମାରି ଜିସୁ ଆୟା ଗଦ ମୁସ୍କୁ ବାସ୍ତାନ୍ । 8 ମାରି, ଲୋକାୱିଜେରି ମାଣାନ୍ ଏସଲୋକ୍ ଜିସୁ ସୋଲ୍ସିମାନି ରାସ୍ତା ମୁସ୍କୁ ନିଜେ ନିଜେଦି ୱାତିଙ୍ଗ୍ ପାର୍ତାସିତାର୍ ମାରି ଏସଲୋକ୍ ମାରାତାନ୍ କାଜିରି କମେଙ୍ଗ୍ କାତ୍ସି ତାସି ରାସ୍ତାଦୁ ପାର୍ତେଙ୍ଗ୍ ଆସ୍ତାର୍ । 9 ଜିସୁଦି ଆଗ୍ଡ଼ି ନି ୱେନ୍କା ସୋଲ୍ସିମାନି ଲୋକୁ ୱିଜେରେ ନାଣ୍ତ ଆଉଲି ଆଜି ଇନ୍ଡ୍ରେଙ୍ଗ୍ ଆସ୍ତାର୍, ହୋଶାନା, “ଦାଉଦତି ମାରିନ୍, ପ୍ରବୁଦି ଦର୍ତାନ୍ ଏନ୍ ୱାଜିନାନ୍, ମାପୁରୁ ୱାନିଙ୍ଗ୍ ଆସିର୍ବାଦ୍ କିପିନ୍ । ମାପୁରୁଙ୍ଗ୍ ପ୍ରସଂସା ଆପିତ୍ ।” 10 ମାରି, ଏସ୍ତିୱାଲେ ଜିସୁ ଜିରୁସାଲାମ୍ତୁ ଇତାନ୍, ଗାଡ଼୍ୱିଜୁ ଇକାନ୍ ଏନ୍ ଇଜି ପୁରା ବେମ୍ର୍ ଆତାର୍ । ଲୋକୁ ୱେନ୍ବାତାର୍, “ଆୟାକାନ୍ ଏନ୍ ?” ଆଇକାର୍ ଇର୍ହାର୍, 11 “ୱାନ୍ ଆଜିନାନ୍, ଗାଲିଲି ରାଜିଦି ନାଜରିତଦି ବାବବାଦି ଜିସୁ ।” ଲୋକୁ ୱେର୍ତାର୍ । ଜିସୁ ମନ୍ଦିର୍ତୁ ସୋର୍ହାନ୍ ( ମାର୍କ ୧୧:୧୫-୧୯ ; ଲୁକ ୧୯:୪୫-୪୮ ; ଜୋହନ ୨:୧୩-୨୨ ) 12 ଜିସୁ ମନ୍ଦିର୍ ଲୋଇ ଡ଼ୁଗିତାନ୍ନୋ ଆୟା ବାଡିଦୁ କଡ଼ଜି ପର୍ଜି କିଜିମାନି ୱିଜୁ ଲୋକାଙ୍ଗ୍ ଆତେରେ ସୋପ୍ତାନ୍ । ମାରି ଅଦ୍ଲିଙ୍ଗ୍ ମାର୍ନିୱାରି ପାସ୍ରା ମାରି ପାଉରା ପର୍ନିୱାରି ପାସ୍ରା ମାର୍ତା ପୋକ୍ତାନ୍, 13 ମାରି ଜିସୁ ୱାରିଙ୍ଗ୍ ଇର୍ହାନ୍, “ଦର୍ମୁସାସ୍ତ୍ରଦୁ ରାସାତାମାନାତ୍, ନା ମନ୍ଦିର୍ ପାର୍ତନା ଇଲୁ ଇଜି ୱେଙ୍ଗିଁନାତ୍, ମାତର୍ ମିର୍ ତାନିଙ୍ଗ୍ ଡଙ୍ଗାଁରି ଇଲୁ କିତିମାନିଦେର୍ ।” 14 ଜିସୁ ମନ୍ଦିର୍ତୁ ମାନିୱାଲେ କାଣାର୍ ନି କିକୁକାଲ୍କୁ ୱାର୍ତିକାର୍ ୱାନି ଲାକ୍ତୁ ୱାତାର୍ ମାରି ୱାନ୍ ୱାରିଙ୍ଗ୍ ନେଗେନ୍କିତାନ୍ । 