Jeremia 14 - mzwDBL

Hwel ne lɔr dɛ laa wa

¹ Waa Korowii aa bol men Jeremia be, hwel bɛl waa dɛ́ ba cheɡa waa nɔ. O ŋɔ,

² “Juda harɛ nɛra dɛ wi, o bwɛjena nɛra bwara ɛɛ nyɛɡ, ba chɔ harɛ di suna dɛɛ ɡbaɡre, harɛ la chɔɡa wa, asɛ Jerusalam tena wi dɛɛ nyin chae.

³ Nomonjena tomɛ ba bonɔɔna ŋɔ bá ka nyin ne. Ba la kwaa aa won nee lɛɛ ta ba ta nee nae. Ba kpɔ ba polviine berɛ ba pɛɛ, ba bambile chɔɡɔ ba hwɛɡa ta pɛɛ, dɛ kpɔ kwaa bɔle nyuune, a baɡle kɛŋɔ ba loo kuu.

⁴ Harɛ la holɔ dɛɛ peɡri dɛkalkɛ bwaala aa nɛ, asɛ paara bambile chɔɡ, dɛ kpɔ kwaa bɔle nyuune, a baɡle kɛŋɔ ba loo kuu.

⁵ Hale kweɡlinee chwao ɡel o bifola, dɛkalkɛ kpɔɡa toole ó chwe.

⁶ Kpɔɡ bini keeɡore cheɡɛ deŋɡarere dor, dɛɛ hɛɡɛ kɛŋɔ kalampoŋare ken, aa won na kɛrɛdɛ dɛkalkɛ kpɔɡa toole á chwe.

⁷ N nɛra wio dɛɛ noo mɛ dɛ ŋɔ, ‘N Naa Korowii, a lole kɛŋɔ ya wechɔɡa ɡelɔ ya di bolchɔɡe, koh he sɔndɛɛɡe la wa dɛ́ cha yaa. Dɛkalkɛ ya ɛ wechɔɡa dɛ jo he nɛ, dɛ berɛ habɔɔ kpoe kohona.

⁸ He ɡbo nɛɛ ya Israel tena sie dawɛ, he ɡboo lɛ yaa dɛɛ le wenaale ta. Ɛrɛɛ he do kɛŋɔ hɔɔh harɛ nɔ ta kɛɛ nɛŋkaa waa baa so ya bini tɔpebeŋkpoŋ ɡbo nɔɔ?

⁹ Ɛrɛɛ he do kɛ nɛn waane aa piɡru, kɛɛ banyoo waa wola kpeɡe dɛ́ won lɛ o nɛra nɔɔ? N Naa Korowii, kasinteŋ he ja ya nɛ, he sɔn dawɛ ya nɛ, anomanta, bɛ yaa vɛh.’ ”

¹⁰ Korowii bol nɛra nɔ waa ŋɔ, “Ba dɛ nyin bá chwa le n be, dɛ́ kaa valɛ bobɛlbwa baa dɛ nyin. Anomanta, men Korowii sie aa ba nɛɛ lɛ, mɛɛ lii ba wechɔɡa baa ɛa waa dɛ́ tɛr ba deŋne.”

¹¹ Belaa Korowii ŋɔ men Jeremia be ŋɔ, “Dɛɛ berɛ wedɛɛɡa soŋa dɛ́ tɛ a ɡɛ nɛra nɔ.

¹² A lole kɛŋɔ ba dɛ vɔwɛ nyoa, kɛ maa wii baa wia dɛɛ noo mɛ laanee no. Ba fuh sarahare dɛ ɛ mea sarahare dɛɛ tɛ mɛ, kɛ n sie aa a ta lɛ. Anomanta, mɛɛ ɡeloo bá kpoo ba laa ta, ásɛ lɔr ne weechɔɡa ɡe kpoo ba.”

¹³ Anee n ŋɔ, “Nemenɛ Korowii, keamere la bane teŋɔ dɛɛ bol nɛra la be ŋɔ, baa laa kɛɛ lɔr bɛlbwa nae ba, dɛkalkɛ ba ŋɔ he baɡ ba nyoa ŋɔ deŋnesɔɔhna ɡboo dɛ́ do ya harɛ nɔ ta.”

