1 Timotiya 1 - Testamente Leyimpsha Xichangana

Kuxewet

¹ Mina Pawulo, mupostola wa Kriste Yesu hi kulerisa ka Xikwembu Muponisi wa hina ni ka Kriste Yesu kulangutela ka hina,

² nitsalela Timotewu, n'wananga wa ntiyiso kupfumeleni, nili: Timpsalu ni vunene, ni kurhula, asvive na wena, svihuma ka Xikwembu Tatana ni ka Kriste Yesu Hosi ya hina.

Ta xitsundzuxu hi tlhelo ra tijondzo tohomboloka

³ Loko nahaya le Makedoniya, nikukhutazile kutshama le Efesa; ni svosvi nahahlaya svosvo, hikuva ku ni van'wana le Efesa lavajondzisaka mavunhwa; vabzele kuva vamatshika,

⁴ vangaheti nkama wa vona hi minkaringana, ni kulongoloxela tinxaka tokala tingaheli, lesvivangaka kukanetana, matshan'wini ya kuseketela makungu ya Xikwembu lawa matirhaka hi kupfumela.

⁵ Kasi, laha xitsundzuxu xa hina xikongomeke kona, i kupfuxa rirhandzu lerihumaka mbilwini leyobasa ni le ripfalwini lerinene, ni le kupfumeleni ka ntiyiso.

⁶ Van'wana, hi mhaka ya kutshika svilo lesvi, vapepetsekile vayanghena kuvulavuleni lokungapfuniki nchumu;

⁷ vanavela kuva vajondzisi va nawu, kambe vangatwisisi lesvi vasvihlayaka kumbe timhaka leti vahlayaka lesvaku vatiyile ka tona.

⁸ Hina hasvitiva lesvaku nawu i wunene loko munhu awutirhisa hi ndlela yakona,

⁹ na ali karhi atwisisa lesvaku milawu ayivekeliwanga lavalulameke, kambe yivekeliwile lavohomboloka ni lava vatiyalisaka; yiyendleliwile lavangachaviki Xikwembu ni lavajohaka, ni lavangakhongeliki, ni lavasandzaka lesvohlawuleka, ni lavadlayaka vatatana va vona kumbe vamamana va vona; milawu leyi yiyavanyisa svigevenga,

¹⁰ ni vawosvi ni vavanuna lavativanaka hi xinuna kulobze, ni lavayivaka vanhu, ni vahembi, ni lava vokala vangavulavuli ntiyiso, ni lavayendlaka hinkwasvu lesvihambaneke ni jondzo leyinga yona ya ntiyiso.

¹¹ Jondzo yakona yiyelana ni Evhangeli leyivekiweke mavokweni ya mina, leyitwalisaka kukwetsima ka Xikwembu, xihlovo xa minkateko.

Kukhensa timpsalu ta Hosi

¹² Nikhensa lweyi aninyikeke matimba yotirha ntirho lowu, Hosi ya hina, Kriste Yesu; hikuva anivonile na nili lweyi atshembekeke, hi kuniveka ntirhweni wa yena,

¹³ hambilesvi khale nitshamaka nimusandza, ni kumuxanisa, ni kumupfukela. Kambe nitsetseleliwile, hikuva aniyendla hi kupfumala vutivi, ningali na kupfumela.

¹⁴ Kambe timpsalu ta Hosi ya hina tinitalelile, svin'we ni kupfumela ni rirhandzu, svinga lesvinga ka Kriste Yesu.

¹⁵ Rito leri ritiyile, rifanele kuyamukeliwa hi mandla mambirhi, leringe: “Kriste Yesu atile misaveni kutaponisa vajohi.” Kutani ka vajohi lava, mina ni lweyi worhanga hi vubihi.

¹⁶ Kambe ni tsetseleliwile, kuyendlela lesvaku mina lweyi ninga mujohi worhanga hi vubihi, Kriste Yesu atasvikota kukomba kuleha ka mbilu ya yena lokuhetisekeke, kutani xiva xikombiso ka lavangatapfumela ka yena, vakuma vutomi lebzingaheliki.

¹⁷ Ka Hosi ya minkama hinkwayu, leyingaliki ni kufa, leyingavoniwiki, xona Xikwembu xili xoxe, akuve kuchaviseka ni kudzuneka, hilaha kungaheliki! Amen.

¹⁸ Timotewu n'wananga, niveka milawu leyi mavokweni ya wena, hikuva utsundzuka lesvaku ku ni lavangaprofeta lesvi ungatava svona; marito lawa amakutiyise, utakota kulwa nyimpi leyinene,

¹⁹ uhlayisa kupfumela hi ripfalu leritshunxekeke. Hi kudlaya mapfalu ya vona, van'wana valahlekeliwile hi kupfumela.

²⁰ Xikarhi ka vona, ku na Imenewu na Alexandre, lava nivanyiketeke ka Sathana, lesvaku vakhatisiwa akuva vangahasandzi Xikwembu.