Mathui 7 - Ṉa Alaofua Falu 1923 1949

¹ Musi ṉata mala wane ni kotu sulia imole, fasi Wane ni Kotu ka ai si ṉata suli kamulua.

² Sulaania Wane ni Kotu toto kai ṉata suli kamulua ana ṉata la ne ’uria ṉata la na ni kamulua mulu ṉata ania sulia tei imole ki lau: ma do ni olotooa na muki olotoona si do ania, si do eri keki olotoona ifamulua.

³ Ma uria ta noko rikia kasi lolo ni la maana dooramu, ma osi manataia ṉa falo ni la maamu lau bana?

⁴ Mado oko sore ufita isana dooramu, Alamatai nau kwai gaua kasi lolo ena faisia maamu; ma rikia fasi, ṉa falo ni la maamu lau bana?

⁵ Wane oko olodola, oko gaua ṉa falo faisia maamu lau bana inao; ma oki bii lio ni lea la uria gau lana kasi lolo eri faisia maana dooramu.

⁶ Musi falea do ne abu ifana kui ki, ma musi nanaṉa ana pala kamulua ki inaona botho, ada mado e ai keki uria ana aeda, ma keki akele iburi, keki alamaga kamulua.

⁷ Muki gani, ma keki fale ifamulua; muki rofe, ma muka rikia; muki kikidi, ma keki ifini kamulua:

⁸ Sulia ni tei na kai gani kai ṉali; ma wane na kai rofe kai rikia; ma wane na kai kikidi keki ifi uri nia.

⁹ Mado ta wane iamulua, mada sa kaluwane nia kai gani nia uria ta bisikete, nia ka falea si fau ifana;

¹⁰ Mado sa nia kai gania uria ta ia, nia ka falea wa aala ifana?

¹¹ Mania mada sa ni kamulua, toa na mulu taa, muki thaitoomana fale lana si do lea ki na keki tona falea ifana wela kamulua ki, fale la si tatha Maka kamulua ne ni mei thalo kai fale asi do lea ki ifana toa na keki gani nia?

¹² Mania si do ki sui ana atona bana si do na mulu thathamia imole keki ilia ifamulua, muka ilia lau boo ifada: sulia ṉa lo ma porofeta ki nania.

¹³ Muki kotho ana maethaka ne sisikofi: uria na maethaka eri e rerebaa, ma tala eri e baita, na kai lae uri mae la, ma toa na keki lae iei kera oro.

¹⁴ Uria na maethaka eri e sisikofi, ma tala eri kera adea ka faekwa, na kai lae uri marukia, ma imole na keki fulatoona kera ununa bada.

¹⁵ Muka fia porofeta na kesi mamana ki, na keki lae mai isamulua, keki tooni ana maku sifi, ma sui i lala kera ṉa koito kwasi ne isialoṉa ki.

¹⁶ Muki thaitoomada ana foada. Imole kai fufufusia foana faene ana ’ai totora, mado foana thakwari ana kwarafifi?

¹⁷ Una eri lau boo ’ai ni sui bana ne lea kai fuṉu ana fuṉii do ne lea; ma ’ai ne oela kai fuṉu ana fuṉii do taa.

¹⁸ ’Ai ne lea so ka fuṉu ana fuṉii do taa e ai, ma ’ai ne oela so ka fuṉu ana fuṉii do lea e ai.

¹⁹ ’Ai ni sui bana ne ai si fuṉu ana fuṉii do ne lea keka kasia, ma keka u ania i la era.

²⁰ Mania muki thaitoomada ana foada.

²¹ Toa eki sui boo na keki alaṉi nau ana Lord, Lord, e ai, na keki kotho i toaa i thalo; talitoona boo wane na kai ilia si do na Maka nau ne ni mei thalo kai thathamia.

²² Toto toa oro keki soree isaku afa boṉi eri, Lord, Lord, ta na sa ni kamilia mili ṉaṉata mala porofeta ana thatamu na ba, ma mili arasia spirit taa ki ana thatamu, bia mili ilia ra oro ana sukwaia ki ana thatamu, mado?

²³ Ma si maṉa eri nau kwai soree isada, Nau kwasi thaitoomamulua u boo: lae kau faisi nau, toa na mulu ra ana ra na kera lufia.

²⁴ Mania ni tei na kai roṉoa bae laku neri, ma kai ilia, keki toolaṉania ana wane lione too, ne kasia biu nia fafona fau:

²⁵ Ma dani e aru, ma kafo ka luu mai, ma thauthau ka tatha, ka too ana biu eri; ma ka ai si aga: uria na kera boa fafona fau.

²⁶ Ma ni tei na kai roṉoa bae laku neri, me ai si ilia, keki toolaṉania ana wane ne oewanea, ne kasia biu nia i la one:

²⁷ Ma dani e aru, ma kafo ka luu mai, ma thauthau ka tatha, ka too ana biu eri; ma ka aga: ma aga lana e baita.

²⁸ Ma lalae mai si maṉa na tha Jesus e suia si baea eki, malului wane eki keka kwele ana kwaifamanatai la nia:

²⁹ Uria nia kwaifamanatai isada mala ta wane inoto, ka ai si ’uria wane ni kekeda kera ki.