ROMMEI 10 - KARANU KABI SAMTAM

¹ He kangsanamei, gulung mah kamarei sateichii Inii ahnyii jangpii Saraa dato riita khang kalei teinii ahnyiinii keikapyii tei doumatu tang karam jangpiile.

² Inii ahnyiigo sakchyii pyii leile katunii, ahnyiinii Saraa jangpii lungswi kapyii tei bamle, nlenii ahnyii mah lungswi ka- pyii tei kasang swirektai swimakle.

³ Kadapokii Saraa dato kagong kasang kamajyii gotei tisupii mpou mpoumah pwidi fiikalei taiswisii ahnyiinii Saraamah kasang kamajyii kangtei nkang makle.

⁴ Kadapo- chiinii Kristanii kamalum mei hang go tiimajyii pyiitang karam ajai- tingshang mah kalui teile.

Kalei kapyii karing meihang jangpiile

⁵ Mosesnii ryiile katunii, kata hangninanii ajaitingshang taiswisii kasang kamajyii tiisii kaleimei teinii teipaito ringtangle.

⁶ Nlenii kamalum taiswisii kapat kasang kamajyii teinii aitiisii tamle: “Tanii sating gam khiitangpo?” Sii gonyii lung kito tam sulo, tei teinii Kristago poisanale,

⁷ mak-kii “Tanii tok kaki nlai kaga sazyii kang liit tangpo? sii tam sulo.” Teiteinii katai kito Kristago poi- makhiile.

⁸ Nlenii teiteinii kadalesii tampo? godato manangsii, go kathai kito, sateichii golungto samtam tei leile, katunii nyiinii tam ralipyii kalei kamalum samtam teile.

⁹ Ka- daponii nangnii gomwipii Jisugo Bangpii lesii tam mpat lepochiinii sateichii Saraanii mpougo katai kito tiimaringpyii takle katu tei golung kito malum woleponii n-go keipyii tangle.

¹⁰ Kadaponii meinahnii tii- majyii kapyii doutang karam jangpii Ah lungpiinii malumleile, sateichii kaleikapyii karing doutang karam jangpii Ah mwipiinii tam mpat leile.

¹¹ Kadaponii kabi rasam kito tamle, “Mpougo kamalum meihang go tii nrou lakle.”

¹² Kadapokii Jehudimei nei Grikmei kak taam kaki samah kado gale; kadaponii kalei kaga mah Bangpii tei hangniniile, sateichii mpounii mpougo kalat hang go mpoumah kani kahii tei mangou pyiile.

¹³ Kadapokii “Bangpii zei kalat hang go keipyii tangle.”

¹⁴ Nlenii meinahnii malum kasu mpou gotei kada takumpii ahnyiinii latto tangpo? Sateichii ahnyiinii shiisang shiilei kasu mpou gotei kada takumpii ahnyiinii malum wotangpo? Sateichii kabi rasam tei tam kapyiimei gasii kada takumpii ahnyiinii shiiwo tangpo?

¹⁵ Sateichii ahnyiigo langkaipyii suleponii ah- nyiinii kada takumpii kabi rasam tei tam ralipyiiwo tangpo? Ryii kabam aitakumle, “Kabi rasam pung kagongmei mah pitei kadazii kapiinii ngoubipo?”

¹⁶ Nlenii ahnyii hangnii kabi rasam gotei shiipyii makle, kadaponii Isaiyanii tamle, “Bangpii nyii dato shiiwosii tanii malumwo takpo?”

¹⁷ Teipiinii kamalum tei shiiwo kalu kito gongle, sateichii shiiwo kalu tei Krista mah tam rali kapyii kito gongle.

¹⁸ Nlenii Inii n-nhiile, ahnyiinii shiitak makpo? Nle, kasangpii shiitakle; kadapokii “Ahnyiimah roktei sazyii hangki gong tang wotakle, sateichii ahnyiimah samtam tei sazyii pouryii nlai katang tei gongtangwo takle.”

¹⁹ Nlailoisii Inii n-nhiile, Isrelmei- nahnii tiwotak makpo? Kareiki Mosesnii tamle, “Lui kasu hangninii phyiiryiikii kamaimhii matu tang karam sateichii kamang lui hangninii pyiiryii teikii rarhii matu tang karam mah Inii gonyii go tiipyii tangle.”

²⁰ Sateichii Isaiyanii hangkapii lungdisii tamle, “N-gu fiikasumei teinii n-gu doutakle, n-gu khang kasumei dakii Inii mangoupyii takle.”

²¹ Nlenii mpounii Isrelmei kaang kito mpounii tamle, “Katam swikasu sateichii rangkapamei dakii tingna majang Inii gubah hampatsii bamle.”