15 ପେରି ଜାଜକ ମାରି ଦାର୍ମୁଗୁରୁର୍ ୱାନି କାବାଆନି ପାଣି ୱିଜୁ ମାରି ମନ୍ଦିର୍ ଲୋଇ “ଦାଉଦ ମାରିନ୍ ମାପୁରୁଦି ପ୍ରସଂସା ଆପିତ୍” ଇଜି ନାଣ୍ତ ଆଉଲିଆଜିମାନି କଡ଼ରିଙ୍ଗ୍ ସୁଡ଼ୁଜି ରିସା ଆତାର୍ । 16 ୱାର୍ ଜିସୁଙ୍ଗୁଁ ୱେନ୍ବାତାର୍, “ଇୟାକାର୍ ଇନିକା ଆଜିନାର୍, ମିର୍ ୱେନ୍ଡ୍ରେଙ୍ଗ୍ ଆଟ୍ସିନିଦେର୍ ?” ଜିସୁ ଇର୍ହାନ୍, “ପୁରା ୱେନ୍ଞ୍ଜିନା । ଦର୍ମସାସ୍ତ୍ରଦୁ ଇୟା ମାଟା ଇନିକା ପଡ଼ାଇଦେର୍, ମିର୍ କଡ଼ରିଙ୍ଗ୍ ନି ଇସ୍ରି କଡ଼ର୍ ଟିକ୍ ଇସାବ୍ତାନ୍ ପ୍ରସଂସା କିଦେଙ୍ଗ୍ ସିକିୟା ସିତିମାନିଦେର୍ ?” 17 ଇକା ଇନ୍ଞ୍ଜି ଜିସୁ ୱାରିଙ୍ଗ୍ ଡ଼ିସ୍ତାନ୍ନୋ ଜିରୁସାଲମ୍ତାନ୍ ବେତନିୟାଦୁ ସୋର୍ହାନ୍, ଆବେନୁ ୱାନ୍ ନାଡ଼ା ତେବାତାନ୍ । ଜିସୁ ତଗାମାରାତିଙ୍ଗ୍ ଆନାଦୁରିଆସିତାନ୍ ( ମାର୍କ ୧୧:୧୨-୧୪ ; ୧୬:୨୦ ) 18 ମାର୍ନାଣ୍ଡିଙ୍ଗ୍ ସାଲ୍ଦିନେ ଜିସୁ ଜିରୁସାଲମ୍ତୁ ଡ଼େସିସନିୱାଲେ ବାଙ୍ଗାଁ ସାତାନ୍ । 19 ରାସ୍ତା ପାଡ଼ି ଉନ୍ଡ୍ରି ତଗା ମାରାନ୍ ମାର୍ହାତ୍ । ଜିସୁ ତାନେ ଲାକ୍ତୁ ସୋର୍ହାନ୍ନୋ ଆବେନୁ ଆକୁ ଡ଼ିସ୍ତିଙ୍ଗ୍ ମାରି ଇନିକାବା ତଏତାନ୍ । ୱାନ୍ ମାରାନ୍ତିଙ୍ଗ୍ ଇର୍ହାନ୍, “ନିନ୍ ମାରି ଏସ୍କାଙ୍ଗ୍ବା ପଲ୍ ଆସ୍ଇ ।” ଆୟାଦାପ୍ରେ ତଗା ମାରାନ୍ ୱାର୍ତାସୋର୍ହାତ୍ । 20 ସିସୁର୍ ଆକା ସୁଡ଼ୁଜି କାବାଆତାରୋ ୱେନ୍ବାତାର୍, “ତଗା ମାରାନ୍ ନିସାଦାପ୍ରେ ୱାର୍ତାସୋର୍ହାତ୍ ଏଣ୍ତେସ୍ ?” 