Alukasɨ 4 - Mɨkan wu Fi

Adzaŋ za bɨ kwaʼnɨnɨ a Yeso ghe

¹ Yeso a bə́n a Yorɨdan ndon nɨ Azhwi zə Fɛmnɨ, Azhwi a tíʼ ndɔgɨ a wɛrə ngɛn nɨ zɨ a mu mɨkɨghonɨ,

² adiʼ wa Dəbɨrɨ a kwáʼnɨ́nɨ́ ayi atú njwi mɨghúm mi nɨkwa ghe. A nye nkfu za tsum a sé azúm zə tse byi ndzɨ, adzaŋ za nji kɨ chyɛ́ ndzáŋə́ ayi tsɛʼ nkan a ndwitɨ nkfu məza.

³ Dəbɨrɨ a sóŋ a mbó Yeso ngə́, “Be o be Mɔn Ŋwi bəŋ ngɔʼ zen a nye abán ə.”

⁴ Lá Yeso a chwɨ́gɨ́ ngə́, “Aŋwaʼnɨ a Ŋwi a soŋ ngə́, ‹Ka ŋwɔn mɨsɔŋ a nchyɛ̌ ayi atuəshe lá tsɛʼ mbɨ́ʼ abán ə.›”

⁵ Dəbɨrɨ a tíʼ ndɔgɨ ayi nkɔʼ ngɛn nɨ zɨ atɨ́, ntiʼ ndiʼ nɨfɔ nɨtsum nɨ atuəshe wen wəmbo tsɛʼ a nye məkum a nkfu ə.

⁶ Dəbɨrɨ a tíʼ soŋ wəmbo ngə́, “Ma mɨ gha mɨtən men mɨtsum abɔʼnɨ afuʼ azhi a mbó gho, mbɨ́ʼ ngə́ bɨ kwɛnə nga a tsɛrə ɨtsum a mbó me, ma chi tiʼ kɨ gha a tsɛrə a mbó ŋwɔn tsum wa ma kɔŋnə.

⁷ Be o ghuʼsɨ aghan, tsiŋ ɨtsum tiʼ ɨtso ə.”

⁸ Yeso a chwɨ́gɨ́ ngə́, “Aŋwaʼnɨ a Ŋwi a soŋ ngə́, ‹O mɨ ghuʼsɨ tsɛʼ a Maʼmbyí Ŋwi ɨgho, ɨ faʼ atsum tsɛʼ wəmbo ə!›”

⁹ Dəbɨrɨ a tíʼ nkwiʼ ndɔgɨ a wɛrə ngɛn nɨ zɨ a Yerosalɛm, ndɔgɨ ayi nkɔʼ ngɛn ntɛgɨ atú a təntsánɨ́ Ndáŋwi zɨ Ngwi, ntiʼ soŋ wəmbo ngə́, “Be o be Mɔn Ŋwi, tsɔʼnɨ adiʼ wɛnə nkanɨ a tɨshe,

¹⁰ mbɨ́ʼ ngə́, Aŋwaʼnɨ a Ŋwi a soŋ ngə́, ‹Ŋwi a mɨ tsagɨ bɨtsen bɨ ndá bɨ Ŋwi ɨbyi á bɨ lə atú a nye gho tsɛʼ ɨ shiʼnɨ ɨ shiʼnɨ ə.›

¹¹ A kɨ́ nkwiʼ soŋ ngə́, ‹Bo mɨ lyɛrɨsɨ agho atɨ́ atɨ́ taŋ o chi koʼ tsɛʼ mɨku ɨmo lɛm a nye ngɔʼ ə.›”

¹² Lá Yeso a chwɨ́gɨ́ ngə́, “Aŋwaʼnɨ a Ŋwi a soŋ ngə́, ‹Njimbɨʼ o kwaʼnɨ a Maʼmbyí Ŋwi ɨgho ghe.›”

¹³ Mbáʼ Dəbɨrɨ a mɛ́tɨ́nɨ́ a nkwaʼnɨ Yeso a nye mɨndóm mɨtsum lá, a nyɛ́ʼtɨ́ a wɛrə a nye abaŋ zə tsɛrə ghe.

