Qedra 9 - NABUWWA KEE MALIKWA

ISRAAYIL MARIN MARAT BAXAK BALLISIH GACEN

¹ Tohum inkih abeenik lakal, Israayilik saqoltih yan marak garab yemeeteeh, yok iyyeenimih, «Seeka kee Leewih yooboke mara kee kalah tan ummatta, a cuggaaneh keenik yan mara kee oson edde asan umâ-yabulih tan qaadoodik yaxxeeroonu cineenih. Too maray keenik cuggaaneh yanihiyya duma a baaxol sugen Kanqaan kee Ciita kee Feriida kee Yabuusa kee Qammon kee Mooyab kee Masri kee Amoora mari abak suggu 'ye umâ-yabulih tan taama aban.

² Israayilih yooboke mari isi kee isi xayloh, allî-marih baxuw rihimih abitaanam baahen. Yalli doore maray taahirik yanihiyyak sugeeni'mmay caraamiteenih. Kedoh abbobti kee doolatak kaxxa aracat yan mari ta uma taamak foocat gace» 'yaanam yok iyyen.

³ Toh oobbe waqdi, yot tekke niyâ-diglok gexxaamah sara innik qanxiseeh, amô-xagorta kee deben innik mugseh, abeh an haggah gomboduk bagul daffee.

⁴ Bari radda 'yeh magrib waqla aban sadgatah sahda amma 'tam fan, tokkel elle wariggat sugeeh; Yalli marin baaxok yuduure mari abe dambik iyyeh sugem aaxaguk suge mari, ahak maca net akkeleh kaxxam cunxiteeniih; yol gaaboowen.

⁵ Sarrak magrib yekkeeh, sadgat edde aban wakti xayyoowe waqdi, Yallah rammitak nadaamah daffeyak elle suge aracak, qanxixe sara xagarat luk, solla exce. Tohuk lakal gulubuh gacca exceh, YALLAY yi Dagelta kinnihiyyal dooqah gaba ruube.

⁶ Too waqdi dooqah exceemih, «Yi Dageltaw, wacarriye waytam yoo ikkal, ni dambi mangah caddo cabeeh xexxaarah qaran eleele. Tonna kinnuk, yi Dageltaw, koo kallacam wacarriy yol tekke.

⁷ Ni kaxxa abbobtih dabaanaay, akke, neey ku mara kinnihiyya dambi abittok way maadayinnino. Nanu abne dambik gexxaamah, neey ni malikwa kee seekak nakkeemiik, marin malikwah milkih gacneeh; nee buubeeniih, nee qideeniih, seewah casbit yabbixen marih gurral nee been. Caddi akah abe waan maray qaybit radehiyya nekkeh sugneeh, uxih too marah akah nan.

⁸ «Tonna'mmay YALLAW, ni Dageltaw, dago uddur kinni way, maqaaneh addat nee sugusse. Baatik saaboh raaqe marak edde sugne naqoosinnak nee kalteh. A baaxoy taahirik tanil amaanah nee tabbixe. Edde sugne naqoosinnak dagom kalla nee hayteh, qusba manot nee hayte.

⁹ Naqoosah sugne'mmay, kooy ni Dagelta kinnihiyya nee mamaaqilinnaay, ku kacanuy aggiriqe sinnihiyya nee dacrisak, Fursi-malik ni yab oggola num abte. Ku qariy yiddigilleh sugehiyya xisnuuy, akkel Yarusalaam kee Yuudâ-rasul amaanah xinna'gidih, akke nee ruubaamih taama too malikih gabat absisse.

^10-11 «Hay, taway tekkeemik maca innuu, ni Dageltaw? Duma ku naqoosah ten ku nabuwwah gabat neh rubte amri cinneh. A saaku kaadu ku amri cinaanamat qaginneh. Too nabuwwa, ‹Ama dabaaqah elle gactoonu waytan baaxo, tet addal yan marih sabbatah, nadaasa tekke› 'yaanam nek iyyeenih yenen. ‹Ta mari ama rasuk woo exxaay a exxa umâ-yabulih tan taamat baysen› 'yaanam iyyeenih yenen.

¹² ‹Tonna leemiik, ama baaxol sin doolat qande bahtam faxxeeniih, isin kaadu meqe'nnal xintaanam faxxeeniih, sin baaxo nagrah baxak baxal raqtam faxxeenik, tet addal yan marih sayyol marihimina; isinni xaylo kaadu keenit rihime kala. Amaan geyi ken mahana; abaanam faxaanam gabal bici keenik mahana› 'yaanam too nabuwwa duma nek inteh ten.

¹³ Ni Dageltaw, abneh nan kaxxa dambi kee umaanek gexxaamah, digaala net tekkek sarra kinni way, ni umaane takkeh gidel nee madigaalinnitooy, baye marak saaboh sinam cabte.

¹⁴ Hay, taway, ku amri cinaanamat qagtaanam bictam kinnii? A maray umâ-yabulih tan taamat asahiyyak digibnam bictam kinnii? Ku amri cinne nee tekkek, ku kaxxa bagcarra nee aleelele. Nee baysettooh, addunyal saaboh num nek macabta.

¹⁵ YALLAY Israayil ummatta doorehiyyaw, qadli lem kooy; tonna'mmay ta saaku fan abne umaaneh saabo nee macabsiisinnito. Abba hayne umaane ninnik away qaddosnah nan. Ku foocah elle namaate inna mannu» 'yaanam exce.