1ซามูเอง 21 - Northern Pwo Karen Thai Bible

ดาเว ดี๊ กู ลู่ง อฌี้อแอว้

¹ ฌ้อง ดาเว เฌ๊ ลู่ง เว่ง โน้ะ พ้า, เฌ๊ฌูง โพล้งลื่งเท่ออคู อาฮีเมเละ ดี๊ อาฮีเมเละ ไจทาง ว้ะโทะว้ะติ้, เฌ๊ฌูง ดาเว ไคล้ เว๊ ดี๊-อ้ะ ไจ้ะเว๊, “แบทเล้?, น เฌ๊ ล แฌ้ เฆาะ, โพล้ง ล เฌ๊ ดี๊ แน้ น่าง แฌ้ แบ-อ้า?”

² ดาเว ไคล้ ดี๊ อาฮีเมเละ โพล้งลื่งเท่ออคู ไจ้ะเว๊, “กจุ้แฆว้ อางแบเลา แย้ เกม๊า จ แม้ เท่อ ล เม้ง, อ เว๊ โล้ แย้ ไจ้ะเว๊, ‘ท อ ไฌ่ พี่ จ เจ่ทาง แน้ เกม๊า น ลี้ แม้-อ้ะ นอ, ม๊า โพล้ง ซีงแฌ๊ น่าง แฌ้ ล ฌี้, ดี๊ ทไฌ่ พี่ จ อางแบเลา แน้ นอ’, จ พ้ะ โละซ้ะ ดี๊ โพล้ง น่างบางซ้ะบาง ล มู๊ง ลู่ง ทล่าง ล จอง

³ ค๊องเนง โย้ น ทโอ ล เม้งๆ, ชี่-อ้า, เกล๊าง เอะ แย้ กู เมาะ ล เย่ ลอง, เมะแบโค๊ ทเม้ง ฌี้ๆ, พี่ น อางฆื๊งนี่-อ้ะ โอ นอ”

⁴ โพล้งลื่งเท่ออคู นอ ไคล้ช๊า ดาเว ไจ้ะเว๊, “กู แดเท่อ นอ จ เท่อ ล โอ แบ, แบเด้าะ กู พี่ อฌี้อแอว้ นอ โอ, แคว่ ลู่ง กแคว๊ น่างบางซ้ะบาง ลแพ นอ, ล นี่ โอ เบ้า แบ ดี๊ กมืง แบ นอ ล้อ”

⁵ ดี๊ ดาเว ไคล้ช๊า โพล้งลื่งเท่ออคู นอ ไจ้ะเว๊, “เต้ๆ, นอ, พี่ เฆ้อ ลแพ อี้ง ก ไจทาง แม้ เท่อ นอ, กมืง นอ แบ ทด้าง ทะ-อ้ะ, เกม๊า อ โอ ช้างชื้ง ไฆวะ ดี๊ เฆ้อ, ด้องซุ้ กุ้ พ๊าๆ, พี่ จ ไจทาง นอ ล้อ, ทึเมะ ทลี้ ทไท้ แดเท่อ ฌี้ นอ, กแคว๊ น่างบางซ้ะบาง ลแพ อี้ง อ ล้อง อ ย่าง เช๊งเกล้ง เว้ เย้า, ดี๊ ล นี้ง แย๊ อี้ง นอ, อ ซื๊งเว๊ อ ล้อง อ ย่าง เช๊ง เกล้ง ฌี้ เด้าะ”

⁶ ทบี่นอ, โพล้งลื่งเท่ออคู เกล๊าง กู เอะ ดาเว, เมะเว๊ พี่ นอ กู อฌื๊งอแฌ้ ล โอ แบ, โอ เว๊ ที่ กู กแช่แยว้ อ เมะแซ พ้า พี่ แม้นี่-อ้ะ ลู่ง กแช่ยาเว อ เมะแซ พ้า, บี่ซุ้ ม ช๊างล้าง ไท้ กู อ ซ๊าง, พี่ แม้นี่ไฆวะ กู อ ล่าง ลี้ง เย้า นอ ล้อ

⁷ ล นี้ง แย๊ นอ, กแคว๊ พี่ เก ซาอู อ เพล่ดู โอ พี่ นอ ล แฌ้, แบ ท เกม๊า อ โอ ลู่ง กแช่ยาเว อ เมะแซ พ้า, โพล้ง ล แฌ้ อี้ง นอ อ เม้ง โดเอะ, เก โพล้ง เอโดง, อ เว๊ เก โพล้ง ลื่ง ทพูแฆ่ อคูอแน่ เอะ ซาอู