Yeso a Biʼnɨ Afaʼ azhi a Galili ə

¹⁴ Yeso a tíʼ mbə mbə́n a Galili, mɨtən mɨ Azhwi zə Fɛmnɨ tíʼ ntsí bo zɨə. Nkərɨ mbɨ́ʼ a wɛrə ɨ lámnɨ́ a mu kárɨ́kɨ́ alaʼtom wa atsum ə.

¹⁵ A díʼ anu a Ŋwi a ndáŋwi bə Yuda, ŋwɔn tsum a bontɨnə a wɛrə ghe.

Bɨ Ton a Yeso a Nazarɛ ghe

¹⁶ Yeso a tíʼ ngɛn a Nazarɛ adiʼ wa a kwínɨ́ ɨwu ə. A ghɨnə mbé a Njwi Alaʼ Ŋwi, Yeso a ghɛn a ndáŋwi bə Yuda, mbáʼ a bénɨ́ mbɔm ɨzhi lá. A ló ntɛ́m atɨ́ a ntɔ́ŋ aŋwaʼnɨ a Ŋwi,

¹⁷ bɨ gha aŋwaʼnɨ a Ntom Ŋwi Asaya wəmbo ə. A ŋáʼ aŋwaʼnɨ a Ŋwi ngɛn ndzɛn adiʼ za bɨ ŋwáʼnɨ́nɨ́ ɨwu ngə́,

¹⁸ “Azhwi a Maʼmbyí a tsi atú me, mbɨ́ʼ ngə́ a tsɔʼ aghan ngə́ á ma yen nɨ nkən wu shiʼnɨ a mbó ɨfúm ə. A tyigɨ aghan ngə́ á ma fɨʼtɨ a mbó ngaŋ atsáŋ ngə́ bɨ mɨ nyɛʼtɨ awa, á bɨfɨgɨ bə ndze ɨdiʼ; ɨ kɨ ghɨ á bɨ nyɛʼtɨ ɨbɛn ba bɨ zhíʼnə́ awa

¹⁹ ɨ tiʼ kɨ chwitɨ ngə́ nyom a kuʼ wa Maʼmbyí a mɨ loŋ ɨbɛn ɨbyi ɛ.”

²⁰ Yeso a kúbɨ́nɨ́ aŋwaʼnɨ a Ŋwi za mbyigɨ nga a mbó ŋwɔn afaʼ ndáŋwi bə Yuda za ntiʼ ntsi ayi a ɨshe. Ŋwɔn tsum a mu ndáŋwi bə Yuda za, a tɛ́gɨ́ ɨmɨgɨ wə ɨnye,

²¹ mbáʼ a tíʼnɨ́ sóŋ a mbó bo ngə́, “Akumtɨ aŋwaʼnɨ a Ŋwi zen a fu a nye nkənu ɨ sɨŋə mbáʼ nɨ lonə njwíʼtə́ bɨ tɔŋənə lá.”

²² Ŋwɔn tsum a bémtɨ́ a wɛrə, a kə ntiʼə nkɨ́ʼnə́ awa adzaŋ za ntsu ɨyi chínə́ ntsǎ a nye ɨnu tsa a kɨ́nə́ sóŋə́ ghe. Bo tíʼ mbitɨ ngə́, “A se mɔn Yosɛb a wen be le?”

²³ A chwɨ́gɨ́ a mbó bo ngə́, “Ma zhi ɨ shiʼnɨ ngə́ nɨ mɨ na nɨgham nen a mbó me ngə́, ‹Tangaŋ, tsuʼ atuəmbəm azo ə.› Nɨ mɨ kɨ zɔŋtɨ soŋ a mbó me ngə́ ɨnu tsa nɨ zúʼnɨ́ ngə́ tsɨ fú a Kabɛrɨnaum lá á ma kɨ ngɨ a tsɛrə a mu alaʼ me ɨghə.”