¹⁴ Belaa Korowii ŋɔ n be ŋɔ, “Keamere la teŋe nyosone dɛɛ bol wa n sɔn ta. N ta ban tomɛ kɛɛ dɛ lee ba, n ta wobɛlbwa ɡe bolɛ ba be. Waa baa dɛ na chaahna ta, ne anɔ la aa chiɡ kerekere, dɛ voɡa toma waa baa dɛ bol la bwa ɛ waa ba ɡbaɡba aa liira.

¹⁵ Anomanta, waa men Korowii aa dɛ bol keamere baa dɛ bol waa n sɔn ta dɛɛ teŋe nyosone laanee nɔ. N ta ban tomɛ, kɛ ba dɛ bol ŋɔ laa kɛɛ lɔr aa harɛ nɔ taa ba. Kɛ a ɡɛ keamere la, baa kpoo ba laa taa, lɔr ɡe kpo ba, ba serewe.

¹⁶ Laa ne lɔr la nomanta, nɛra baa bol ɡɛ waa nɔ baɡ ba la ɡe ɛɛ serewoo, ásɛ ba paa ba ta Jerusalam fɔɡbaahna. Nomɛlbwa aa lee do dɛ́ huɡe ba ne ba haahna ne bibaala dɛ bihaahna bwa. Mɛɛ ɡeloo ba dɔ ba nyubinikpeɡ baa ɛa la kembɔr kɛrɛdɛ.”

¹⁷ Korowii do mɛ ŋɔ, ń bol n suna maa dɛ di waa ba be ŋɔ, “Siniire dɛ yɔɔ mɛ chɔɔ ne jwaana bwa aa wola tonɛ, n nɛra maa dɛ nyin ba, kɛŋɔ bitolo waa wola baa bɛlbwa jemɛ, ba doo bol kohona la wa.

¹⁸ N leɔ kaa kpɔɡ bini naa, n dɛ na nɛra baa kpoo ba laa ta, n berɔ ba bwɛjen la bini ɡe aa, n dɛ na nɛra lɔr aa kpo ba ba serewe. Korowii keamere ne sɔfore bwa lɔ harɛ la ta, baa jemɛ waa Korowii aa ŋɔa bá ɛ.”

¹⁹ Nɛra la bɔɔrɔ ŋɔ, “N Naa Korowii, he deno vɛh Juda tena kwaraa kɛɛ? He hah Saayɔn tena ɡe aa? Ɛrɛɛ he do yaa bola yaa wola won dɔ chaeh nɔɔ? Ya fe dɔ hwɛɡa kɛŋɔ yaa dɔ deŋnesɔɔhnaa, kɛ yaa wedɛɛɡa bɛlbwa na, dɛɛ nyiŋi kɛŋɔ ya dɔ chaeh saŋ bɛl, kɛ waa aa do ɔma kohona ɡboo yaa na.

²⁰ Ya na ya wechɔɡa ne ya naawa bolchɔɡe baa dia, ya bwa ɛ wechɔɡa dɛ jo he nɛɛ kohona.

²¹ Lii nyoa haa baɡɛ yaa la, dɛ bɛ yaa nyiŋi vah, bɛ ɡel Jerusalam tena di sihiih, belaa he kookara che dɛ dɔ jirima la. Bɛ fɔo ya ne haa fɔwa la chɔɡ.

²² Harɛre voɡare aa wola tɔnɔ bɛlbwa dɔe ɛɛ won ɡel bwaala nɛ aa? Nyundua ɡe ɡbo ɛɛ won ɡel bwaala wir aa? Akai, hen Korowii yaa dɛ tomɛ ɡbosoroo dɛ won ɛ. Ya hwɛɡa bwa lɔ he nɛ, dɛkalkɛ he ɡboo wona dɛɛ ɛ ɡɛ waa nɔ bwa.”