Nhlavutelo 19 - Testamente Leyimpsha Xichangana

¹ Ndzhaku ka svosvo, nitwa lesvifanaka ni rito ra matimba, ra xitshungu lexikulu le tilweni, rihuwelela riku: “Haleluya! Kuhlayiseka ni kukwetsima ni matimba i sva Xikwembu xa hina,

² hikuva kuyavanyisa ka xona katshembeka, kululamile minkarhi hinkwayu. Xiyavanyisile muwosvi lwenkulu lweyi aboliseke misava hi vuwosvi bza yena, kutani xirihiselile ngati ya malandza ya xona henhla ka yena.”

³ Xiyengeta xihuwelela xiku: “Haleluya! Musi wa kupsha ka yena wutuvikela henhla hilaha kungaheliki.”

⁴ Kutani vakulukumba lava va makume mambirhi ni mune, vakhinsama vakorhama, vagandzela Xikwembu lexitshameke Xitshan'wini xa Vuhosi na vali ni svivumbiwa lesvihanyaka sva mune, vaku: “Amen, Haleluya!”

Nkhuvu wa vukati bza Xinyempfana

⁵ Kutani kuhuma rito hi le Xitshan'wini xa Vuhosi riku: “Dzunisani Xikwembu xa hina, n'wina hinkwenu malandza ya xona na n'wina lava mixichavaka, lavakulu ni lavatsongo.”

⁶ Kutani nitwa lesvifanaka ni rito ra xitshungu lexikulu kumbe mpfumawulu wa mati layotala, svifana ni mpfumawulu wa kudzindza lokukulu ka tilo, sviku: “Haleluya! Kufuma i ka Hosi, Xikwembu xa hina lexinga ni matimba hinkwawu.

⁷ Ahitsakeni hitsakisisa, hixidzunisa, hikuva nkhuvu wa vukati bza Xinyempfana wufikile, ni mutekiwa wa xona atilulamisile;

⁸ anyikiwile kuyambala sva ntshembzana wa risima, wovangama ni wa nkoka.” Lesvi sva “ntshembzana wa risima”, svivula mintirho yolulama ya vahlawuliwa va Xikwembu.

⁹ Kutani ntsumi yiku ka mina: “Tsala lesvi: Kukatekile lavarhambiweke kutalalela nkhubzini wa vukati bza Xinyempfana.” Kutani yitlhela yiku ka mina: “Lawa i marito lawa matiyeke ya Xikwembu.”

¹⁰ Kutani nikhinsama nikorhama milengeni ya yona kutayigandzela, kambe yiku ka mina: “Ungatshuki uyendla svosvo, mina ni nandza ntsena, kukota wena ni vamakwenu lavahlayisaka vumboni lebzihumesiweke hi Yesu Gandzela Xikwembu!” Vumboni lebzi bzihumesiweke hi Yesu, hi bzona mongo wa vuprofeta.

Ta lweyi agadeke hanchi robasa

¹¹ Ndzhaku ka svona, nivona tilo ripfuliwile, kan'wekan'we, kuvoneka hanchi robasa. Lweyi agadeke rona, mavito ya yena vali i “Mutshembeki” ni “Ntiyiso”. Ayavanyisa ni kulwa hi kululama.

¹² Mahlo ya yena mafana ni langavi ra ndzilo; nhlokweni ya yena ku ni tihari ta vuhosi letotala, nasvona atsaliwile vito leri kungaliki na munhu lweyi aritivaka, loko angali yena n'winyi wa rona ntsena.

¹³ Ayambele sviyambalu lesvipetiweke angatini, kutani vito leri vamuchuleke rona i “Rito ra Xikwembu”.

¹⁴ Kutani mab'uthu ya le tilweni lawa mayambaleke sviyambalu sva ntshembzana wa risima, lowobasa ni wa nkoka, mamulandzelela na magadile mahanchi yobasa.

¹⁵ Anon'weni wa yena kuhuma tlhari lerokariha, leri angatatsema matiko ha rona, kutani atamafuma hi nhonga ya nsimbi. Atakandziyela xikamelweni xa vhinyu ra vukarhi lebzochavisa bza Xikwembu lexinga ni matimba hinkwawu.

¹⁶ Ka jansi ra yena ni le nyongeni ya yena, kutsaliwile vito leringe: “Mufumi wa vafumi ni Hosi ya tihosi.”

¹⁷ Kutani nivona ntsumi na yiyimile ka jambu. Yivitana, hi rito leritlakukeke, tinyanyana hinkwatu letihahaka xibakabakeni xa tilo, yiku: “Tanani, mitahlengeletana, milalela nkhubzini lowukulu wa Xikwembu;

¹⁸ mitaja nyama ya tihosi, ni nyama ya tindhuna ta tinyimpi, ni nyama ya tinhenha, ni nyama ya mahanchi ni ya vagadi va wona, ni nyama ya vanhu hinkwavu, vatshunxeki ni svikarawa, lavakulu ni lavatsongo.”

¹⁹ Kutani nivona xivandzana ni tihosi ta misava ni mab'uthu ya tona, titlhangene kulwa ni lweyi atshameke henhla ka hanchi, tilwa ni mab'uthu ya yena.

²⁰ Xivandzana xikhomiwa, kukhomiwa ni muprofeta wa mavunhwa lweyi aayendla masingita mahlweni ka xona hi masingita lawa, aaxisa lava avali ni mfungu wa xivandzana ni lava avagandzela xifaniso xa xona. Kutani xivandzana ni muprofeta wa mavunhwa vahoxiwa svin'we na vahahanya tiveni ra ndzilo lowupfurhaka na wuli ni xivavula.

²¹ Lava van'wana vadlawa hi tlhari ra lweyi atshameke henhla ka hanchi, tlhari leri rihumaka non'weni wa yena, kutani tinyanyana hinkwatu tija tixurha hi nyama ya vona.