Nkyɛʼə 11 - Mɨkan wu Fi

Bətɛmə-ndzě ba Bɨbá mbáʼ Ŋwi a Tságɨ́nə́

¹ Bɨ tíʼ ngá mbaŋ zɨ tse za ɨ fínɨ́ mbaŋ za bɨ fɨʼnɨ ɨdiʼ nɨ zɛrə a mbó me ntiʼ soŋ a mbó me ngə́, “Ghɛn fɨʼ nɨshwim nɨ Ŋwi abɔʼnɨ atú a mɨkuʼ, ntíʼ nkɨ nkwaʼ ɨbɛn ba bɨ ghánɨ́ nguʼsə a mu nɨshwim na.

² Lá koʼ ɨsaŋəbyɛn zɨ abyɛn nɨshwim za fɨʼ, mbɨ́ʼ ngə́ bɨ nyɛʼtɨ a zɛrə a mbó bɨtɨzhyɛŋwi, bo ba bo ghɨnɨ bɛʼtɨ ɨdiʼ a mu Ntáʼmbagə wu Wi wu Fɛmnɨ wa atú bɨsaŋ mɨghúm mi nɨkwa nɨ ntsɔb bá lá.

³ Ma mɨ tsagɨ bətɛmə-ndzě ɨban bɨbá ba bɨ wəgɨnɨ ɨtsɛʼ ndzə́ŋnə́ ghe. Bo mɨ soŋ nkən Ŋwi mbɨ́ʼ a za a ghɨnɨ fú bɔŋ á nkfu ɨ kuʼ atú njwi mətsa 1,260 ghe.”

⁴ Bətɛmə-ndzě ba bɨbá lá ɨtɨ olif tsa tsi bá abɔʼnɨ ɨtɛkɨ nkaʼ tsa tsi bá tsa tsɨ tɛ́mkɨ́nə́ a ɨshi Maʼmbyí wa a sáʼnə́ atuəshe lá.

⁵ Be ŋwɔn tsɛrə a zhwəŋtɨ a ndɛ́m bo, muŋ ɨmugɨ mɨ fu a ntsu bo ɨ tsənkɨ ngaŋ kɨban ɨtsa ghe. A nye ndóm məwen, bɨ mɨ zhwitɨ a ŋwɔn tsum wa a zhwə́ŋtɨ́nɨ́ ngɨ̌ anu a tɨbɔŋ zə tsɛrə a nye bo ghe.

⁶ Bo tsi nɨ mɨtən a nkɨŋ nɨkaŋ taŋ á mbəŋ keʼ lo atú nkfu za bo mɨ soŋ nkən Ŋwi mbɨ́ʼ a za a ghɨnɨ fú bɔŋ á nkfu ɨ kuʼ lá. Bo kɨ ntsi nɨ mɨtən atú mɨnkyi, a mbəŋ mɛrə a nye alɛm ə. Bo tsi nɨ mɨtən ɨ kɨ maʼ ɨbə́ŋ ngɨ́ʼ tsɨ wi ɨtsum atuəshe nkfu ɨnɔ ɨnɔ adzaŋ za bo lɔnə ghe.

⁷ Bo ghɨ mɛ́tɨ́ a nchwítɨ́ nkən wa, ɨnyam mɨtsɛgɨ za ɨ fúnə́ a mu abɨ́ a kfúrɨ́mándzó za mɨ tiʼ tokɨ awa ghe. Ɨ mɨ ghaʼ awa ɨ kɨ zhwitɨ awa,

⁸ á ɨkfú ɨtsa tiʼ nɔnkɨ a mu kɔŋ ndóm wu ntáʼmbagə wu wi wu wi wa, adiʼ wa bɨ kwémtɨ́nɨ́ a Maʼmbyí ɨwa ɨwu lá. Ɨkum ntáʼmbagə wu wi wa a nye nɨgham nə nanɨ nɨ Sodom abɔʼnɨ Gyibto ghe.

⁹ Ɨbɛn bɨ ɨlaʼ ɨtsum, ɨtsé tsɨ wi ɨtsum, ɨbɛn ba bɨ ghamnɨ mɨgham mɨtsum abɔʼnɨ ngwəgɨ ŋwɔn mɨsɔŋ a ntsu tsum mɨ liŋənɨ ɨkfú ɨbɛn tsa atú njwi tsi tárə́ nɨ akum, ɨ keʼ nyɛʼtɨ ngə́ á bɨ twəŋ a tsɛrə ghe.

¹⁰ Ɨbɛn bɨ atuəshe mɨ tiʼə dórɨ́kɨ́nə́ mbɨ́ʼ ngə́ ben bɨbá kfoə. Bo mɨ dorɨkɨ, ɨ kɨ tsagɨ ɨdzúm tsɨ ghanɨ a mbó ŋwɔn nɨ ŋwɔn, mbɨ́ʼ ngə́ ntóm Ŋwi tsen tsi bá yén nɨ ngɨ́ʼ zɨ ngwi a nye ŋwɔn tsum wa a tsínə́ atuəshe.

