Aisaia 41 - Nobonob Baibel

Yawe Nug Israel ehanadkku

¹ Yawe Nug atte. “Ag danab ah wan miagnu, wan umanu ele, ag uɗippeg, ig oh hettoɗiak abenppa daatta, ag da noolppa daanna, oɗelag qamutna, toettan daan, dahil nai doyeg! Ag daanna, ag akka akka ag oolag ɠagattag aqan, ag da ele nai mattignignu bappaidna, ag da noolppa uɗin daan, ag ahilag nai madippeg doyei! Ig oh qagmeta, aun nug nai genab maditte amu, ig anidtu!

² Aun nug kobol genab tutukku ele dim lamitta haaha, okkai laa aam bedeppa daatte amu, nug nug dabmak metta he, nug yagbak doya aha, ⌊wan kuɗum eɗadkkunu dabmaama hette⌋? Laa nug danab amu he ahom amu, nug wan kuɗum awa, okkai amu eppegppa mette. Ao, laa Nug danab amu he ahom amu, Nug he, okkai amu nug king eɗadtte. Okkai amu nug qep elab nuhigppa wan amu oh he nauhna, gappud bia daatteb. Yo, nug lat nuhigppa king amu oh eɗatte, ag nauhna autna aotteb.

³ Nug king amu eɗatte oolegeg, nug lamatta oiyaya, nug maɗoɗ ele aben kuɗum nug ii gottomppa aakku gotte.

⁴ Aun nug digmak haenppanu uɗie, gemu ele danab ah aun aɗi laa ag dokkulagnu, ag aɗi hekkulagnu ib ag madatte bia, nug okkai imu nug doa, uɗat amu oh hekkunu he hette? Aun nug amu oh gumaama daatte? Am da, Yawe. Da digmak haenppa daami. Da haen gog tekku ele, da amuppa daakkul,” awa aum.

^5-6 Danab ah wan miagnu, wan umanu ele ag ⌊aam bedeppanu okkai amu hette⌋ anidna, ag baɗatteb. Ao, danab ah wan atu umanabnu, ag amu anidna, hahaɗnana daatteb. Ag akka akka qagmena, ag nug ehanidnana, akka akka amelagppa “Ɠagattag daye!” atteb.

⁷ Ge, danab nug kayak hambuppuak dottog haknu doyak okkai ele nug keeke golppa hak danab, nug nug ɠagattag qedatte. Amu danab nug keeke hamappa qinonob tutukku babaitte amu, nug laa nug dottog amu eppegppanab he bette ɠagattag qedatta, “Aib uume!” awa atte. Nug amu anana, nug atte, “Uɗat na hettem am enaib,” ele atte. Nug amu awowa, dottog ha malak daye amu, nug dottog amu na qemanu tutuippa diig qataqette.

Yawe Nug nukka Israel danab ah ehanadkkunu elele

⁸ Wan laappan danab ah ag anam baɗan hetteb, amge Yawe Nug atte. “Ag Israel, ag am dahilad maɗi nid maɗi ah ele daatteb. Ao, ag Jakop buɗub, da ag tituanadmi. Ag am da layal Abraham buɗub.

⁹ Da umanabnu diiatti, ag iguppa daatteb. Ao, da wan batakppanu diiatte hei, ag uɗin, iguppa daatteb. Da ag amelagppa, ‘Ag am dahil maɗi nid,’ ami. Da ag tituanadmi. Da ag ii geɗadmi.

¹⁰ Da ag ele daattem amunu, ag aib baɗappig. Ao, da ahilag Kayak daattem amunu, ag oolag uug nau aib qeum. Da ɠagattag aqatten ehanadkkul. Ao, da hanhan genab tutukku kobol dim lamitten heinne, da eppel naɗiap-ppa ag nena qemananu aɗualadppi, ag ɠagattag aon daaglag.

