Nehemiah 3 - Ṉa Alaofua Falu 1923 1949

¹ Sui aofia ni foa na tha Ilaesifu ka tae mai bia ina lana kera na wane ni foa ki, ma keka thauwai nia baba ifana maethakaa sifi ki; keka faaabua, keka takwelaṉania rebee ’ai ki ifana; lalae ka fula ana faelaṉi ni toi la i Mia keka faaabua, ana faelaṉi ni toi la tha Ananila neri.

² Ma karaṉi nia wane i Jeriko ki keka uia ada ta si kula. Ma karaṉi kera tha Saka, kaluwane tha Imari, ka uia ta si kula.

³ Sui baba ifana maethakaa gwa i’a ki, kaluwane tha Asena ki keka thauwai nia; keka alua ma’e ’ai nia ki, ma keka takwelaṉania rebee ’ai ki ifana, bia fuila ki nia ki, ma falo nia ki.

⁴ Ma karaṉi kera tha Meremoto, kaluwane tha Uraeja, kaluwane tha Kosa, ka thauwai faalu ana ta si kula. Ma si kula karaṉi kera tha Mesalama, kaluwane tha Berekaea, kaluwane tha Mesesabila, ka thauwai faalu lau ania. Ma si kula karaṉi kera tha Sadoko, kaluwane tha Baana, ka thauwai falu lau ania.

⁵ Ma si kula karaṉi kera toa i Tekoa keka thauwai faalu; ma sui wane inoto kera ki kesi gwau toli uria ili lana ra Arai kera.

⁶ Ma maethakaa eri ne ni mai inao, tha Jihoida kaluwane tha Basea, ma tha Mesalama kaluwane tha Besodaea, keko thauwai faalu lau ania; keka alua ma’e ’ai ana baba eri ki, ma keka takwelaṉania rebee ’ai ki ifana, ma fuila ki nia ki, ma falo nia ki.

⁷ Ma si kula karaṉi kera Gibeonaete eri na tha Melataea ka thauwai faalu lau ania, ma tha Jadono ṉa Meronothaete, ma wane eki i Gibeona ma i Misiba, keka ra‐ra ka fula ana do ni ono la ana inotoa wane ne gwauwai ana fanua ibali nei ana kafo baita eri.

⁸ Si kula karaṉi nia tha Asiele, kaluwane tha Area, ka thauwai faalu lau ania; nia wane ana toa ni ra la asi golu. Si kula karaṉi nia tha Ananaea ka thauwai faalu lau ania; nia wane ana toa na kera ra ana do makwa lea ki; ma keka lakali faisia Jerusalema ka fula ana sulufau rerebaa eri.

⁹ Ma si kula karaṉi kera tha Refaea, kaluwane tha A, ka thauwai faalu lau ania; ma nia wane gwauwai ata bali ana Jerusalema.

¹⁰ Ma si kula karaṉi kera tha Jedaea, kaluwane tha Arumafa, ka thauwai faalu lau ania, si kula otofana maafera nia neri. Ma si kula karaṉi nia tha Atasa, kaluwane tha Asanaea, ka thauwai faalu lau ania.

¹¹ Tha Makaeja, kaluwane tha Arimu, ma tha Asaba, kaluwane tha Baata‐moaba, keko thauwai faalu lau ana ruana si kula, ma faelaṉi ni toi la asi kula ana era baita ki.

¹² Ma si kula karaṉi nia tha Salama, kaluwane tha Aloesa, wane gwauwai ata bali ana Jerusalema, ka thauwai faalu lau ania, ni nia neri ma thari nia ki bi nia.

¹³ Maethakaa i la kurua, tha Anana ma toa i Sanoa keka thauwai faalu lau ania; keka thauwai nia baba, ma keka takwelaṉania rebee ’ai ki ifana, ma fuila ki nia ki, ma falo nia ki; keka uia tee tooni kadee aba lau boo ana sulufau eri, lalae ka fula ana maethakaa ana do eki na kera naṉa ania i la taerau.

¹⁴ Ma maethakaa eri ana do eki na kera naṉa ania i la taerau, tha Malakaea, kaluwane tha Rekefa, ka thauwai faalu lau ania; nia wane gwauwai ata bali i Beteakeremu; wane eri e thauwai nia baba, ka takwelaṉania rebee ’ai ki ifana, ma fuila ki nia ki, ma falo nia ki.

¹⁵ Ma sui maethakaa ruka‐mauri eri, tha Salana, kaluwane tha Kolose, ka thauwai faalu lau ania; nia wane gwauwai ata bali i Misiba; wane eri ka thauwai nia baba, ka thu fafia, ka takwelaṉania rebee ’ai nia ki, bia fuila ki nia ki, ma falo nia ki, ka uia sulufau ma’e kafo eri i Saeloa karaṉia ra kiṉa, lalae ka fula ana lalaefa na ka sifo kau faisia toaa susu tha Defeta.