21 ଜିସୁ ଇର୍ହାନ୍, “ନାନ୍ ମିଙ୍ଗିଁ ସତ୍ ଇଜିନା, ମନ୍ତୁ ଅଡ଼ପ୍ବା ଅଡ଼୍ବିଏଣ୍ଗା ମିର୍ ଜଦି ପୁରାଦାନ୍ ବିସ୍ବାସ୍ କିନିଦେର୍, ନାନ୍ ଇୟା ତଗା ମାରାନ୍ ଉଣ୍ତିଙ୍ଗ୍ ଆମାକା କିତାମାନା, ମିର୍ ବା ଆକା କିଦେଙ୍ଗ୍ ଆଟ୍ନିଦେର୍ । କେବଲ୍ ନାସ ସିଲେ, ଏମେ ଲୋକୁ ଇୟା ଗରନ୍ତିଙ୍ଗ୍ ନିନ୍ ନିଙ୍ଗ୍ଜି ସାମ୍ଦୁର୍ତୁ ସଲ୍ସି ଆର୍ଆ ଇଜି ଇନାନ୍, ଆକାବା ଆନାତ୍ । 22 ବିସ୍ବାସ୍କିଜ ପାର୍ତାନାଦୁ ଆମାକା ଲସ୍ନିଦେର୍, ଆୟାୱିଜୁ ମିର୍ ପଇନିଦେର୍ ।” ଜିସୁଦି ଅଦିକାର୍ ବିସୟ୍ତାନ୍ ପ୍ରସ୍ନ ( ମାର୍କ ୧୧:୨୭-୩୩ ; ଲୁକ ୨୦:୧-୮ ) 23 ଜିସୁ ମନ୍ଦିର୍ତୁ ଡ଼େସିୱାଜି ଆବେନୁ ସିକିୟା ସିନିୱାଲେ ପେରି ଜାଜକର୍ ନି ଜିହୁଦି ନେତାର୍ ୱାନି ଲାକ୍ତୁ ୱାଜି ୱେନ୍ବାତାର୍, “ନିନ୍ ଆମା ଅଦିକାର୍ତାନ୍ ଇୟାୱିଜୁ ପାଣି କିଜିନି ? ମାରି, ଇୟା ନିଙ୍ଗିଁ ଏନ୍ ଇୟା ଅଦିକାର୍ ସିତାନ୍ ?” 24 ଜିସୁ ୱାରିଙ୍ଗ୍ ଇର୍ହାନ୍, “ନାନ୍ ବା ମିଙ୍ଗିଁ ଉନ୍ଡ୍ରି ମାଟା ୱେନ୍ବାନା, ଆୟା ଉତର୍ ସିଦେଙ୍ଗ୍ ଆଟ୍ତିଙ୍ଗ୍, ନାନ୍ ଆମା ଅଦିକାର୍ତାନ୍ ଇୟାୱିଜୁ ପାଣି କିଜିନା, ଆକା ନାନ୍ ବା ମିଙ୍ଗିଁ ୱେର୍ନା ।” 25 ଡୁବନ୍ ସିନି ଅଦିକାର୍ ଯୋହନ ଏମାଣାନ୍ ପୟ୍ତାମାର୍ହାନ୍ ? ମାପୁରୁମାଣାନ୍ ନୋ ଲୋକାମାଣାନ୍ ? ୱାର୍ ୱାରି ୱାରି ଲୋଇ ୱାର୍ଗିସାଜି ଇନ୍ଡ୍ରେଙ୍ଗ୍ ଆସ୍ତାର୍, “ଇୟା ବିସୟ୍ତାନ୍ ଇନିକା ୱେର୍ନିକା ? ଜଦି ଇନିକା ମାପୁରୁମାଣାନ୍, ଆର୍ତିଙ୍ଗ୍ ଯୋହନତିଙ୍ଗ୍ ଏନ୍ଦା ବିସ୍ବାସ୍ କିଏଜିନିଦେର୍ ଇଜି ୱାନ୍ ମାଙ୍ଗିଁ ୱେନ୍ବାନାନ୍ । 26 ମାତର୍ ଲୋକାମାଣାନ୍ ଇଜି ଇନିକା, ଆର୍ତିଙ୍ଗ୍ ୱିଜୁଲୋକାଙ୍ଗ୍ ମାଡ୍ ତିଲାଜିନିକା, ଇରିଙ୍ଗ୍ ଯୋହନ ଅରେନ୍ ବାବବାଦି ଇଜି ୱିଜେରେ ଲୋକୁ ବିସ୍ବାସ୍କିଜିନାର୍ ।” 