1 KORENMEI 3 - KARANU KABI SAMTAM

Saraa mah kikaleimei

¹ Nlenii kangsanamei, Inii gonyii dakii rangii doukalumei dakii katam takumpiinii tampei wolakle, nlenii pumzai pungkalei mei dakii tam kalei takumpii, Kristenmei mah kamalum kito kacheng nahmei dakii tam kalei takumpii tam leile.

² Inii gonyiigo ranadwipiinii pyiichii leile, katei chiitak pyiichii makle; kada- pokii gonyiinii teitei chii kadou- makle, nle, gonyiinii aitoi katangpii tiida makle;

³ Kadaponii gonyii aitoi katangdo pumzai kito leile, kadapokii gonyii kak kito kamaimhii sateichii n-girazyii kalei tei teipii, gonyii pum zaimei makpo, sateichii meidamei takumpii gonyiinii tatlei tak makpo?

⁴ Kadaponii mei kangkanii, “Inii Pol mahle” sateichii kaki hangninanii, “Inii Apollos mahle” sii tamsek-kii, gonyii ai sazyii pouryiimei tak makpo?

⁵ Teitiileponii Apollos ai tapo? Sateichii Pol ai tapo? Ki kaleimeile, ahnyii paikito gonyiinii malum wotakle sateichii Bangpiinii ahnyii mei nsang nsang dakii pyiikabam takumle.

⁶ Inii lingkaile, Apollosnii dwi kajuile, nlenii Saraanii pokpat matule;

⁷ teitii leponii lingkakai sateichii dwi kakajui mei tei samah kado makle, nlenii pokpat matu katu Saraa tei roiniile.

⁸ Ling kakamei ninado dwi kakajuimei tei masamle sateichii mei nsang nsangnii ahnii katii tha taiswisii ah mah pum- jangmai tei doutangle.

⁹ Kadapokii nyiinii njoisii Saraa mah tha katiimeile; gonyiinii Saraa mah lubam, ninado Saraa mah ki teidole.

¹⁰ Gudakii pyiikabam Saraamah jumage kapyii taiswisii, kasakai ki katii apum hangninii takumpii Inii kibangmaa tei tiimakhiile, sateichii mei kaki hangninanii tei phyiiryiikii ki tiimakhiile. Nlenii meihangnii tei phyiiryiikii kada takumpiinii tiima- khii tangposii machyiigat matulo.

¹¹ Kadapokii tiimakhii kabam bangmaa, katunii Jisu Krista; teisupiinii mei kaniido ki bangmaa kaki tiimakhiipei wolakle.

¹² Satei- chii mei kangkanii ki bangmaa phyii- ryii teikii sanapii, sana raguibapii, mai kating kuitupii, tingpii, hiinhiipii, ragoupii, tiimakhii leponii, mei nsang nsang mah tha tei mangou tangle;

¹³ Kadapokii Krista mah leimik piinei teitei mangou tangle, kadapokii teitei mipiinii tam mangou tangle sateichii mei nsang nsangnii tiikabam tha tei kadapeipo katu mipiinii ruju tangle, sateichii ah mah tei kabimanii kashyiipo katu tei mangou tangle,

¹⁴ mei kata hangni- nanii ki bangmaa phyiiryiikii tiima- khii kabam tha tei mashak leponii, ahnii alangh doutangle.

¹⁵ Sateichii mei kata hangninii mah tha tei rutoi aileponii, ah jangpii kagatei tangle, nlenii ah pum gonii keipyii tangle, teitii kido milungto nlek kalu takumpii keikapyii tei doutangle.

¹⁶ Gonyiinii Saraa mah kamatei Saraa kamaning kile ninado Saraa- mah rangiinii gonyii lungto leile katu gonyiinii timakpo?

¹⁷ Mei kata kang- kanii Saraamah Saraa kamaning kitei tiimaga aileponii, ahgotei Saraanii tiimaga tangle. Kadapokii Saraamah Saraa kamaning ki teinii kamateile, sateichii teimah Saraa kamaningki tei gonyiile.

¹⁸ Mei kaniido ah roinapiinii ahgo schoi choi matu sulo; gonyii kak kito aiha ki aito mei kata hangninanii ah ai sakailesii maning leponii, ahnii sakai tang karam jangpii ahnii maning matulo.

¹⁹ Kadapokii sazyii aimah swirek kabi teinii Saraa doito kamangle. Kadapokii aitiisii ryii- bamle: “Kasakai meigo ahnyii mah kasakai kito Saraanii maaile.”

²⁰ Sateichii nlailoisii, “Kasakai mei swi tei kadakle katu Bangpiinii tile.”

²¹ Teijangpiinii meinahnii kadapei tiibuipo katu kaang kito mei kaniido detdi matu sulo.

²² Kadaponii mahlyii hang gonyii mahle, Pol kido, Apollos kido, Kaifas kido, sazyii pouryii kido, katai kido, karing kido, tinglang aitoi kido, gongtang karam tinglang kido mahlyii hang gonyii mahle;

²³ sateichii gonyiinii Krista mahle; sateichii Krista mahle; sateichii Krista teinii Saraa mahle.