Ɛfɛso 2 - Mɨkan wu Fi

Adzaŋ za Bɨgɨnə Chinɨ Fu a mu Nɨvwo ɨ Kon a mu Ntsi Ntɨŋ ə

¹ Bən, a ghɨ́ awən nɨ tsi ntən, a nkfu za nɨ kfónɨ́ mbɨ́ʼ atɨŋətú azən abɔʼnɨ mɨbvu ɨmən

² ma nɨ tsínɨ́ wə mu, ndzɔ̌ŋ ɨtɔmnɨ ɨnu tsɨ atuəshe wen, ndzɔ̌ŋ a zɨ wa a sáʼnɨ́ ɨzhwi ɨtsum a mu ɨfɛgɨ; azhwi za, tɨtsɔŋnɨ a tíʼnə́ ntsɨ́ŋnɨ́ ɨbɛn ba bɨ tənə atú a mbó Ŋwi lá.

³ A nkfu tse, bɨgɨnə tsí a tɨtərɨ məbiŋ ɨbɛn ngɨ̌ ɨnu tsa mbəmnye bɨ́ŋnɨ́nə́ mbɨ́ʼ a tsɛrə, ndzɔ̌ŋ ɨnu tsa mbəmnye abɔʼnɨ akwaʼtɨ lɔnə ghe. Adzaŋ məwen, bɨgɨnə tíʼ mbe ɨbɔ ba bɨ ghɨnɨ zɛ́n alwɛntɔ́ŋ a Ŋwi, ndəŋndəŋ tso mbáʼ ŋwɔn mɨsɔŋ tsum a ghɨnɨ zɛ́n lá.

⁴ Lá, Ŋwi, zɨ wa a lonɨ nɨ mɨlɨŋnɨ, mbɨ́ʼ ngə́ wɛrə a kɔŋ awɨgɨnə be tɨ́sə́n,

⁵ tsɛʼ a nkfu za bɨgɨnə kfónɨ́ mbɨ́ʼ atɨŋətú azɨgɨnə abɔʼnɨ mɨbvu ɨmɨgɨnə lá, wɛrə a ghɨ́ bɨgɨnə tsi atú ntən bɨgɨnə bɨ Kristo ghe. A ndzum abɔŋəntəm bɨ loŋnə awɨŋ ə.

⁶ Wɛrə a zhwémnɨ́ awɨgɨnə, bɨgɨnə bɨ Kristo Yeso, ntiʼ ngɨ bɨgɨnə bo tsi a fɔməbvurə ghe.

⁷ Wɛrə a ghɨ́ a məzen lá ngə́ a mu mbyi za ɨ lo bə yen lá, wɛrə a chi diʼ abɔŋəntəm azhi za a ghaʼnɨ tsɛʼ a nkan lá a nye adzaŋ za wɛrə a ghɨ́nɨ́ ɨbɔŋ a nye bɨgɨnə ntsa a ndzum Kristo Yeso ghe.

⁸ Mbɨ́ʼ ngə́ a ndzum abeməntəm azən, a loŋ awən ntsa a ndzum abɔŋəntəm azhi; nkeʼ be be a ngɨ bɨŋ ə, a nɨ be azúm zə ghanɨ za Ŋwi a ghanɨ adaŋədaŋə ghe.

⁹ Wɛrə a ghɨ́ a məzen nkeʼ be be mbɨ́ʼ ɨfaʼ ɨwən, mbɨ́ʼ ngə́ be a be lá ma lan muŋ ŋwɔn tsɛrə a chi tɛrə.

¹⁰ Mbɨ́ʼ ngə́ bɨgɨnə nɨ abó afaʼ azhi mbáʼ wɛrə a káʼnɨ́ ntsa a ndzum Kristo Yeso ngə́ á bɨgɨnə ngɨə tsɛʼ ɨnu tsɨ shiʼnɨ tsa Ŋwi a kwɛ́nə nkyaŋtɨ ngə́ á bɨgɨnə ngɨə tsɛʼ a tsɛrə lá.