27 ଆବେଟ୍ ୱାର୍ ଜିସୁଙ୍ଗୁଁ ଇର୍ହାର୍, “ମାପ୍ ନେସ୍ଏପ୍ ।” ଜିସୁ ୱାରିଙ୍ଗ୍ ଇର୍ହାନ୍, ନାନ୍ ଆମା ଅଦିକାର୍ତାନ୍ ଇୟାୱିଜୁ କିଜିନା, ଆକା ନାନ୍ ବା ମିଙ୍ଗିଁ ଇନ୍ଏ । ରିଏର୍ କଡ଼ରି କାତା 28 “ଇଲେଇ ଇୟା ବିସୟ୍ତାନ୍ ମିର୍ ଇନିକା ଅଡ଼ବିଜିନିଦେର୍ । ଅରେନ୍ ଲୋକାଦି ରିଏର୍ କଡ଼ର୍ ମାର୍ହାର୍ । ଅର୍ଲେନ୍ ୱାନ୍ ପେରି ମାରିନ୍ତିଙ୍ଗ୍ ଇର୍ହାନ୍, ‘ମାରିନ୍, ନେର୍ ମା ଅଙ୍ଗୁର୍ କିଡ଼ିଇଦୁ ସୋଲ୍ସ ପାଣିକିଆ ।’ 29 ୱାନ୍ ଇର୍ହାନ୍, ନା ବଦା ସିଲେତ୍, ମାତର୍ ୱେନ୍କା ମନ୍ତିଙ୍ଗ୍ ଡ଼େପ୍ସି ପାଣି କିଦେଙ୍ଗ୍ ସୋର୍ହାନ୍ । 30 ବୁବାସି ଇସ୍ରି ମାରିସିଙ୍ଗ୍ ବା ଆୟା ପାଣି କିଦେଙ୍ଗ୍ ଇର୍ହାନ୍ । ‘ହୁଁ, ଆଜ୍ଞା,’ ସୋଲ୍ସିନା ଇଜି ଇସ୍ରି ମାରିନ୍ ଇର୍ହାନ୍ । ମାତର୍ ୱାନ୍ ପାଣିଦୁ ମୁଡ଼ୁକେ ସୋଲ୍ଏତାନ୍ । 31 ଇୟା ରିଏର୍ କଡ଼ରି ମାଣାନ୍ ଏନ୍ ତାମେ ବୁବାସିଦି ମାଟା ମାନାତାମାର୍ହାନ୍ ?” ୱାର୍ ଇର୍ହାର୍, “ପେରି ମାରିନ୍ ।” ଜିସୁ ୱାରିଙ୍ଗ୍ ଇର୍ହାନ୍, ନାନ୍ ମିଙ୍ଗିଁ ସତ୍ ଇଜିନା, ସିସ୍ଟୁ ଲୋସ୍ନିକାର୍ ନି ଦାରିପାଣିକିନିକାର୍ ମିମାଣ୍କୁ ଆଗ୍ଡ଼ି ମାପୁରୁଦି ରାଜିଦୁ ସୋନାର୍ । 32 ଡୁବନ୍ ସିନି ଯୋହନ ମି ଲାକ୍ତୁ ୱାଜି ଟିକ୍ ସାରି ତର୍ତାସିତା ମାର୍ହାନ୍, ମାତର୍ ମିର୍ ୱାନିଙ୍ଗ୍ ବିସ୍ବାସ୍ କିଇତିଦେର୍ । ମାତର୍ ସିସ୍ଟୁ ଲୋସ୍ନିକାର୍ ନି ଦାରିପାଣିକିନିକାର୍ ୱାନି ମାଟାଦାନ୍ ବିସ୍ବାସ୍କିତାର୍, ଇକା ସୁଡ଼ୁଜି ବା ମିର୍ ମୋନ୍ ଡ଼େପ୍ସି ୱାନିଙ୍ଗ୍ ବିସ୍ବାସ୍ କିଇତିଦେର୍ । ଅଙ୍ଗୁର୍କିଡ଼ିଇଦୁ ବାଗ୍ତାନ୍ ପାଣିକିନିୱାରି କାତା ( ମାର୍କ ୧୨:୧-୧୨ ; ଲୁକ ୨୦:୯-୧୯ ) 33 ଜିସୁ ଇର୍ହାନ୍, “ମାରି