Mathui 6 - Ṉa Alaofua Falu 1923 1949

¹ Muka fia ada muki ilia si do kokoto na muki ilia inaofana imole, fasi keki rikia: mada sa muka ade una eri, ka ai amulua ta kwaiara isana Maka kamulua ne ni mei thalo.

² Mania si maṉa noki tona faledo ifana toa na kesi rikii do, osi ufia ta buṉu inaofamu, ’uria ade la na toa keki olodola keki ilia i la biu ni ofu la ki bia sula tale ki, uria bana fasi imole keki taṉoda. Mamana ku soree isamulua, Kera ṉalia naa kwaiara kera.

³ Ma ni oe si maṉa noki tona faledo, osi alamatania aba mauli oe si thaitoomana si do na aba aola oe kei ilia:

⁴ Fasi si do noki tona falea ifana toa na kesi rikii do kai thaufuni: ma Maka oe na kai rikia si do ne thaufuni kai kwaiaraṉai oe.

⁵ Ma si maṉa noki foa, osi ’uria lau toa na keki olodola: uria na kera thathamia faamau keki takwe ma keki foa i la biu ni ofu la ki ma sula luuni tala ki, uria bana fasi imole keki rikida. Mamana ku soree isamulua, Kera ṉalia naa kwaiara kera.

⁶ Ma ni oe, si maṉa noki foa, oki lae uria kadee biu oe ne banitei, mo fono sui, oko foa ana Maka oe ne to thaufuni, ma Maka oe na kai rikia si do ne thaufuni kai kwaiaraṉai oe.

⁷ Ma musi tona inino ana tee si do ana foa la, ’uria ade la na Jenetaele ki keki ilia; uria manatada sa keki roṉoda sulia ṉata la oro kera.

⁸ Mania kamulua musi ’urida lau: sulia na Maka kamulua e thaitoomana si do na muki rofedaki maṉa na musi soetoona u.

⁹ Mania muka foa ka una eri: Maka kamilia no ni thalo, Keki faaabua thatamu.

¹⁰ Tooa oe kai lae mai. Keki ilia si do no thathamidaki iano kai ’uria lau boo i thalo.

¹¹ Oki falea mai faṉa kamilia itaraena kai talaana itaraena.

¹² Ma oki manata lube kamilia ana abula taa la kamilia ki, ’uria lau boo na miki manata lube kera na kera abula taa iamilia.

¹³ Ma osi talai kamilia isana bae aliṉa la, oki suusi kamilia faisia tha Taa, sulaania na do oe na ṉa tooa, ma ṉa sukwaia, ma ṉa inotoa, toto si sui. Emeni.

¹⁴ Uria mada sa muka manata lubea imole ana abula garo lada, Maka kamulua ne ni mai thalo ka bii manata lube kamulua.

¹⁵ Sui mada sa musi manata lube ana imole ne abula garo, Maka kamulua ka ai si manata lube ana abula garo lamulua lau boo.

¹⁶ Ma sui lau boo si maṉa na muki abu ana faṉa, musi ’uria lau toa na keki olodola, musi lio mala ta wane ne liodila: sulia keki lautania maada, uria bana fasi imole ki keka rikida keki abu ana faṉa. Mamana ku soree isamulua, Kera ṉalia naa kwaiara kera.

¹⁷ Ma ni oe, si maṉa noki abu ana faṉa oki gwaia gwaumu, ma oki taua maamu;

¹⁸ Fasi imole ki e ai na keki rikia noki abu ana faṉa, Maka oe ana ne to thaufuni kai rikia: ma Maka oe, na kai rikia si do ne thaufuni, kai kwaiaraṉai oe.

¹⁹ Musi teiṉania ogogonia ki ifamulua ana fanua nei iano, kula na fufuru ma bura la kai faaaia, ma toa na keki bili keki ogebiu ma keka bili:

²⁰ Muka teiṉania ogogonia ki ifamulua i thalo, kula ne ai ta fufuru ma ka ai ta bura la si faaaia, ma toa na keki bili kesi ogebiu ma kesi bili:

²¹ Uria na si kula na ogogonia oe ni iei, ruruumu ka ni kula eri lau boo.

²² Laafa ana seena imole na ṉa maana: mania mada sa maamu e laa, seemu sui boo kai laa teefau.

²³ Ma mada sa maamu e taa, seemu sui boo kai rorodoa teefau. Mania mada sa lalaa la na ni ani oe e rorodoa, maerodo eri e baita!

²⁴ Ta wane sa ka ra ata ro wane inoto e ai: uria na mado e ai nia ka rikia ta wane ka taa bana, ma ka liothau ana ruana wane; mado nia kai roo ata wane, ma kai fare faekwa ata wane. Kamulua sa muki ra ifatha God ma inotoa e ai.

²⁵ Mania ku soree isamulua, Musi laloma fufuli sulia maṉomulua, uria si do na toto muki ania, ma si do na toto muki kuufia; ma sulia seemulua ka ai boo, uria si do na toto muki afisia. Si maṉo e ai si lea si tatha ana faṉa, ma seena imole e ai si lea si tatha ana maku?

²⁶ Rikia fasi thaaro i mamatalea ki, e ai kesi afusido, me ai kesi kwaia unii do ne rafo, me ai kesi konia faṉa i la biu ni aludo; sui Maka kamulua ne ni mei thalo kai thareda bana. Ni kamulua musi lea ka tatha anida?

²⁷ Ni tei iamulua sulia nia kai laloma fufuli kai thaitoomana lado lana tee kadee aba ana baita lana?

²⁸ Ma uria ta na muki laloma fufuli sulia maku? Muki manataia fasi ṉa rakao nei la ra, tae lana; e ai kesi ulafu, me ai kesi thauwai nia maku:

²⁹ Ma sui ku soree isamulua, Tha Solomona mena ana inotoa nia sui bana e ai si tooni ’uria ta do ana do eki.

³⁰ Mania mada sa tha God kai faatooni una eri ana lolo, na kai to bana itaraena i la ra, ma usuwadi keki u ania i la era ni naare la, nia ka ai si falea tooni ne lea ka tatha ifamulua, toa na fitooa kamulua e faekwa?

³¹ Mania musi laloma fufuli una eri, Si ta na mika ania? mado, Si ta na miki kuufia? mado, Si ta na mika afisia?

³² Sulia si do eki sui bana Jenetaele ki keki rofe uria; uria na Maka kamulua ne ni mei thalo e thaitoomana na muki rofea si do eki sui bana.

³³ Muki rofe totonao uria tooa tha God, ma kokoto la nia; ma si do eki sui bana keki safua bia ifamulua.

³⁴ Mania musi laloma fufuli lau uri usuwadi: uria na usuwadi kai laloma fufuli uri nia i talaana. Taa la eri e talaana fa boṉi eri.