Kristo a Ghɨ Bɨgɨnə tsi a Mbúm ə

¹¹ A nɨ waʼtɨ ngə́ a nkfu tse, bən wa nɨ nɨ ɨbɛn ba a se bə Yuda be a mbəmnye, ba bə Yuda tɔ́ŋnə́ ngə́ bɨtɨtsəŋ alagɨ, ntɔŋ ɨtumbəm ɨtsa ngə́ ba bɨ tsəŋnɨ ɨlagɨ ɨtsa; anu zə tse za bɨ ghɨnə a nye mbəmnye nɨ mbó —

¹² á nɨ waʼtɨ ngə́ a bé a nkfu məwa lá, nɨ sé a Kristo zhyɛ. Nɨ sé tsi a mu akan za a tsínɨ́ nɨ ɨkaʼ tsa Ŋwi a káʼnɨ́ ɨbɛn ɨbyi ɨwu lá. Nɨ kə́ nchyɛ̌ atuəshe tɨ ntsiŋə nɨ ntəm tsum, nkeʼ a Ŋwi kɨ njiɛ.

¹³ Lá tɨtsɔŋnɨ, mbɨ́ʼ ngə́ bɨgɨnə tsi a mbúm bɨgɨnə bɨ Kristo Yeso, bən wa aghagɨ azən a ságɨ́nɨ́ a Ŋwi lá, nɨ zhinə ayi mbɨ́ʼ alɛm a Yeso za bɨ chwirɨnɨ atɨ abaŋnɨ-baŋnɨ ə.

¹⁴ Mbɨ́ʼ ngə́ Kristo zɨmboŋ a yen nɨ mbɔnɨ a mbó bɨgɨnə adzaŋ za wɛrə a bosɨnɨ bə Yuda abɔʼnɨ ɨbɛn ba a se bə Yuda be bɨ tiʼ táʼ azúm ə. Nɨ mbəmnye ɨzhi wɛrə a saʼ afə́ŋ a ndá a kɨban za a tsínɨ́ a tɨtərɨ bo lá.

¹⁵ Wɛrə a fɨ́gɨ́ a nyɔngɔŋ Mosě abɔʼnɨ ntɨgə nɨ mbɔm, taŋ ɨ ghɨ a táʼ ngwəgɨ ŋwɔn mɨsɔŋ a ntsu á tsi a mbúm bo zɨ a nye ngwəgɨ mətsen tsi bá, adzaŋ məwen ɨ ghɨ á mbɔnɨ tiʼ nchyɛ.

¹⁶ Nɨvwo nɨ Kristo atɨ abaŋnɨ-baŋnɨ lwítɨ́ a kɨban a tɨtərɨ bo ghe. A ntsǎ a ndzum abaŋnɨ-baŋnɨ məzen, wɛrə a chíntɨ́ awa bo tiʼ táʼ nkɨ ndɔgɨ awa mbən nɨ bo a mbó Ŋwi ə.

¹⁷ Ma lan, Kristo a yén sóŋ Nkən wu Shiʼnɨ wa ɨ yenə nɨ mbɔnɨ a mbó bən, ɨbɛn ba a sé bə Yuda be ba aghagɨ aza a ságɨ́nɨ́ a nye Ŋwi, nkɨ soŋ a wɛrə a mbó bə Yuda ba bɨ fátɨ́nɨ́ a Ŋwi ə.

¹⁸ A ntsǎ ndzum Kristo, bɨgɨnə bɨtsum, bə Yuda abɔʼnɨ ba a se bə Yuda be a mu táʼ azhwi wa, bɨgɨnə chi ghɛn a mbyi Tarɨ ə.

¹⁹ Ma lan, bɨŋ ɨbɛn ba nɨ se bə Yuda be, ka nɨ bə nkwiʼ mbvurɨ awən bɨngyen-yenɨ kə bɨghən; nɨ tiʼ nkɨ mbe ndəŋndəŋ bɨŋ bɨ ɨbɛn bɨ Ŋwi nkɨ ntiʼ mbe ɨbɛn bɨ ngwəgɨ Ŋwi ə.

²⁰ Bən wa nɨ se bə Yuda be, nɨ kɨ mbe lá ndá za bɨ vwunɨ atú atsé ndá za a bɔmnɨ ntóm Yeso bo ntóm Ŋwi, Kristo Yeso zɨmboŋ a be ngɔʼ nɨbú ɨzhi ɛ.

²¹ A nɨ Kristo wa a chwanɨ ndá za tsum, ngɨ ɨ kwiənə a nye ndáŋwi zɨ fɛmnɨ za ɨ tsinɨ a ngúʼsɨ́ Maʼmbyí ɛ.

²² A mbúm bɨŋ bɨ Kristo, bɨ kə́ mbɔ́mə́ awən abɔʼnɨ bə mɔʼɔ bɨtsum, á nɨ tiʼ mbe adiʼ za Ŋwi a tsínə́ ɨwu ntsa a ndzum Azhwi azhi ɛ.