ଉନ୍ଡ୍ରି କାତା ୱେନ୍ଡ୍ରୁ ।” ଅରେନ୍ ବୁମିମାଲିକ୍ ମାର୍ହାନ୍, ୱାନ୍ ଉନ୍ଡ୍ରି ଅଙ୍ଗୁର୍ କିଡ଼ିଇ କିତାନ୍ନୋ ସାରିବେଡ଼୍ତି କୋଅଟି ସୋସ୍ତାନ୍ ମାରି ଆୟା ଲୋଇ ଦାକ୍ଷ୍ରାକୁଣ୍ତ୍ କାରିତାନ୍ନୋ କାପ୍କିନି ସାମ୍ଣ୍ତା ତିଆର୍କିତାନ୍, ମାରି ବାଗ୍ତୁ ପାଣିକିନିୱାରିଙ୍ଗ୍ ଆୟା ଡଡି ବାଗ୍ତାନ୍ ସିତାନ୍ନୋ ଆଇଦେସ୍ତୁ ସୋର୍ହାନ୍ । 34 ଅଙ୍ଗୁର୍କଡ଼ି କୟ୍ନିୱାଲେ ୱାନ୍ ବାଗ୍ତୁପାଣିକିନି ୱାରି ଲାକ୍ତୁ ନିଜେଦି ବାଗ୍ ଲସ୍ତେଙ୍ଗ୍ ଇଜି ନିଜେଦି ଗତିମୁରୁଲିଙ୍ଗ୍ ପୋକ୍ତାନ୍ । 35 ମାତର୍ ବାଗ୍ତୁ ପାଣିକିନିକାର୍ ଆୟା ଗତିମୁରୁଲିଙ୍ଗ୍ ଆସ୍ତାରୋ ଅରେନ୍ୱାନିଙ୍ଗ୍ ଡାକ୍ତାର୍, ଆଇ ଅରେନ୍ୱାନିଙ୍ଗ୍ ସାୟାମାର୍ଗାଡାକ୍ତାର୍, ମାରି ଅରେନ୍ୱାନିଙ୍ଗ୍ କାଲ୍କୁ ପୋକ୍ସି ଡାକ୍ତାର୍ । 36 ମାରି କିଡ଼ିଇ ମାଲିକ୍ ନାଣ୍ତ ଲୋକାଙ୍ଗ୍ ଆଇ ପାଣିକିନି ଗତିମୁରୁଲିଙ୍ଗ୍ ପୋକ୍ତାନ୍ ମାରିଡ଼େସି ପୋକ୍ତାନ୍ । ୱାରିଉଣ୍ତିଙ୍ଗ୍ ବା ବାଗ୍ତୁ ପାଣିକିନିକାର୍ ଆୟାୱାଜା କିତାର୍ । 37 ସାରାସାରିୱେନ୍କା କିଡ଼ିଇ ମାଲିକ୍ ନିଜେଦି ମାରିନ୍ତିଙ୍ଗ୍ ବାଗ୍ତୁପାଣିକିନି ୱାରି ଲାକ୍ତୁ ପୋକ୍ତାନ୍, ୱାନ୍ ଅଡ଼ବିତାନ୍, ୱାର୍ ୱାନି ମାରିନ୍ତିଙ୍ଗ୍ ମାନାନାର୍ । 38 ମାତର୍ ବାଗ୍ତୁ ପାଣିକିନିକାର୍ ମାଲିକ୍ତି ମାରିନ୍ତିଙ୍ଗ୍ ସୁଡ଼ୁତାରୋ ୱାରି ୱାରି ଲୋଇ ୱାର୍ଗିତାର୍, ଇୟାକାନ୍ ସୁଡ଼ୁଦୁ, ମାଲିକ୍ଦି ମାରିନ୍ । ରାଦୁ, ୱେନିଙ୍ଗ୍ ବା ସାୟାମାର୍ଗା ଡାକ୍ନାଟ୍, ଆର୍ତିଙ୍ଗ୍ ସମ୍ପତ୍ତି ମାଦିଆନାତ୍ । 39 ଆବେଟ୍ ୱାର୍ ୱାନିଙ୍ଗ୍ ଆସ୍ସି କିଡ଼ିଇଦାନ୍ ପେରିତାରୋ ଆତେରେ ସାୟାମାର୍ଗା ଡାକ୍ତାର୍ । 