२ शमूएल 9 - नेवाः बाइबलदाऊद व मपीबोशेत 1 दाऊदं न्यन, “छु शाऊलया घरानाय् बचय् जूम्ह सुं दु ला, वयात जिं जोनाथनया कारणं माया याये फइ ला?” 2 शाऊलया घरानाय् सीबा नांयाम्ह छम्ह च्यः दु। वयात दाऊदं सःतके छ्वल। जुजुं वयात न्यन, “छु छ सीबा खः ला?” वं लिसः बिल, “खः, जि छिकपिनि दास सीबा हे खः।” 3 अनंलि जुजुं वयात धाल, “छु शाऊलया घरानाय् बचय् जूम्ह सुं दु ला, गुम्हय्सित जिं परमेश्वरया सदां विश्वास याये बहःगु दयामाया क्यने फइ ला?” सीबां धाल, “स्वयादिसँ, जोनाथनया छम्ह काय् म्वाःगु दु। बरु व निपा तुतिं खुत्यांम्ह खः।” 4 जुजुं न्यन, “व गन दु?” अले सीबां लिसः बिल, “व लो-देबारय् अम्मीएलया काय् माकीरया छेँय् दु।” 5 अले जुजुं मनूत छ्वयाः वयात लो-देबारं अम्मीएलया काय् माकीरया छेँनं सःतके छ्वल। 6 जोनाथनया काय्, शाऊलया छय् मपीबोशेत दाऊदयाथाय् वल। अले वं क्वछुनाः जुजुयात भागि यात। दाऊदं वयात धाल, “मपीबोशेत!” वं लिसः बिल, “धयादिसँ, जि छिकपिनि दास थन हे दु।” 7 दाऊदं धाल, “ग्याये मते। जिं छन्त छिमि अबु जोनाथनया कारणं दया याये। जिं छिमि बाज्या शाऊलया जग्गा छन्त लितबी। अले छ जिनापं न्ह्याबलें हे टेबिलय् च्वनाः नयेगु जुइ।” 8 मपीबोशेतं हाकनं क्वछुनाः भागियानाः धाल, “जि सु खः धकाः, छपिन्सं जि छम्ह सी धुंकूम्ह खिचायात वास्ता यनादीयागु?” 9 अनंलि दाऊदं शाऊलया च्यः सीबायात सःतके छ्वयाः वयात थथे आज्ञा बिल, “छिमि मालिकया छय्यात जिं शाऊल व वया घरानाया फुक्क सम्पत्ति बियागु दु। 10 छ, छिमि काय्पिं व च्यःतय्सं वयागु जग्गाय् बुँज्या यानाः उकिं वःगु अन्न छं छिमि मालिकया परिवारयात बीमाः। अले मपीबोशेत, छिमि मालिकया छय् नं न्ह्याबलें जिगु टेबिलय् च्वनाः नयेगु याइ।” (सीबाया झिंन्याम्ह काय् व निइम्ह च्यःत दु।) 11 अनंलि सीबां जुजुयात धाल, “जिमि प्रभु महाराजं थः च्यःयात आज्ञा बियादी थें जि छिकपिनि च्यःनं फुक्क याये।” अथे जुयाः जुजुया काय्पिन्सं थें मपीबोशेत नं दाऊदया टेबिलय् च्वनाः नयेगु यात। 12 मपीबोशेतया मीका नांयाम्ह छम्ह चिधिंकःम्ह काय् दु। सीबाया परिवारया फुक्कं मपीबोशेतया च्यः जुल। 13 अले मपीबोशेत यरूशलेमय् हे च्वनाच्वन, छाय्धाःसा न्ह्याबलें व जुजुया टेबिलय् च्वनाः जुजुनापं तुं नयेगु याइ। व निपा तुतिं खुत्यांम्ह खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.