१ थेसलोनिकी 4 - नेवाः बाइबलपरमेश्वरयात यय्क म्वायेगु 1 दाजुकिजापिं, परमेश्वरयात यय्क गथे यानाच्वनेमाः धयागु खँ ला छिमिसं जिमिगुपाखें स्यना काये धुंकूगु हे दु। छिपिं उकथं हे जुयाच्वंगु नं दु। छिपिं थुकथं हे अज्जं न्ह्यज्यानावने फयेमा धकाः जिमिसं छिमित प्रभुया नामं बिन्ति यानाच्वनागु दु। 2 जिमिसं स्यना थकागु वय्कःयागु अधिकारयागु खँ छिमिसं सि हे स्यू। 3 छिपिं पवित्र जुयाच्वनेमा धयागु हे परमेश्वरया इच्छा खः, उकिं छिपिं व्यभिचारं तापाक च्वँ। 4 छिपिं फुक्कसिनं थः कलाःलिसे पवित्र जुयाः बांलाक हना च्वनेमाः। 5 परमेश्वरयात म्हमस्यूपिं थें मभिंगु मतिइ तयाः मखु। 6 थ्व खँय् सुनानं थः दाजुकिजापिन्त स्यंके मते। परमेश्वरं थथे याइपिन्त तःधंगु सजाँय बियादी। जिमिसं न्हापा हे छिमित थ्व खँ बांलाक धायेधुन। 7 परमेश्वरं झीत अशुद्ध जुइत मखु, बरु पवित्र जुइत सःतादीगु खः। 8 उकिं सुनां थ्व खँ न्यनी मखु वं मनूयागु मखु, बरु छिमित पवित्र आत्मा बियादीम्ह परमेश्वरयागु हे खँ मन्यंगु जुइ। 9 आः छिमित थःथवय् माया यानाच्वनेमाः धकाः जिमिसं च्वया च्वनेमाःगु मदु, छाय्धाःसा थ्व खँ ला छिमित परमेश्वरं हे स्यनादीगु दु। 10 अथे ला छिमिसं माकेडोनियाय् च्वंपिं दाजुकिजापिन्त धात्थें हे माया यानाच्वंगु दु। छिपिं अज्ज नं थुकथं हे न्ह्यज्याना हुँ धकाः जिमिसं छिमित धयाच्वनागु दु। 11 जिमिसं छिमित न्हापा हे धया थें सुं लिसे हाला जुइ मते, थःगु ज्या मन तयाः या, अले थःगु हे ल्हातं ज्या यानाः नयेगु कुतः या। 12 थथे याना जूसा छिमित मेपिन्सं नं हनाबना तइ। अले थःत मालीबलय् सुयागु नं ख्वाः स्वयाच्वने माली मखु। प्रभु झायादीबलय् छु जुइ? 13 दाजुकिजापिं, सी धुंकूपिं विश्वासीतय्गु खँ नं छिमित कने। आशा मदुपिं मनूतय्सं थें छिमिसं नुगः मछिंके मते। 14 येशू सिनाः हानं म्वानावल धकाः ला झीसं विश्वास यानाच्वनागु दु। अथे हे वय्कःयात विश्वास यानाः सिनावंपिं मनूतय्त येशू नाप परमेश्वरं ब्वना यंकादी धकाः नं झीसं विश्वास यानाच्वनागु दु। 15 प्रभुं धयादी थें जिमिसं स्यनाच्वनागु खः। प्रभु झायादीबलय् झीपिं म्वानाच्वंपिन्सं सी धुंकूपिन्त गुगुं कथं नं लिलाके फइ मखु। 16 प्रभु स्वर्गं क्वहां झाइबलय् तस्सःगु सः ताये दइ, तःधंम्ह स्वर्गदूत हाला हइ, अले परमेश्वरयागु तुरही पुया हइ। उबलय् हे ख्रीष्टयात विश्वास यानाः सीपिं मनूत न्हापालाक म्वाना वइ। 17 थ्व हे इलय् तक म्वानाच्वंपिं नं इपिं नाप तुं प्रभुयात आकाशय् नापलायेत सुपाँचय् थाहां वनी। थुकथं झीपिं सदां प्रभु नाप च्वने खनी। 18 अय्जूगुलिं थःथवय् थ्व खँ कनाः साहस बीगु याना च्वँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.