Yacedkel 15 - NABUWWA KEE MALIKWA

SAARUL BAAHEN CEELALLO

¹ YALLIH qangara yol obteeh; yok iyyeemih:

² «Bani-adantow, saaru kee caxa inkim tekke saaku mali. Saaroyti caxat missoysaanam bictam kinnii?

³ Saaruk gersim hinnak, duyye edde takran fallakka le caxxa akak bicsaanam maay duudan?

⁴ Kafta waqdi girah urse weenik, tohoysa xiqtam mali. Hay girat qidan waqdi, buxux akak yonkommeeh, gude akak raqte saaroyti xiqtam maay le?

⁵ Dumaak girat qide'kal, sahdah xiqtam luk masuginnaay; awayay girat qideenihiyya, xiqtam luk maraqta» yok iyye.

⁶ Tonna'mmay taway YALLAY Mulki lehiyya iyyaamah, «Too saaroytay garboh addak irgiqqa heenih girat qideeni elle carara'nnal, Yarusalaam ummatta too bis le digaalah, ken digaaleyyo.

⁷ Naharsi girak yisillimeenih immay, away gersi girat cararelon. Anu ken digaala saaku, YALLA kinniyom yok aaxigetton.

⁸ Yol luk sugen imaan cabeeniih; tonna-leemiik baaxo keenik abur abeyyo. Tahat yabtam yoo YALLAY Mulki lehiyya» iyye.