¹⁶ Buriana wane eri, tha Niimaea, kaluwane tha Asabaka, wane ne gwauwai ata bali i Betesa, ka thauwai faalu lau asi kula lalae ka fula otofana kwaiṉeia tha Defeta ki, ma isana ma’e kafo na kera thauwai nia na ba, ma isana biu wane rigita eki.

¹⁷ Buriana wane eri, Lifaete ki keka thauwai faalu lau ana ta si kula, tha Riama, kaluwane tha Bani, neri. Si kula karani nia tha Asabaea, na wane gwauwai ata bali i Kila, ka thauwai faalu lau ania, bali fanua nia neri.

¹⁸ Buriani nia, toa na ina lana wane eki keka thauwai faalu lau ana ta si kula, tha Bafae, kaluwane tha Enadada neri, na wane gwauwai ata bali i Kila.

¹⁹ Ma karaṉi nia tha Isa, kaluwane tha Jesua, na wane gwauwai i Misiba, ka thauwai faalu lau ana ta si kula lau otofana tae lana fanua uria biu rauma ki, asi kula sulufau kai kali.

²⁰ Buriana wane eri, tha Baruka, kaluwane tha Sabae, ka seemabe faamau ana thauwai faalu la ata bali lau, ita asi kula na sulufau kai kali, lalae ka fula ana babana maafera aofia ni foa na tha Ilaesifu.

²¹ Buriana wane eri, tha Meremota, kaluwane tha Uraeja, kaluwane tha Kosa, ka thauwai faalu ana ta si kula lau, ita ana babana maafera tha Ilaesifu, ka fula ana sui lana maafera eri.

²² Ma buriani nia, wane ni foa ki, na toa ana fanua dedema eri, keka thauwai faalu lau ana ta si kula.

²³ Buriana wane eki, tha Benijamini ma tha Asafa keko thauwai faalu lau asi kula otofana maafera keroa. Buriana ro wane eki, tha Asaraea, kaluwane tha Masaea, kaluwane tha Ananaea, ka thauwai faalu lau asi kula ne ni karaṉia maafera nia italaana.

²⁴ Buriana wane eri, tha Binui, kaluwane tha Enadada, ka thauwai faalu lau ana ta si kula lau, ita i maafera tha Asaraea lalae ka fula ana lokosuua, si kula ana kali lana sulufau neri.

²⁵ Tha Balala, kaluwane tha Asae, ka thauwai faalu lau asi kula ni otofana si kula sulufau ka kali ania, ma faelaṉi ni toi la ne takwe i maana maafera kiṉa ni da iaa, karaṉia labata lokafu. Buriana wane eri, tha Bedaea, kaluwane tha Barosa, ka thauwai faalu lau ana ta si kula.

²⁶ Ma sui Netinimu ki keka to bada i Ofelo, ka fula asi kula otofana maethakaa kafo, ne lio uria si kula ana tae lana thato, ma faelaṉi ni toi la eri na ka takwe i maana fera eri.

²⁷ Ma buriana wane eki, toa i Tekoa keka thauwai faalu lau ana ta si kula lau otofana faelaṉi baita eri ni toi la na ka takwe i maana fera eri, lalae ka fula ana sulufau i Ofelo.

²⁸ Ita asi kula ne tae faisia maethakaa hosi ki, wane ni foa ki keka thauwai faalu lau, wane boo asi kula otofana maafera nia, wane boo asi kula otofana maafera nia.

²⁹ Buriana wane eki, tha Sadoka, kaluwane tha Ima, ka thauwai faalu lau asi kula otofana maafera nia. Buriani nia tha Semaea lau boo, kaluwane tha Sekanaea, wane ni fono toi kalia maethakaa ne lio uria bali tae lana thato, ka thauwai faalu ana ta si kula.

³⁰ Buriana wane eri, tha Ananaea, kaluwane tha Selemaea, ma tha Anana, ona kaluwane tha Salafa, keko thauwai faalu lau ana ta si kula lau. Buriana wane eri, tha Mesalama, kaluwane tha Berekaea, ka thauwai faalu lau asi kula ne ni otofana kadee luma nia.

³¹ Buriana wane eri, tha Malakaea, kaluwane wane ni ra la asi golu, ka thauwai faalu lau asi kula ne lalae ka fula asi kula Netinimu ki, ma wane eki ni usi lana si do ana todado la ki, otofana maethakaa i Mifikata, ka fula asi kula ne tae uria lokosuua.

³² Ma imaalutana si kula ne tae uria lokosuua eri ma maethakaa sifi ki, wane eki ni ra la asi golu, ma wane ni usi lana si do ana todado la ki, keka thauwai faalu lau ana ta si kula.