Nkyɛʼə 15 - Mɨkan wu Fi

Ɨtsendá Ŋwi tsa tsɨ Yénɨ́ nɨ Ngɨ́ʼ tsa tsi Samba lá

¹ Ma tíʼ ndzɛ́n alɨgɨ zə kɨʼnɨnɨ zə mɔʼɔ zə tse a fɔməbvurə a faŋ nkɨ mbe zə yerɨnə. Ɨtsendá Ŋwi tsi samba tsi ɨwu abɔʼnɨ ngɨ́ʼ tsi samba, mbe ngɨ́ʼ tsə ntsɨrɨndzum, mbɨ́ʼ ngə́ a nɨ ndwɨgɨnɨ ndzum ndóm wa Ŋwi a diʼnə a mɨlwi ɨyi ɛ.

² Ma tíʼ ndzɛ́n azúm zə tsɛrə za a fínɨ́ a sagɨrə wu ngwi wa bɨ nyɛtɨnɨ nɨ ntsəŋ ɨləŋ wa ɨmugɨ kɨ́nə́ nkwárə́ wə mu ə. Ma kɨ́ nkwiʼ ndzɛ́n ɨbɛn ba bɨ gháʼnɨ́ ɨnyam mɨbaʼ za abɔʼnɨ mu abe ɨyi nɨ ɨnyam mɨbaʼ za nkwaʼə zɨ tse lɔ́gɨ́nɨ́ adiʼ a ɨkum ɨyi lá. Bo tɛ́mkɨ́ a ngə́rɨ́ sagɨrə wu ngwi wa bɨ nyɛ́tɨ́nɨ́ nɨ ntsəŋ ɨləŋ lá, ntiʼtɨ mɨloŋ mɨ aŋantɨ ma a ghánɨ́ Ŋwi a mbó bo

³ ndzɔbɨ nkyi wa Mǒse ngaŋ afaʼ Ŋwi a zɔ́bɨ́nɨ́, nkɨ mbe nkyi wa Mɔn Mbyindzɨ wa a zɔ́bɨ́nɨ́ ngə́: “Maʼmbyí Ŋwi Tamɨtən Mɨtsum, ɨnu tsa o ghɨnə a nɨ tsə wi nkɨ mbe tsə tsanɨnɨ ə! Ɨfɔ ɨlaʼ ɨtsum, ɨnu ɨtso a nɨ tsa tsɨ kuʼnɨnɨ, mɨndóm ɨmo kɨ mbe mə nkənu ə!

⁴ Maʼmbyí, ɨwa a mɨ keʼ agho bɔgɨtɨ ɨ kɨ gha nɨfáŋ a mbó gho le? Mbɨ́ʼ ngə́ a nɨ tsɛʼ gho wa o fɛmnɨ ə. Ɨbɛn bɨ ɨlaʼ ɨtsum ghɨ yen ghuʼsɨ agho, mbɨ́ʼ ngə́ ŋwɔn tsum a zɛnə ngɨnɨ mɨnu ɨmo ma mɨ tsinɨ tɨ nkobɨ lá.”

⁵ Mbáʼ məzen a mínə, ma zɛ́n nɨshwim a fɔməbvurə nɨ ŋaʼnɨ, kfuʼə wu fɛmnɨ a tsi wə mu ə.

⁶ Ɨtsendá Ŋwi tsa tsi samba tsa tsɨ tsínɨ́ nɨ ngɨ́ʼ tsa tsi samba, fú a mu nɨshwim na, ngwəgɨ ɨtsɛʼ atɨŋndvuŋ tsa tsɨ fɛ́mnɨ́ nkə́ ŋwénə́, ngwafɨ a nɨgo bo mɨkɔb mɨ ŋwaʼŋwaʼ ə.

⁷ Táʼ a tɨtərɨ ɨdzúm tsə kaʼnɨ tsa tsi nɨkwa tsa tsɨ tsinɨ ntən lá, a ghá ɨkəbɨ ŋwaʼŋwaʼ tsi samba a mbó ɨtsendá Ŋwi tsa tsi samba ghe. Ɨkəbɨ ŋwaʼŋwaʼ tsa lón nɨ mɨlwi Ŋwi, zɨ wa a tsinɨ ntən nɨnkoŋ nɨnkoŋ lá.

⁸ Nɨshwim na lón nɨ fɨndyiʼ fa fɨ lónɨ́ a mu nɨfáŋ abɔʼnɨ mɨtən mɨ Ŋwi ə. Ŋwɔn tse a kɨ chi keʼ kon ngɛn a mu nɨshwim na tɨkə ngɨ́ʼ tsa tsi samba tsa ɨtsendá Ŋwi tsa tsi samba yénɨ́ nɨ tsɛrə lá tsɨ lwitə.