METIU 19 - KARANU KABI SAMTAM

Nou-naa n-nou katu mah kaang kito ralikapyii

¹ Jisunii aihang ai tamsang sek-kii mpounii Galili kito tat pat tosii Jordan karyii lugangto kalei Judiya sazyiiki tat tutakle.

² Satei- chii meimoinii mpoutai swi wotakle sateichii mpounii ahnyiigo tei kito tii mbipyii takle.

³ Sateichii Farasismei kangkanii mpouda gongsii mpougo ajai jusii n-nhiile, “Sapfiimei hangninanii kaang kata hangninii jangpiinii mpou- nougo n-nou katu ai ajaimakpo?”

⁴ Mpounii khekalatle, “Saroisekto tiikapyiipiinii meinahgo sapfiimei ninado sapwimei tiipyiile,

⁵ sateichii ‘kaang aijangpii sapfiimei hangni- nanii mpou-pwi mpou-pfiigo toi aisii mpou nou gotei kaswisii lungtu tangle; sateichii hangna tei hangninii tiitangle sii tam kabam ai gonyiinii fii makpo?’

⁶ teipiinii ah nei teinii hangna sutakle nlenii hangninii takle, teijangpii Saraanii poi nja kabam tei meikaniido chyii kapak matu sulo.”

⁷ Ahnyiinii mpou dakii tamle, “Teitiileponii, Moses nii n-nou katu mah larek pyiisii mpoupeigo n-nou ailosii kadajangpii kakhatbampo?”

⁸ Mpounii ahnyii dakii tamle, “Gonyii lung katei jangpii Mosesnii gonyiigo n-nou katu mazhiipyii takle, nlenii saroisektonii aitii makle.

⁹ Sateichii Inii gonyii dakii tam leile, mei kata kangkanii mpou-nougo matei kasu jangpii supiinii kaang kata hangninii jangpii mpou-nougo n-nou aisii sapwimei kaki hang- niniigo manou woleponii, mashung maha aitakle. Sateichii n-nou kalei sapwimeigo manou kalu ah teinii mashung maha aitakle.”

¹⁰ Boumeinii mpou dakii tamle, “Sapfiimei hangninii nei mpou-nou kak aitiisii leile leponii, nou tiikasupou bibwile.”

¹¹ Nlenii mpounii ahnyii dakii tamle, “Tam kalei ai meihangnii lu- kaipei womakle, nlenii ai ai Saraanii pyii kabam mei roinale.

¹² Kadapokii kangka pwi moilungto teitiisii lung kalu, sateichii kangkanii meinahnii tiikatu; sateichii kangkanii sating gam sazyii jangpiisii ahnyii roina- piinii nou tiikasu leile. Ai ai lukai kabuimei teinii lukai wolo.”

Jisunii nahmei kachengmeigo satoi kapyii

¹³ Jisunii nahmei kachengmei phyiiryiikii mpou-bah poikai pyiisii riita kaipyii matutang karam jangpii mei kangkanii nahmei kachengmeigo mpouda pang gongle, nlenii boumei teinii ahnyiigo n-gitakle.

¹⁴ Nlenii Jisunii tamle, “Nahmei gotei guda gong matulo, ahnyiigo nam sulo, kadapokii sating gam sazyii tei aikakum mei mahle.”

¹⁵ Sateichii mpounii ahnyii phyii- ryiikii mpou bah poikai pyiitakle, sateichii teibam kiteito tat tutakle.

Mah kani rahang kaleimei hangninanii kalui kaga karing fiikatu

¹⁶ Sateichiijulo, mei hangninanii mpouda tatpisii tamle, “Madhiika- pyiipii, Inii kalui kaga karing doutang karam jangpii kadapei tha kabi tiitangpo?”

¹⁷ Teito Jisunii mpou dakii tamle, “Kabi mah kaang kito nangnii kadajangpii gudato n-nhii leipo? Kabi teinii hangninii roile, nangnii karing bamni tei liitnyii leponii, kakhatsam hangtei swi wolo.”

¹⁸ Mpounii Jisudakii tamle, ‘Ka- dapei kakhatsam?’ Sateichii Jisunii tamle, “Meigo gisulo, mashung maha sulo, mei mah raga sulo; kasang kasu sakchyii pyii sulo,

¹⁹ gopwi go pfiigo sadzyii ngariit tiilo, sateichii goki tiinaniipameigo nangnii goroinapii n-go lungkasyii takumpii lungsyiilo.”

²⁰ Rahang kaleipii teinii mpou dakii tamle, “Ai hang ai Inii swi wotakle, Inii kadapei tiimakpo rei?”

²¹ Jisunii Mpou dakii tamle, “Nangnii bimatui bimasangnyii lepo- nii, tat tulo gomah kabam hangtei maa joisii mah kagameigo pyii ailo, teitiileponii nangnii sating gamto kani kahii tei doutangle; sateichii gonglo, gutai swi wolo.”

²² Rahang kaleipii tei ai shii wosek-kii mpou swi kamagesii tat-tu takle; kadapokii mpounii mah hangkapii nile.

²³ Jisunii mpou-boumei dakii tamle, “Inii gonyii dakii kasangpii tam leile, mah kanimei hangninanii sating gam sazyiiki liit tang karam ai hangkapiinii hungle.

²⁴ Nlailoisii Inii gonyii dakii tam leile, mah kanimei hangninanii sating gam sazyiiki liit tang karam sungnii poutungki kounah hangninanii mahum-mi kito joupat katu teinii malabwile.”

²⁵ Sateichii boumeinii teitei shii wosek-kii, ahnyii tei hangkapii sung gasii tamle, teitiileponii, “Tanii keikapyii karing tei dou wotangpo?”

²⁶ Jisunii ahnyiigo jusii tamle, “Meinah jangpiinii ai ai tiipei wolakle, nlenii Saraa jangpiinii mahlyii hang tiipei wobuile.”

²⁷ Teito Pitarnii mpougo tamle, “Julo, nyiinii mahlyii hang toi aisii gotai swi wotakle, Saraanii nyiigo kadapei pyiitangpo?”

²⁸ Jisunii ahnyii dakii tamle, “Inii gonyii dakii kasangpii tam leile, Kasatai sazyii pouryii kiteito meinah sapfii mpou teinii mpoumah pumtei kava sagong bamki kabam tinglang kitei gutai swikalu gonyiido sagong- bam keariisiinakhii gamtei bamsii Isrelmei mah Lui keariisiinakhiigo samtak tiitangle.

²⁹ Sateichii guzei jangpii kihang mak-kii sanamei hang mak-kii taipwimeihang, mak-kii pwi-pfii mak-kii nahmei mak-kii lu hang kado toi kalei meihangnii tei njai mazhii-hai doutangle sateichii kalui kaga karing tei pyiitangle.

³⁰ Nlenii karei mei hangkanii natu tangle, sateichii kanamei teinii reitu tangle.