Vaheveru 1 - Testamente Leyimpsha Xichangana

Ta Xikwembu loko xivulavulile hi N'wana

¹ Hi minkarhi leyotala ni tindlela letotala, Xikwembu xivulavulile khale ni vatatana va hina, hi milomo ya vaprofeta.

² Kambe masikwini lawa yohetelela, xivulavulile na hina hi N'wana, lweyi ximuvekeke kuva maja ndzhaka wa svilo hinkwasvu, lweyi na svona xitumbuluxeke tilo ni misava ha yena.

³ Hi yena lweyi kukwetsima ka Xikwembu kutikombaka ka yena, kutani atekelele lesvi Xikwembu xinga svona hi xiviri xa xona; nasvona atamele ntumbuluku hinkwawu hi rito ra yena ra matimba. Loko ahlampsile svijoho sva vanhu, atshamile vokweni ra xinene ra Lweyi anga ni vukulu hinkwabzu, henhla matilweni,

⁴ ahundzuke lweyi atlulaka ngopfu tintsumi hi vukulu, tani hi lesvi akumeke vito leritlulaka mavito ya tona hi vukulu.

N'wana atlula tintsumi

⁵ Xana hi yihi ntsumi leyi Xikwembu xitshamaka xiku ka yona: “U n'wananga, namuntlha nikuvelekile”; kumbe kuyengeta xiku: “Nitava tatana ka yena, yena ava n'wana ka mina” ke?

⁶ Ka vumbirhi, loko xitisa N'wana wa xona wa mativula misaveni, xite: “Hinkwatu tintsumi ta Xikwembu atimukhinsamele!”

⁷ Hi tlhelo ra tintsumi, xite: “Xikwembu xiyendla tintsumi ta xona mimoya, ni malandza ya xona malangavi ya ndzilo.”

⁸ Kambe hi tlhelo ra N'wana, xite: “Xiluvelo xa wena, we Xikwembu, i xa minkarhi ni minkarhi, nhonga ya wena ya vuhosi i nhonga ya kululama.

⁹ Arhandzile kululama, avengile kuhomboloka. Hikolaho Xikwembu, Xikwembu xa wena, xikuchelile mafurha ya ntsako lowukulu kutlula vanakuloni.”

¹⁰ Nasvona xite: “Wena Hosi, uvekile masungulu ya misava kusunguleni, ni matilo i ntirho wa mavoko ya wena;

¹¹ matalova, kambe wena ukona hi masiku hinkwawu; matahlakala hinkwawu kufana ni sviyambalu,

¹² utamapetsa kufana ni xifunengelo, kutani utamacinca kufana ni sviyambalu. Kambe wena wahali svosvi unga xisvona, ni malembe ya wena amangeheli.”

¹³ Xana Xikwembu xitshama xibzela yihi ka tintsumi xiku: “Tshama vokweni ra mina ra xinene, nikondza niveka valala va wena hansi ka minkondzo ya wena” ke?

¹⁴ Xana tintsumi hinkwatu ahi mimoya leyitirhelaka Xikwembu, leyirhumiweke kupfuna vanhu lavafanelaka kukuma kuponisiwa ke?