⁸ ดาเว ไคล้ ดี๊ อาฮีเมเละ ไจ้ะเว๊, “พี่ อี้ง นอ น น้ะ น พ้าง ล โอ น จูง ล้อง น่างเบง แบ-อ้า?, เมะเว๊ จ ล นี่ เฌ๊ โชะ น้ะ-อ้า, นางดึ้นางชาง-อ้า น่าง เม้ง แบ เฆาะ, เป๊งนี่ กจุ้แฆว้ อ ทแม้ นอ เก ทแม้ ลู่ง แบ ปชื่ง-อ้ะ”

⁹ โพล้งลื่งเท่ออคู นอ ไจ้ะเว๊, “โกลีอ้ะ โพล้ง ฟีลีเตีย, พี่ น แม้ซี๊ง-อ้ะ ลู่ง ทลู่ง เอลา คางไท้ะ อู้ง นอ น แคว่เซ้อ, อ น้ะ นอ บอง-อ้ะ ดี๊ ท ไก้ยะ โอ พี่ นอ ได้ะ, โอ ไช๊อเบงคูลท๊า อ ล่างไค๊ นอ, น เมะ แม้นี่ น้ะ นอ แม้ แดเทา, โอ ที่ ล เบง แย๊ นอ ล้อ, อ แฌ้แพ ล โอ น่าง เบง แบ”, ดี๊ ดาเว ไจ้ะเว๊, “น้ะ อ แฌ้แพ บี่ซุ้ ดี๊ นอ ล โอ แบ เฆาะ, เกม๊า แย้ แดเทา”

ดาเว ไจคุ้ซูงไฆวะ ลี้ก้ะ ลู่ง เว่ง กะทา พ้า

¹⁰ ดาเว เฌ้เทิงทาง ล นี้ง แย๊ นอ, ไจคุ้ซูงแดไฆวะ ซาอู, ลี้ฌูง อาคิ้ กจุ้แฆว้ ลู่ง เว่ง กะทา

¹¹ ดี๊ อาคิ้ อ เพล่ดู ซีงลแพ นอ ไจ้ะเว๊, “ดาเว ล แฌ้ อี้ง ล เมะ แบ-อ้า?, พี่ อ เก ที๊งล่างค่างพ้า นอ อ กจุ้แฆว้, อ ซื๊งเว๊ ล นี่ เฌ้เทิงลี่ง ดี๊ ซ้ะอวีง แท๊ แบ-อ้า?, พี่ ไจ้ะเว๊ ‘ซาอู แม้ซี๊ง โพล้ง อ แฌ้ ล ม๊า ดี๊ ดาเว แม้ซี๊ง โพล้ง อ แฌ้ อ ไซ?’, ”

¹² ดาเว อางกี ทไคล้ ลแพ อี้ง ลู่ง อ ซ้ะ พ้า, ดี๊ อ เว๊ ซ้ะเม อาคิ้ กจุ้แฆว้ เว่ง กะทา พ้า นอ เต้ๆ

¹³ อ เว๊ เปลงไฆวะ ดุ้ อ ซ้ะ, ลู่ง โพล้ง ลแพ นอ อ เมะแซ พ้า, ดี๊ แม้ ดุ้ก้ะ อ ซ้ะ เก โพล้ง พลื่งทาง พี่ โอ ลู่ง โพล้ง ลแพ นอ อดู้งอยาง พ้า อ แค๊ นอ, ไจ กวิ้ ป้างกิ้ ร้อง อ เกล้ ป้ะตู๊ง, ดี๊ แม้ ล้างแยว้ อ นุ้ ที๊ง ลู่ง อ แค ชอง ล้อง

¹⁴ ฌ้อง อาคิ้ โล้ เอะ อ เพล่ดู ลแพ นอ ไจ้ะเว๊, “เอ๊, น แด-อ้ะ โพล้ง ล แฌ้ นอ เก โพล้ง พลื่งทาง, ฌ้อง น เฌ๊ฌ้า-อ้ะ ลู่ง จ โอ แม้ทเล้?

¹⁵ จ โพล้ง พลื่ง ล โอ แบ โบ่?, น เฌ๊ฌ้า มะ โพล้ง ล แฌ้ อี้ง, เฌ๊ แม้ พลื่งทาง อ ซ้ะ ลู่ง จ เมะแซ พ้า, โพล้ง บี่อี้ง นอ, เกิ้ง เฌ๊ นึฆ้าง จ บลาง พ้า อ้า?”