Jonas 3 - Nouvo Testaman: Vèsyon Kreyòl Fasil

Obeyisans Jonas

¹ Lè sa a, SENYÈ a pale ankò ak Jonas yon fwa ankò, li di l:

² “Leve, ale Niniv, gran vil la, epi bay mesaj mwen ba ou a.”

³ Fwa sa a, Jonas obeyi SENYÈ a. Li ale Niniv, jan Bondye mande l la. Niniv te yon vil ki laj anpil. Yon moun t ap bezwen twa jou pou l ta mache non tout vil sa a.

⁴ Jonas te antre nan vil la. Apre li mache tout yon jounen, li kòmanse pale ak pèp la konsa: “Nan karant (40) jou, lavil Niniv pral detwi.”

Repantans pèp Niniv la

⁵ Tande pèp Niniv la te tande mesaj la, yo kwè nan pawòl Bondye a. Tout moun, grannèg kou malere, deside pou pa manje anyen. Yo mete rad dèy sou yo.

⁶ Lè wa Niniv la tande sa, li kite twòn li. Li wete bèl rad wayal ki te sou li a, li mete yon rad sak sou li, epi li chita nan sann dife.

⁷ Apre sa, wa a ansanm ak tout lòt gwo chèf ki nan vil Niniv la ekri yon kominike, yo voye l nan tout peyi a. Yo pase lòd sa pou tout moun respekte: “Se pou okenn moun ni okenn bèt vivan tankou bèf, kabrit ak mouton pa ni manje ni bwè.

⁸ Tout moun ak tout zannimo dwe mete rad dèy sou yo. Yo dwe rele kriye ak tout fòs devan Bondye. Yo dwe kite move fason yo konn trete pwochen yo. Se pou yo sispann vyolans y ap komèt nan mitan yo.

⁹ Petèt, Bondye va chanje lide. Li p ap fache kont nou ankò. Konsa, nou p ap mouri.”

¹⁰ Lè Bondye wè tout efò yo fè pou kite move zak yo t ap fè yo, li chanje lide l. Li pa detwi pèp la ankò paske li gen pitye pou yo.