²⁴ Yeso a kwíʼ soŋ ngə́, “Ma soŋ awɨŋ ə, ka ngaŋ ndá ntsǎ ayi ɛ.”

²⁵ Yeso sóŋ a mbó bo ngə́, “Zhwiʼtɨnə: a nɨ nkənu ngə́ bɨkfugɨ gháʼ a mu Izrai a nkfu Alaja, a nkfu za mbəŋ ɨ sé bé atú ɨlom tsi tárə́ nɨ akum, mɨchwinɨ a tiʼ nkɨ nkarɨ alaʼ lá.

²⁶ Lá bɨ sé Alaja a mbó ŋwɔn tse a mu Izrai tyigə, bɨ tyígɨ́ ayi tsɛʼ a mbó nkfugɨ mangye za ɨ kɨ́nə́ nchyɛ̌ a Zarɨfatɨ a mbuʼ Saidɔn ə.

²⁷ Ɨtɨchwen kɨ́ ngáʼ a tɨtərɨ ɨbɛn bə Izrai a nkfu za ntom Ŋwi za bɨ kɨ́nə́ ntɔ́ŋə́ ngə́ Elisha ɨ kɨ́nə́ faʼə ghe; lá bɨ láʼ nkeʼ a táʼ wu fɨgɨnɨ tsuʼə; a yén mbé bé Naman wa a bénɨ́ bé ŋwɔn bə Sirɨya ghe.”

²⁸ Mbáʼ ɨbɛn ba bɨ tsínɨ́ a mu ndáŋwi bə Yuda za zúʼnɨ́ a məzen lá, mɨntɔŋ ma lánɨ́ ndwi tsɛʼ nkə.

²⁹ Bo nyɛ́nɨ́ ndo atɨ́, ɨ shwuŋ a Yeso ɨ fu nɨ wɛrə a mu ntáʼmbagə bo, nkɔʼ ngɛn nɨ wɛrə a nɨdoŋə nɨ ntáʼ wa bɨ kórɨ́nɨ́ ntáʼmbagə za ɨwu ə. Bo kə́ ndǒ ɨ maʼ wɛrə á bɨnkɨ ɨ shiʼ a mbəm ntáʼ wa,

³⁰ lá wɛrə a sántɨ́ ntsa ayi a tɨtərɨ ɨnɔ ɨbɛn wa ngɛn ayi ɛ.

Ŋwɔn Tse wa a Tsínɨ́ nɨ Azhwi zə Tɔmnɨnɨ ə

³¹ Yeso a tíʼ ngɛn a Kabɛrɨnaum, ntáʼmbagə wu tse a mu Galili ə. Ɨwu, a díʼ anu a Ŋwi a mbó ɨbɛn a Njwi Alaʼ Ŋwi ə.

³² A kə́ nkɨʼnə a ŋwɔn tsum adzaŋ za a kɨ́nə́ ndǐʼ anu a Ŋwi, mbɨ́ʼ ngə́ a kə́ ngamə anu atsum nɨ mɨtən ə.

³³ A mu ndáŋwi bə Yuda za, ŋwɔn tse a tsí ɨwu nɨ azhwi a dzɨŋ zə tɔmnɨnɨ ə. A tɔ́nkɨ́ nji ɨzhi kɔʼ atɨ́ ngə́,

³⁴ “Ei! Yeso ŋwɔn bə Nazarɛ, o tsi nɨ ake bɨgɨnə le? O yen ɨghan lá a shísɨ́ bɨgɨ le? Ma zhi a ŋwɔn wa o nɨ wɛrə ghe: o lá ntom zɨ fɛmnɨ za Ŋwi a tsagɨnə!”