40 ଜିସୁ ୱେନ୍ବାତାନ୍, “ଇଲେଇ, ଏସ୍ତିୱାଲେ କିଡ଼ିଇଦି ମାଲିକ୍ ୱାନାନ୍, ୱାନ୍ ବାଗ୍ତାନ୍ ପାଣିକିନିୱାରିଙ୍ଗ୍ ଇନିକା କିନାନ୍ ।” 41 ୱାର୍ ଇର୍ହାର୍, “ଆୟା ତାଗ୍ଇୱାରିଙ୍ଗ୍ ୱାନ୍ ପୁରା ଡାକ୍ନାନ୍ ମାରି ଆମା ବାଗ୍ତାନ୍ପାଣିକିନିକାର୍ ସାମାନ୍ ବେଡ଼ାଦୁ ୱାନି ବାଗ୍ ପଲ୍ ସିନାର୍, କିଡ଼ିଇ ୱାରି କିୟୁଦୁ ଡ଼ିସ୍ନାସିନାନ୍ ।” 42 ଜିସୁ ୱାରିଙ୍ଗ୍ ଇର୍ହାନ୍, ଇୟା ଦାର୍ମୁସାସ୍ତ୍ର ମାଟା ଇନିକା ମିର୍ ପଡ଼ାଇଦେର୍, ଆମା କାଲୁଦିଙ୍ଗ୍ ଇଲୁକୁ ତିଆର୍କିନିକାର୍ ପାଣିସିଏତ୍ଇଜି ଡ଼ିସ୍ତାସିତାମାର୍ହାର୍, ଆକାନେ ପେରିକା କନାଦି କାଲୁ ଆତାତ୍ । ପ୍ରବୁ ନିଜେ ଇକା ଇର୍ଆମାନାନ୍ । ପ୍ରବୁଦି ପାଣି ୱିଜୁ ଏସା କାବାନିକା ? 43 ଜିସୁ ମାରି ଇର୍ହାନ୍, ଆଦେଙ୍ଗ୍ ମିଙ୍ଗିଁ ଇଜିନା, ମାପୁରୁଦି ରାଜି ମିମାଣ୍କୁ ଅଆୟ୍ଆନାତ୍ ମାରି ଆମା ଲୋକୁ ମାପୁରୁଦି ବଦାଦାନ୍ ପାଣିକିନାର୍, ୱାରିଙ୍ଗ୍ ଆକା ସିଆଇଆନାତ୍ । 44 ମାରି ଏନ୍ ଇୟା କାଲୁ ମୁସ୍କୁ ଆର୍ନାନ୍, ୱାନ୍ ମକା ମକା ଆନାନ୍, ମାରି ଇୟା କାଲୁ ଆମାୱାନି ମୁସ୍କୁ ଆର୍ନାତ୍, ୱାନିଙ୍ଗ୍ ଆକା ଗୁଣ୍ତ୍ଗୁଣ୍ତା କିନାତ୍ । 45 ପେରି ଜାଜକର୍ ନି ପାରୁସିର୍ ଇୟା କାତାଦି ମାଟା ୱେନ୍ଞ୍ଜି ଜିସୁ ୱାରିଙ୍ଗ୍ ସୁଡ଼ୁଜି ଇଜିନାନ୍ଇଜି ବୁଜାଦେଙ୍ଗ୍ ଆଟ୍ତାର୍ । 46 ମାରି, ୱାର୍ ୱାନିଙ୍ଗ୍ ଆସ୍ତେଙ୍ଗ୍ ସେସ୍ଟାକିତାର୍, ମାତର୍ ଲୋକା ଗଲି ତିଏଲ୍ତିଙ୍ଗ୍ ୱାର୍ ଆକା କିଦେଙ୍ଗ୍ ଆଟ୍ଏତାର୍, ଇରିଙ୍ଗ୍ ୱାର୍ ଜିସୁଙ୍ଗୁଁ ଅରେନ୍ ବାବବାଦି ଇଜି ଅଡ଼ବିଜି ମାର୍ହାର୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020