२ शमूएल 4 - नेवाः बाइबलईश्बोशेतयात स्याःगु 1 अबनेरयात हेब्रोनय् स्यात धयागु खँ न्यनाः शाऊलया काय् ईश्बोशेत ग्यात अले फुक्क इस्राएलीत नं तसकं ग्यात। 2 ईश्बोशेतया निम्ह मनूत दु। उपिं शत्रुतय् शहर लुतय् याइपिं वया सिपाइँतय् नायःत खः। इमिगु नां बानाह व रेकाब खः। इपिं बेन्यामीन कुलयाम्ह बेरोती रिम्मोनया काय्पिं खः। बेरोत नं बेन्यामीननापं हे ल्याः खाःगु दु। 3 छाय्धाःसा बेरोतीत गित्तैमय् बिस्युं वन अले उबलय्निसें उपिं अन हे च्वन। 4 (शाऊलया काय् जोनाथनया छम्ह काय् दु, वयागु नां मपीबोशेत खः। यिजरेलपाखें शाऊल व जोनाथन स्यूगु खबर वःबलय् मपीबोशेत न्यादँ दुम्ह खः। व खँ न्यनाः वया अजि वयात क्वबियाः बिस्युं वंगु खः तर इपिं हथाय् चाचां बिस्युं वंबलय् मपीबोशेत लँय्दयाः खुत्यां जूगु खः। व निपा तुतिं खुत्यां काःम्ह खः।) 5 छन्हु बेरोती रिम्मोनया काय्पिं रेकाब व बानाह, न्हिनय् ईश्बोशेत आराम कयाच्वंबलय् वयागु छेँ दुहां वल। 6-7 अले इपिं छ्व काःवंगु थें यानाः छेँ दुने दुहां वन, छेँ दुने दुहां वने धुंकाः इपिं ईश्बोशेतया क्वथाय् तक वन। अन न्हिनय् आराम कयाः च्वंम्ह ईश्बोशेतया प्वाथय् इमिसं चुपिं सुयाबिल। इमिसं वयात स्यानाबिल अले इमिसं वयागु छ्यं द्यनाबिल। अले छ्यं ज्वनाः यर्दनया ब्यासि जुयाः चच्छि न्यासि वन। 8 इमिसं ईश्बोशेतया छ्यं हेब्रोनय् दाऊदयाथाय् हल। अले जुजुयात धाल, “छितः स्यायेत कुतः याःम्ह छिकपिनि शत्रु शाऊलया काय् ईश्बोशेतया छ्यं थन दु स्वयादिसँ! परमप्रभुं शाऊल व वया सन्तानतय्त छिगु निंतिं बदला काःगु दु।” 9 दाऊदं बेरोती रिम्मोनया काय् रेकाब व वया किजा बानाहयात लिसः बिल, “धात्थें परमप्रभु म्वाःम्ह खः थें, सुनां जितः जिगु फुक्क कष्टपाखें छुतय् यानादिल। 10 शाऊल सीगु बां हे लात धकाः जितः खबर ब्यूवःम्ह मनूयात ज्वना, अले जिं वयात सिक्लागय् स्यानाबिया। वं हःगु खबरया निंतिं वयात जिं अन हे सजाँय बिया। 11 तर मभिंपिं मनूतय्सं छम्ह दोष मदुम्ह निर्दोष मनूयात वयागु हे छेँ थःगु खाताय् हेस्यात धाःसा अझ गुलि अप्वः लिच्वः बी माल! छु जिं आः छिमिसं मनू स्याःगुया बदला कयाः छिमित संसारं नाश यानाः मछ्वय्गु ला?” 12 अथे जुयाः दाऊदं थः मनूतय्त हुकुम यात अले इमिसं इमित स्यात। इमिसं इमिगु ल्हाः व तुति पाल, अले इमित हेब्रोनया पुखू लिक्क यख्खानाबिल। ईश्बोशेतया छ्यं धाःसा इमिसं कयाः हेब्रोनय् अबनेरया चिहानय् थुनाबिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.