Zakariyya 2 - NABUWWA KEE MALIKWA

AKAT GABAT LE NUM WACYIH UBLE

¹ Tohuk lakal annah wagga hee waqdi, baaxo edde yamittiren akat gabat le num uble.

² Too numuk, «Anke gexxa?» exce. «Yarusalaamal mitri haa'gidih gexah an. Xexxar kee baguh takkeh gide ablem faxa» yok iyye.

³ Tohuk wadir yo'lih yaabak suge malaykatti fooca fanah yemeete waqdi, nammayhaytô-malaykatti xer ikkek kaa fan yemeete.

⁴ Kaak iyyeemih, «Sissikuk gexay, ama baaxo edde yamittiren akat gabat le duubalik intaamah, ‹Yarusalaamal mango ummat kee mango lac sugeleemih sabbatah, inkih tan Yarusalaamat gaso haanam mabicta.

⁵ YALLI isih, girak bicsen gasoh innah, tet dacriseleemih xagana culeeh, isi nabna luk tet addal anele› » iyye.

MARIN BAAXOL YEN MARAH TEKKE SEECO

^6-7 YALLI isi marak iyyaamah, «Duma anu kulli ikke fixixih sin ruubeh suge. Ahaysa Siyon-maray Baabeloonul yanihiyyaw, uguta! Baabelon rasu cabay tokkek kuda» iyye.

⁸ YALLAY Nabaamak Nabahiyya iyyaamah: «Sin xaga mari intik-baxa yok xagem deqsita» iyya. Tonna leemiik nabna geek lakal sin buubak sugte doolatwa fan yoo ruube.

⁹ Gaba keenil qideyyooh; keenih taamitak sugte ken naqoosa ken buubele. Toh keenit takku wayta saaku, YALLAY Nabaamak Nabahiyya yoo ruubem aaxigetton.

¹⁰ YALLI iyyeemih, «Yarusalaam maraw, qililisay ifrica. Anu sin lih gacuh amaateh an.

¹¹ Toh takku wayta saaku baadal tan ummat yoo YALLAL aduureleeh, yi mara akkelon. Anu kaadu sin lih aneyyo» iyye. Isin YALLAY Nabaamak Nabahiyya sin fanah yoo ruubem too saaku aaxigetton.

¹² Too saaku taahirik tan baaxol, Yuudâ-mari dumak kaxxih, YALLIH ikoytah akkeloonuuh; ken rasi kay rasu akkele. Yarusalaam qagitak YALLI doorite magaala akkele.

¹³ Ummatey, YALLI isi dabaaqay taahirik yanihiyyak yamaateh yanik, kay foocal tibba 'xica.