¹¹ O Israel, danab aun aɗi ag ahilagnu oppoɗilag be amelag kokoɗ ebatte amu, ag Israel ag heppeg, laa amu ag uɗa nak nau guittak ele dooglag. Ao, danab ah ag ag Israel eɗadkkulagnu henan, ag ele ban hetteb amu, ag Israel ag heppeg, ag ii daatteb bia daaglag. Ag mauhkkulag.

¹² Ag Israel ag heppeg, kekeɗ ag iitta mekkulag amunu, ag kekeɗ ahilkad anadkkulagnu laih laih neegkkulag, amge ag ag ii anadmana. Ao, laa ag ag ele ban hekkulag hetteb amu, ag Israel, ag heppeg, ag keeke iinab daatte bia daaglag.

¹³ Keeke anam daakkunu diig am, da am Yawe, da ahilag Kayak daattem. Da ag eppelag naɗiap aɗe ehanadttem. Da ag amelagppa ‘Ag aib baɗappig, da ag ehanadkkul,’ attem.

¹⁴ O ag Jakop buɗub, ag ahilag ɠagattag am maɗuai bia, amge ag aib baɗappig. Ao, ag Israel danab ah ag ahilag ebqak am kuɗum iitta, amge ag aib baɗappig. Da Yawe, da ag ehanadkkul.” Yawe, Nug am ag Israel, ahilag qagaiettakppanu eɗua uhuqaknu ehanittak, Nug ele ag Israel, ahilag Kayak Oppiaawak Ele amu, Nug anam atte.

¹⁵ Amu Yawe Nug imu ele atte. “Antteg! Da heppi, ag Israel ag ahilkad kekeɗ eɗadna autna aoglag. Ag danab nug ee aeg mumuɗaknu keeke palang otala okkaippa hak uɗat amu haaha, nug ee aeg qagmak okkai okkai, qauko bia ha malatte, amubia ag kekeɗ eɗadkkulag. Ag heppeg, ahilkad kekeɗ ag nauhna autna aoglag.

¹⁶ Danab nug ulah ee aeg dappunkkeg iwale ukkaknu uɗat hette, amubia ag Israel ag ahilkad kekeɗ heppeg iitta mekkulag. Ulah ɠagattag ee aeg dappunkkeg mawa, umanab ukke, baula miag ii daatte, amubia ag Israel ag heppeg, ahilkad kekeɗ ag qettoɗna malaglag. Ag miag iinab daamna,” awa atte. Ag Israel, ag ahilkad kekeɗ ag anam daaglag. Ag anam daaglag, amge ag Israel, ag Yawenu oolag gamag ahakku. Ao, ag Yawenu, Nug am Israel dilag Kayak Oppiaawak Ele, Nug ag Israel, ag nuhikkud maɗi nid maɗi ah ele daaglagnu tituanattom amu, ag nuhignu oo gamag ahak huanaknab dooglag.

¹⁷ Amu Yawe Nug atte. “Haen Israel danab ah, ag am danab ah daɗek, keeke iitta ele bia daatteb amu, haen ag le oug mattin ii anidppeppeg, ag le baalag eheɗnab diiebeb, da Yawe, da ahilag unuqittak doyen ehanadkkul. Ao, da, da ag Israel ahilag Kayak, da ag ii uuadpa. Da ag ehanadkkul

¹⁸ Da qauko attan, appa ad keeke ii daatte amu, da appa heppi, le noa gokku. Ao, oolnu noakppa da heppi, le qeppuɗia bak kuɗum daakku. Da heppi, atu taɗakppa le gottu kuɗum daaglag. Ao, atu taɗakppa, wan huana qaɗaiedatte, aben amuppa da heppi, le qeppuɗia bak kuɗum daakku.

¹⁹ Atu taɗakppa da heppi, ad digdig, amuam ad sida, ad akasia, ad mirtel am ad olip ele, ad amu ana bekkulag. Ao, wan meu waknu nakokib elele, appa da heppi, ad digdig, amuam ad pain, ad saiprus, ad fir ele, ad amu aakku bekkulag.

