उपदेशक 6 - नेवाः बाइबल1 थ्व संसारय् जिं छगू थज्याःगु मभिंगु खँ खनागु दु, गुकिं मनूतय्त तसकं क्वत्यलातल। 2 परमेश्वरं सुं मनूतय्त धन-सम्पत्ति, बुँ व इज्जत बियादी, गुकिं यानाः इमित यःगु छुं हे मगाःमचाः जुइ मखु। तर परमेश्वरं इमित उपिं न्ह्यइपुकेत बियादी मखु। बरु मेम्ह हे मनूयात न्ह्यइपुकेत बियादी। थ्व नं सितिं वंगु व ग्यानापुगु खँ खः। 3 छम्ह मनूया सछिम्ह काय्पिं दयाः यक्व दँ तक म्वात, तर व यक्व दँ तक म्वानाः नं थःगु बांलाःगु अवस्थापाखें वयागु आत्मा लय्मताःसा अले वयात सीबलय् खःकथं मथुन धाःसा अज्याःम्ह मनू स्वयाः ला बूबलय् सीम्ह मचा हे बांलाः। 4 व बूबलय् सीम्ह मचा सितिं वंक बुल अले खिउँथाय् हे मदयावन। अले खिउँगुलिं हे वयागु नांयात त्वपुयाबी। 5 वं गुबलें निभाः खनी मखु, वा वं छुं हे मस्यू, अय्नं व मनूया स्वयाः थ्व मचायागु आराम हे बांलाइ। 6 छुं जुयाः व मनू निद्वः दँ तक म्वात धाःसा नं थःगु बांलाःगु अवस्थापाखें वयागु आत्मा लय्मताःसा, वयात छु आराम दइ धकाः? लिपतय् फुक्कं छथाय् हे वनेगु मखु ला? 7 मनूतय्सं दुःखसिया याइगु फुक्क ज्या प्वाः जाय्केत जक खः, अय्नं वयात गुबलें नये पित्याःगु तनी मखु। 8 बुद्धि दुम्ह मनूयात मूर्खपाखें छु फाइदा दइ? मेपिं मनूतनापं थःम्हं गुकथं व्यवहार यायेमाः धकाः सियाः चीमिम्ह मनूयात छु फाइदा जुइ? 9 थःके दुगुलिइ लुधंकाच्वनेगु थःके मदुगुलिइ लोभ यायेगु स्वयाः बांला। थ्व नं सितिं वंगु खँ खः, अले थ्व ला फय्यात लिइगु थें जक खः। 10 छु द हे दु वयागु नां छुइकल, अले मनूत सु खः धकाः थुइ हे धुंकल। थः स्वयाः बल्लाःम्हय्सित सुनानं विरोध याये फइ मखु। 11 गुलि अप्वः खँ जुइ उलि हे उकिया अर्थ कम जुइ। उकिं सुयातं छु फाइदा जुइ? 12 थ्व चिहाकःगु जीवनया छुं हे अर्थ मदुगु इलय्, मनूतय्सं किचः थें थ्व जीवन हनाच्वनी, अय्नं इमित छु खँ बांला धकाः सुनां स्यू? व सिनावने धुंकाः थ्व संसारय् छु जुइ धकाः सुनां इमित धाये फइ? |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.