विलाप 5 - नेवाः बाइबल

हाकनं थापं यायेगु निंतिं प्रार्थना

¹ हे परमप्रभु, जिमित छु जू वःगु दु, व खँ लुमंकादिसँ। जिमिगु बदनाम जूगु स्‍वयादिसँ।

² जिमिगु सर्बय परदेशीतय्‌गु ल्‍हातय् लाःगु दु। जिमिगु छेँ परदेशीतय्‌गु जूगु दु।

³ जिपिं मांबौ मदुपिं व हाना मदुपिं जूगु दु, जिमि मांपिं भाःत मदुपिं थें जूगु दु।

⁴ जिमिसं धिबा पुलाः लः त्‍वनेमाः, जिमिसं सिँ तक नं न्‍यानाकायेमाः।

⁵ जिमित ल्‍यूवःपिं जिमिगु पलाः लिक्‍क दु, जिपिं तसकं त्‍यानुचाःगु दु, जिमित आराम मदु।

⁶ जिमिसं गाक्‍क नयेत्‍वनेगु निंतिं थःत मिश्र व अश्‍शूरयात लःल्‍हानाबिया।

⁷ जिमि तापाःबाज्‍यापिन्‍सं पाप यात, आः इपिं मन्‍त। इमिसं याःगु अर्धमया फल जिमिसं भोगे यानाच्‍वना।

⁸ दासतय्‌सं जिमित शासन याइ, जिमित इमिगु ल्‍हातं त्‍वःतकीपिं सुं हे मदु।

⁹ गांगामय् दुगु तरवारं यानाः जिमिसं थःगु ज्‍यान पानाः नयेत्‍वनेगु माला हया।

¹⁰ तसकं नये पित्‍यागुलिं जिमिगु छेंगू भुतू थें क्‍वाये धुंकल।

¹¹ सियोनय् मिसातय्‌त व यहूदाया शहरय् ब्‍याहा मजूपिं ल्‍यासेतय्‌त स्‍यंकाब्‍यूगु दु।

¹² शासकतय्‌त थथःगु ल्‍हातं यख्‍खाःगु दु, थकालिपिन्‍त भचा नं हनाबना याःगु मदु।

¹³ ल्‍याय्‌म्‍हपिन्‍सं तसकं दुःख सियाः घः क्‍यलेमा, मिजंमस्‍त सिँ क्‍वबिया धेधेचुयाः न्‍यासि वनी।

¹⁴ थकालिपिं शहरया मू ध्‍वाखाय् मुनेगु त्‍वःतूगु दु, ल्‍याय्‌म्‍हपिं मनूतय्‌सं थःगु संगीत त्‍वःतूगु दु।

¹⁵ जिमिगु नुगलं लय्‌ता मदयावंगु दु, जिमिगु हुलाप्‍याखं दुःखय् फहिले धुंकल।

¹⁶ जिमिगु छेनं श्रीपेच कुतुं वंगु दु, जिमित धिक्‍कार दु, छाय्‌धाःसा जिमिसं पाप यानागु दु।

¹⁷ थथे जुयाः जिमिगु नुगः बमलाये धुंकल, जिमिगु मिखा बुलुइ धुंकल।

¹⁸ छाय्‌धाःसा सियोन पर्वत झिजांमिजां दंगु दु, ध्‍वंचात अन चाःहिलाः जुइ।

¹⁹ अय्‌नं हे परमप्रभु, छिं सदां सदां शासन यानादी, छिगु सिंहासन पुस्‍तां पुस्‍ता तकं दया हे च्‍वनी।

²⁰ छाय् छिं जिमित ल्‍वमंकाः च्‍वनादियागु? छाय् छिं थुलिमछि ई तक जिमित त्‍वतादियागु?

²¹ हे परमप्रभु, जिमित छिथाय् लितहयादिसँ, अले जिपिं लिहां वये, न्‍हापा जिपिं गथे खः जिमित हाकनं अथे हे यानादिसँ।

²² छिं जिमित त्‍वःताः हे दियागु खः ला? छितः जिपिं खनाः तसकं तं पिहां वः ला?