²⁰ Da amu hekkulnu diig am, danab ah oh ag imunu dabmak pehettak aon, diignu tutukku doyak aoglag Amuam, da Yawe, da amu hemi. Ao, da, da Israel dilag Kayak Oppiaawak Ele, da amu hemi.” Yawe Nug anam atte.

Kayak hambuppuak ag ehanittak laa danab ah mattaglagnu elele iitta

²¹ Yawe Nug atte. “Ag ⌊kayak hambuppuak, ag⌋ hettoɗiaknu nai ahilag bappaidna mattieg!” Ao, Yawe, Nug Jakop buɗub dilag king daatte amu, Nug atte. “Ag ⌊kayak hambuppuak, ag⌋ nai ag hettoɗiakppa ehanadtte ele bappaidna, miag mattieg!

²² Ag ahilag nai heppeg, miag atieb, ag aɗi keeke bekkunu daatte ele appeg dootu! Ele amu, ig dabmeta autta aognignu, ig keeke amunu gog tak doognignu amu, ag keeke ba mala ukkom, ag keeke amunu diig madippeg dootu! Iitta dayeb amu, ag butti aɗi, aɗi keeke bekkunu daatte appeg dootu!

²³ Ge, ig ag genab kayak daatteb doognignu, ag butti aɗi, aɗi keeke bekkunu daatte amu, ag appeg dootu! Ag hamu aib daappig. ⌊Ag genab kayak daatteb dayeb amu,⌋ ig baɗadta hahaɗkkunignu, ag keeke okkai naɗi ena, o keeke okkai naɗi nau laa heppeg anidtu!

²⁴ Amge ⌊ag elele iitta⌋. Ag keeke ii daatte bia daatteb. Ag keeke laa hekkulagnu elele iittanab. Aun nug ag dim lamadkkunu dabmak awa dim lamadtte amu, Yawe Nug ⌊kobol amunu⌋ ooppa uuaknab dootte,” awa atte.

Yawe Nug Israel ehanadkkunu tituanattom

²⁵ Yawe Nug atte. “Da laa dabmak metten hei, laa amu nug yawalti uɗitteppanu aakku aha, yag bak doya uɗitte. Ao, da laa, nug appag diig aam bedeppa daatte amu, da laa amu hei aha, nug da unuqiɗtte. Danab laa amu nug danab lekkoh baegppa tabatte, nug amubia danab okkai he nauhtteb. Nug waa keeke hak danab tatam lekkoh baegppa tappe, kaboliak elele daye waa hette, danab amu nug danab okkai dilagppa anam hette.

²⁶ ⌊Da nug amu hekkunu ii hak haenppa ami, amge⌋ ag kayak hambuppuak oolagppanu aun nug digmak haenppa ig imu bekkunu daatte a doomut? Ao, ag oolagppanu aun nug amu mattie doomut amunu, gemu ig, ‘Nug genab mattiom,’ akkunignu elele? Ge, ag oolagppan laa nug anam ii mattiom. Laa nug anukka, kobol imu ii nak haenppa ii mattie doomut. Laa nug ag oɗelagppa kobol imunu nai nakoknab laa iinab doyom.

²⁷ Da dakka, da tatam Sion danab ah amelagppa, ‘Antteg! Israel danab ah ag eɗun uɗiglag,’ ami. Ao, da dakka, da Jerusalem danab ah nai ena amu mattami.” Yawe Nug anam awa atte

²⁸ Yawe Nug anam awowa, Nug kayak hambuppuak dilagnu ele aum. “Da neekki ukke, laa ulum nai meɗakkunu ii anidmi. Laa nug oɗmak dahilnu nob meɗakkunu ele iitta.

²⁹ Antteg! Kayak hambuppuak ag oh am keeke genab iitta. Ahilag hak laa ii daatte. Ag dottolkad ele am keeke genab iitta, ag am ulah bia,” awa atte.