¹¹ Mbáʼ njwi tsa tsi tárə́ nɨ akum tsánɨ́, Ŋwi a zhwí azhwi za a ghánɨ́ ntsi ntən a nye bo, bo tiʼ ntsi nɨ ntsi ntən, ntiʼ ndo atɨ́ ə. Ŋwɔn tsum wa a zɛ́nɨ́ awa a tsí nɨ nɨbɔgɨ nə wi ə.

¹² Ntóm Ŋwi tsa tsi bá tíʼ ndzúʼ nji zɨ nkɔʼnɨ atɨ́ za ɨ lónɨ́ a fɔməbvurə ɨ soŋ a mbó bo ngə́, “Kɔʼ ngyenə ɨghə!” Ngaŋ kɨban ntóm Ŋwi tsa kə́ ndyiŋə adzaŋ za bɨ lɔ́gɨ́nɨ́ awa nkɔ́ʼə ngěn nɨ bo a fɔməbvurə a mu mbaʼ ə.

¹³ Tsɛʼ a nyom məwa, ɨshe nɛ́m tsɛʼ adaŋədaŋə; bɨ tsənkɨ a táʼ abagɨ ntáʼmbagə wa bɨ yɛbtɨnɨ ɨdiʼ tsi nɨghúm, ntiʼ nkɨ njwitɨ ɨbɛn nchwuʼ tsi samba ghe. Abvuʼ a ɨbɛn a tsí nɨ nɨbɔgɨ nə wi, ntiʼ nga nɨfáŋ a mbó Ŋwi, zɨ wa a tsinɨ a fɔməbvurə lá.

¹⁴ Ngɨ́ʼ zɨ ngwi za ɨ zɔŋtɨnɨ a nye ɨdiʼ tsi bá ɨ minə ghe, lá ngɨ́ʼ zɨ ngwi za ɨ zɔŋtɨnɨ a nye ɨdiʼ tsi tárə́ mɨ yen a nye məbaŋtɨ ə!

Ntaŋ za ɨ Zɔŋtɨnɨ a nye Ɨdiʼ tsi Samba ghe

¹⁵ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi samba ɨ tɔ́ŋ ɨzhi ntaŋ ə. Nji tsə kɔʼnɨ atɨ́ tsə tsɛrə ló a fɔməbvurə ɨ sóŋə́ ngə́, “Mɨtən mɨ sáʼ atuəshe tsi tɨtsɔŋnɨ lá a mbó Maʼmbyí ɨwɨgɨnə abɔʼnɨ Wa bɨ Zɔ́ʼnɨ́ ɨyi ɛ. Wɛrə a mɨ sáʼ nɨnkoŋ nɨnkoŋ ə!”

¹⁶ Bɨkum ba mɨghúm mɨmbá nɨ ntsɔb nɨkwa ba bɨ shíʼtɨ́nə́ nchyɛ̌ atú ɨbərɨ tsa a ɨshi Ŋwi lá tíʼ ngvo a ɨshe nkubɨnɨ mɨshi ɨma a tɨshe nguʼsɨ a Ŋwi,

¹⁷ ɨ sóŋə́ ngə́: “Maʼmbyí Ŋwi Tamɨtən Mɨtsum, zɨ wa a nɨ nkɨ mbe wɛrə wa a bénɨ́! Bɨgɨ gha a mɨya a mbó gho mbɨ́ʼ ngə́ o kwarɨnə mɨtən ɨmo mə wi ntiʼ nkɨ mbiʼnɨ sáʼə atuəshe!

¹⁸ Ba a se bə Yuda be lwí ntɔŋ tsɛʼ nkan, mbɨ́ʼ ngə́ nkfu mɨlwintɔŋ ɨgho ɨ yenə, nkfu za bɨ mɨ sáʼ bɨkfú ə. Nkfu ɨ kuʼnə ngə́ o kyaŋ ngaŋ afaʼ ɨtso, mbe ntóm Ŋwi abɔʼnɨ ɨbɛn ɨbo bɨtsum, ɨbɛn bɨtsum ba bɨ kɔ́ʼsɨ́nɨ́ ɨkum ɨgho atɨ́, bə wi abɔʼnɨ bə kɨʼnɨ ndəŋndəŋ ə. Nkfu ɨ kuʼnə a ntsənkɨ ɨbɛn ba bɨ tsənkɨnə atuəshe!”

¹⁹ Nɨshwim nɨ Ŋwi a fɔməbvurə ŋáʼnɨ́, ma tiʼ ndzɛn Nkom Akan wa ɨ tsi ɨwu ə. Mbəŋ tíʼ nzhwibtɨ, nkum, nkɨ mbɨ́ʼkə́. Ɨshe tíʼ nɛ́m, fɨwɛ fə wi tiʼ nkɨ ngvoə.