Sɛɡla 10 - mzwDBL

Kooro Solomɔn sɛɡla

¹ Kooro Solomɔn sɛɡlaa teŋa nɔ. Bechawejereme ɡelɔ o mɛɛ baŋa ɛɛ pa, kɛ bechaɡɛne te ɡelɔ o nya loo ɛɛ ku.

² Wechɔɡa ŋwɛnɛ kpɔe dɛ́ dɔ kondɔɔh ta tɔnɔ bɛlbwa dɔe, kɛ dɛ he waa toɡraa, a dɛ lee seo ta.

³ Korowii aa ɡel lɔr kpo nɛn o wa aa toɡra. O lɔ nɛnchɔɡe konnyini dɛɛ ta.

⁴ He dɛ ɛ bɔhwaah aa, nyae hɛɛ nya, kɛ dɛ he dɛ ɛ toma tenaa, kwaa hɛɛ dɔ.

⁵ Wejereme dɛ́ komɛ o koo kwaa a koma saŋ, kɛ nɛn waa dɛ́ chɔ kwaa koma saŋ te dɛ́ di sihiih.

⁶ Nomɛlbwa swee andɛɛɡa dɛɛ tɛ nɛn o wa aa toɡra, kɛ nɛnchɔɡe te mur, waa yoi waa bol á le baŋ.

⁷ Nɛn o wa aa toɡra na som, baa o waa soh, kɛ nɛnchɔɡe te waa won soeh warane.

⁸ Wejereme dɛ́ no jae, kɛ nɛn waa dɛ bol ɡɛnewaa te waa dɛ ɛ pɛɛpɛɛ.

⁹ Nɛn o wa aa dɔ kasinteŋ la, o wobɛlbwa dɛ́ do wer, nɛn o wa aa wola sie chɔ te, ba dɛ nao.

¹⁰ Nomɛlbwa waa dɛ tɔ kasinteŋ ta la dɛ́ ba waa ne, kɛ nɛn waa dɔ bambile dɛɛ bol waa la, o dɛ ba deŋnesɔɔhna ne.

¹¹ Nɛn o wa aa toɡra wobol dɛ́ ba mkpa ne, kɛ nɛnchɔɡe te mur, waa yoi waa bol á le baŋ.

¹² Che kaɡraree dɛɛ ba tim kaɡrare tae ne, kɛ nɛnnyin te dɛ́ tɔ wechɔɡa ta.

¹³ Wejereme wobol binii wejema do, kɛ ɡɛne te, lɔɔraa baa lɔɔro.

¹⁴ Wejereme dɛ hweli wa, dɛ kpɔ dɛɛ do o nyu bini, kɛ nɛn waa ɡɛna wobol te, dɛ ba waa ne.

¹⁵ Dɔɔh suuɡaa dɛɛ tɔɔ ɡbemɡbe, kɛ nyaa te, o nyae dɛ́ kaa o ne chɔɡa ta.

¹⁶ Nɛn o wa aa toɡra kembɔree mkpa, asɛ wechɔɡ-ɛɛ we-ɛɛla ɛɛ ba wechɔɡa ɡbo ne.

¹⁷ Nɛn waa cheɡ deŋne dɛɛ no jae la dɛ́ biɡri, kɛ onɔ la waa wola o wechɔɡa sɛh la dɛ́ dɔ wa.

¹⁸ Nɛn waa hah o dɔŋ dɛɛ tɔh la ɛ nyosonteŋni, asɛ nomɛlbwa waa dɛ taa nyokpɛl la ɡɛnɔ.

¹⁹ Wobobala te bɛlbwa dɛ koni, asɛ nɛn waa won o nyoa lawa la jemɛ wa.

²⁰ Nɛn o wa aa toɡra wobol do kɛŋɔ suuɡapoŋ tenten, kɛ nɛnchɔɡe te liire ɛ wepuu.

²¹ Nɛn o wa aa toɡra wobol dɔ tɔnɔ dɛɛ tɛ nɛndamanta, kɛ ɡɛne te, liire waa wola dɔe la, dɛ́ kaa o ne seo ta.

²² Korowii swee andɛɛɡa tɛɛ naa, a dɛ ba kondɔɔh ne, wenaale bɛlbwa aa a ta ja.

²³ Gɛne siee dɛɛ lɛ wechɔɡa ta, kɛ nɛn waa dɛ no waa mun te, o sie dɛ lɛ wejemwaa ta.

²⁴ Waa nɛnchɔɡe aa dɛ ɔmɛ la, a dɛ ba o nɛ, kɛ nɛn o wa aa toɡra te, dɛ́ dɔ kon waa dɛ nyin.

²⁵ Wekpeɡa pu wechɔɡ-ɛɛ aa, o dɛ sewɛ, kɛ nɛn o wa aa toɡra te, o dɛ do le saŋ bɛlbwa.

²⁶ Gɛ konnyɛɡa aa dɛ nyɛɡ nyena, asɛ ninchuu ɡe ɛɛ we sie la, ɡɛɛ nɛn waa dɛ ɛ bonyɛɡa do tɛ nɛn waa tomɔ. Waa on bansɔɔhna tɛ.

²⁷ He dɛ ɔmɛ Korowii aa, he dɛ biɡri, kɛ he dɛ ɛ wechɔɡa aa, haa he saŋ tel.

²⁸ Kon nɛn o wa aa toɡra aa dɛ hwɛɡɛ o ta la, ɛ silɛɛ kon, kɛ nɛnchɔɡe te hwɛɡa dɛ́ ɛ pɛɛpɛɛ.

²⁹ Korowii kpɔ nɔn dɛɛ tɔ nɛra ba wa aa toɡra nɛ, dɛɛ chɔɡ banɔ la baa dɛ ɛ wechɔɡa.

³⁰ Nɛn o wa aa toɡra dɛ́ so deŋnesɔɔhna ta, kɛ nɛnchɔɡe te, baa doŋu le o harɛ ta.

³¹ Nɛn o wa aa toɡraa dɛɛ bol nɛmbiwa, kɛ nɛn o nyondoŋe aa bar o nyu te waa dɔ jaɡa.

³² Nɛn o wa aa toɡra wobol dɛ́ sɔɔh baah, kɛ nɛnchɔɡe te, o wobol dɛ muɡli baah.