³⁵ Yeso a sóŋ a mbó azhwi za ngə́, “Chwubtɨ ntsu ɨgho nkɨ fu a ɨnye ŋwɔn wa!” Dzɨŋ wa a ghágɨ́ a ŋwɔn wa ntum a tɨshe a ɨshi bo ntiʼ fu ayi tɨ lɛm ayi ɛ.

³⁶ A tíʼ nkɨʼnɨ ɨbɛn, bɨ tiʼə mbítə́ a tɨtərɨ bo nɨbo ngə́, “A nɨ ɨbə́ŋ mɨgham ɨke tsenə le? Nɨ mɨtən nchintɨ adaʼ ŋwɔn wen a ghamtə ɨzhwi tsɨ tɔmnɨnɨ, tsɨ zuʼnɨnə ayi ɨ fúə a mu ɨnye ɨbɛn ə!”

³⁷ Nkərɨ Yeso ɨ lám mbuʼ za tsum ə.

Yeso a Tsuʼ Ɨbɛn bə Ghaʼnɨ ə

³⁸ Yeso a fú a ndáŋwi bə Yuda za ntiʼ ngɛn a ndá Samɔn ə. Nyɔŋ Samɔn a kə́ ngǒ nɨ ɨfɛgɨ wu tɨŋə, bɨ mɨ́tɨ́ a zɛrə a mbó Yeso ghe.

³⁹ A ghɛ́n ntɛ́m wə mbyɛn ɨkon ɨ soŋ ngə́ á ɨfɛgɨ wa nyɛʼtɨ a nɨmo wa. Ɨ nyɛ́ʼtɨ́ ayi a byi ndo atɨ́ nchwuʼ ɨ faʼə a mbó bo ghe.

⁴⁰ A ngvotɨ ɨdiʼ ŋwɔn tsum wa a tsínɨ́ nɨ bɨson ba bɨ kɨ́nə́ ngǒ nɨ mbúŋ mɨghɔ mɨtsum bɨ yén nɨ bɛrə a mbó Yeso; a nyɔŋ mbó ɨmyi a ɨnye bo ntsuʼ awa bɨtsum ə.

⁴¹ Bɨdzɨŋ kə́ sɔnkə fuə a ɨnye ɨbɛn a ɨnɔ ɨnɔ ntɔ́nkə́ ngə́, “O lá mɔn Ŋwi ə!” Yeso a ghámtɨ́ bɨdzɨŋ ba ngə́ á bɨ chwubtɨ mɨntsu ɨma nkeʼ nyɛʼtɨ ngə́ á bɨ gham, mbɨ́ʼ ngə́ bo zhí ngə́ wɛrə lá Wa bɨ Zɔ́ʼnɨ́ ə.

Yeso a Soŋ Anu a Ŋwi a Mu Ndáŋwi bə Yuda ghe

⁴² Mbáʼ njwi ɨ lánɨ́, Yeso a nyɛ́ʼtɨ́ ɨmu ntáʼmbagə za ngɛn ayi a nkubə ghe. Ɨbɛn tíʼə númə́ ndǒ ayi ɛ. Bo ghɨnə ndzɛ́n ayi, ntiʼ mba a zóŋ ngə́ á keʼ awa nyɛʼtə.

⁴³ Lá wɛrə a sóŋ a mbó bo ngə́, “Ma tsi nɨ ɨ ghɛn ɨ soŋ Nkən wu Shiʼnɨ mbɨ́ʼ Nɨfɔ nɨ Ŋwi a mu ntáʼmbagə tsə mɔʼɔ, mbɨ́ʼ ngə́ lá nɨ anu za Ŋwi a tságɨ́nɨ́ aghan ngə́ á ma yen ngɨə.”

⁴⁴ Ma lan, wɛrə a tíʼə sóŋə́ anu a Ŋwi a mu ndáŋwi bə Yuda tsum a mu mbuʼ Yudiya ghe.