GALATIMEI 5 - KARANU KABI SAMTAM

Gonyii rangra katii tei jumatoulo

¹ Mpou rangra tiimatu tang karam jangpii Kristanii nyiigo laat mpatpyii takle, tei jangpiinii tiigat- piinii satlo, sateichii kikalei mah kamaswi pot tei pungloi sulo.

² Julo, Pol, Inii gonyii dakii tam leile, katunii, gonyiinii tiigyii kama- lem tei douleponii, Krista ai gonyii jangpii kabi tiitang karam samah kado gatangle.

³ Nle, tiigyii kamalem meihang dakii Inii nlailoisii sakchyii pyiileile, katunii, mpounii ajaiting- shang mpum madum tei ryiitang karamle.

⁴ Ajaitingshang paikito tiimajyii tiimatwi pyii matu tang karam jangpii mahungsii tiisii kalei gonyii Krista dato tak ndang gatakle, gonyiinii jumage kapyii kiteito kougatakle.

⁵ Kadapokii nyiinii rangii paito kamalumpii kasang kamajyii mah maning kamalum jangpii koileile.

⁶ Kadapokii Krista Jisu dato tiigyii kamalem mak-kii tiigyii malem kasu teipii mah kado tham kaki gale. Nlenii lungkasyii paito tha tiikalei kamalum teile.

⁷ Gonyii bisii tiisii leile, kasang gotei swi matulak tang karam jangpii gonyiigo tanii dang leipo?

⁸ Kahem ai gonyiigo lat kapyii mpou dato makle.

⁹ Ahee chengnakapii athoknwikang hang gotei pung matu wole.

¹⁰ Gumah lungswi tei supii lungswi kaki tei gonyiinii poilakle katu Inii Bangpii zei kito malumle, nlenii gonyiigo tii- magesii kalei ahtei, kata kata kado mpoumah samtak katii tei doutangle.

¹¹ Nlenii kangsanamei, aitoi katangpii tiigyii kamalem tei tam ralipyiisii leileponii, kadajangpii n-gu aitoi katang tiikamagesii leipo? Teileponii kroshnii doikadang tei mpat takle.

¹² Gonyiigo tiikamagesii kalei ahnyii gotei tiigyii kamalem doito kisii pum katangdo rum ndang aileponii Inii lungtei saat tangle.

¹³ Kadaponii kangsanamei, Go- nyiigo rangra tiimatu tang karam jangpii Saraanii lat totakle; pum- zainii kamarei ka-ntha tiitang karam jangpii gonyiimah rangra katii tei jum sulo, nlenii lungkasyii kito hang- ninanii hangninii mah anga ngalo.

¹⁴ Kadapokii ajaitingshang mpum madum ai kakhatsam hangninii kikii fii-ndwi bamle, teinii “Goroinapii n-go lungkasyii takumpii goki tiinanii- pamei hang go lungsyiilo.”

¹⁵ Nlenii gonyii hangninanii hangniniigo saram kounah takumpii kamakisii chiitoi kati tiisii leileponii, machyiigat wolo, suleponii gonyii hangninanii hang- niniigo tiimagakat aitangle.

Rangii kamateinii chyiikatat

¹⁶ Nlenii Inii tam leile, rangii paito tatlo. Sateichii pumzaimah ka- marei ka-ntha tei tiisulo.

¹⁷ Kada- pokii pumzai mah kamarei ka-ntha teinii rangiigo mazhii makle, sateichii rangiimah kamarei ka-ntha teinii pum zai go mazhii makle. Ka- dapokii gonyiinii kamarei kamarei tei tiimatulak tang karam jangpii, hangna ai hangninanii hangninago mazhii makle.

¹⁸ Nlenii gonyiigo rangiinii chyiitat pyiileponii, gonyii ajaitingshang kaang nkang makle.

¹⁹ Pum zaimah tha hangteinii aitiisii matitu leile: sapwimei sapfiimei kashyii kahong tha katii, matei kasu, mei jaitingshang kasu,

²⁰ tingtugo kariita, riikuhii kajum, kangourou katu, n-gi razyii kapat, kamaimhii kati, kararhii katu, mpoujangpii kamaning, njairiit riit katu, kagu kaphang katii,

²¹ kabigo kathairou katu, jou sak kapiinhii, jou sakmaga katu sateichii tei kakum njoi tha tiisii kaleimei hang teinii, Saraamah sating sazyii tei doulak lesii Inii gonyiigo asungto kakhatsii katam takumpii Inii gonyiigo kakhatsii tam leile.

²² Nlenii rangiimah riiti teinii, lungkasyii, ka-nta, kamajung, lung leh kati, lungsyii kati, kabi, maning makhang wokabui,

²³ lung kamanoi, mpouroinapii mpoupumgo jum kati, tei kakum hang phyiiryii teikii, mazhii kalak ajaitingshang gale.

²⁴ Sateichii Krista Jisudato kaleimei hangnii pum tei mpoumah marei majang ninado kamarei ka-ntha hang njasii krosh gamkii gi aitakle.

²⁵ Rangii paito nyiinii tatdo tatle.

²⁶ Nyiinii matapii mpou mpou det disii, hangninanii hangniniigo kara- rhii katu, katairou katu tei tiisuleje.