Mathui 5 - Ṉa Alaofua Falu 1923 1949

¹ Ma si maṉa ne rikia malului wane, nia ka tae uri gwa tolo: ma si maṉa nia ono, toa nia ne toleda keka fula isana:

² Ma nia ifinia fokona, ka kwaifamanatai isada, ka una eri,

³ Lea iada, toa na kesi rikii do i spirit kera ki: uria na do kera ni naa tooa i thalo.

⁴ Lea iada, toa na keki tatao: uria na toto keki faa inamaruki kera.

⁵ Lea iada, toa na kera abula marabibi: uria na toto keki ṉalia fanua nei iano ifada.

⁶ Lea iada, toa na keki thaofa ma lioda ka lalaṉa uria kokoto la: uria na toto keki abusu.

⁷ Lea iada, toa na keki tatakomi: uria na toto keki tatakomida.

⁸ Lea iada, toa ruruude thathaulia: uria na toto keki rikia tha God.

⁹ Lea iada, toa na keki fofolo: uria na toto keki alaṉida ana kaluwane tha God ki.

¹⁰ Lea iada, toa na kera tona ilamatanida fafia kokoto la: uria na do kera ni naa tooa i thalo.

¹¹ Lea iamulua, si maṉa na keki tamani taa seemulua, ma keki tona ilamatai kamulua, ma keki lole fafi kamulua ana si do taa oro ki inunufaku.

¹² Muka seethathala, ma muka thalume ka baita ka tatha: sulia kwaiara kamulua e baita mai thalo lo: uria na kera tona ilamatai una eri ana porofeta inao ki mei.

¹³ Kamulua solita ana fanua nei iano: ma sui mada sa solita e ai si amalila naa, si ta na keka faaamalila ania? e ai si lea naa uria ta si do, do uria naṉa la ania ma uri lana ana aena imole.

¹⁴ Kamulua ṉa lalaa la i fanua nei iano. Toaa susu na kera kasia i gwauna fa ua so ka thaufuni e ai.

¹⁵ Bia laeta keki faatharua, e ai kesi alua ifara kwadee do, keki alua i fuila; ma kai laa isana toa eri sui na kera ni biu.

¹⁶ Una eri lau boo lalaa la na ka ni ani kamulua kei laa inaona imole, fasi keka rikia ra lea kamulua ki, ma keki taṉoa Maka kamulua ne ni mei thalo.

¹⁷ Ada muka soso so ku lae mai uria tofe la faisia ṉa lo mado porofeta ba ki: kwasi lae mai uria tofe la faisia e ai, ku lae mai uria faamamane lana.

¹⁸ Uria mamana ku soree isamulua, Maṉa na thalo lo ma fanua nei iano si tatha u, tee kasi kula mado tee kasi kula ne faekwa asia boo e ai dodoloa so ka tatha faisia ṉa lo, kai maasia si maṉa na toto keki faamamanea naa si do ki sui bana.

¹⁹ Mania ni tei bana na kai ade faisia tee si ṉata ana si ṉata fifi eki ne faekwa asia boo, ma kai to’oa isana imole keki ade una eri lau boo, toto keka alaṉi nia ana wane ne faekwa asia boo ana tooa i thalo: ma ni tei bana na kai ilia si ṉata fifi eki ne faekwa asia boo, ma kai to’oa, toto keka alaṉi nia ana wane ne baita ana tooa i thalo.

²⁰ Uria ku soree isamulua, Mada sa kokoto la kamulua e ai si talua kokoto la wane ni kekeda ki bia Farisi ki, kamulua e ai dodoloa muki kotho ana tooa i thalo.

²¹ Kamulua mulu roṉoi naa ba kera soree isana toa nai nao ki, Osi thathauwane; ma ni tei bana na kai thauwane kai to karaṉia kotu:

²² Ma ni nau ku soree isamulua, Ni tei na kai tona rakeiri uria doorana kai to karaṉia kotu; ma ni tei bana na kai soree isana doorana, O wane oewanea, kai to karaṉia ofu la; ma ni tei bana na kai sorea, O wane oewanea bonaa, kai to karaṉia hell ana era.

²³ Mania mado so fula fafia ta do oki falea ana foa la isana fulii era ni foa, sui oki to kula eri, oki onotoona dooramu manatana teo ani oe fafia ta si do,

²⁴ Oko ekwa fasi asi do oe noki falea i kula eri sana fulii era ni foa, lae amua, oko faasuia rakeiria eri totonao, dooramu moki ofu, sui oko bii lae mai uria fale lana si do oe noki falea.

²⁵ Oko diana fofoa liona maalimae oe, maṉa oki ni u sula tale bi nia; ada mado e ai maalimae eri kai fale oe ifana wane ni kotu, ma wane ni kotu eri kai fale oe ifana wane ni ili lana si do ki, keki sui oe uri la lokafu.

²⁶ Mamana ku soree isamu, E ai dodoloa oko kotho faisia kula eri, oko to maasia si maṉa no fale teefau ana malefo na kera alaṉi oe ki mania, ta ro migee lifoia mena si teo.

²⁷ Kamulua mulu roṉoi naa ba kera soree isana toa nai nao ki, Osi oee:

²⁸ Ma ni nau ku soree isamulua, Ni tei na kai lio uria ta kini ma si lio ni oea kai tae i manatana uria, e oe sui naa uria ana ruruuna.

²⁹ Ma mada sa balii maa aola oe kei faataofai oe, lafua, oko naṉa ania faisi oe: uria ne lea ifamu tee si do ana seemu kei ei, me ai kesi naṉa ana seemu sui boo i la hell.

³⁰ Ma mada sa balii aba aola oe kei faataofai oe, oki kwaemusia, ma oki naṉa ania faisi oe: uria ne lea ifamu na tee si do ana seemu kei ei, me ai kesi naṉa ana seemu sui boo i la hell.

³¹ Kera sosorea lau boo. Ni tei bana na kai arasia kwaina, kai falea ree do ni arasi lana na kera keda ifana:

³² Ma ni nau ku soree isamulua, Ni tei na kai arasia kwaina, ma kini eri e ai si oe, kai reroa nia kini ne oe: ma ni tei bana na kai tolea kini eri buriana kera arasia naa kai oe.

³³ Sui lau, kamulua mulu roṉoi naa ba kera sosoree isana toa nai nao ki, Osi to faisia ili lana si do no othia; oki ade sulia othi la oe ki ifatha Lord:

³⁴ Ma ni nau ku soree isamulua, E ai musi othi; ana thalo lo ka ai, uria na kula eri do ni ono tha God ana inotoa;

³⁵ Ana fanua nei iano ka ai lau boo, uria na kula eri do nia ana alu lana aaena ifafona; ana Jerusalema ka ai lau boo, uria na fanua eri toaa susu Kiṉa baita.

³⁶ Ma osi othi ana gwaumu, uria nosi thaitoomana thauwai lana ta tee kwakwee ifu kai kwakwaoa mado kai boboraa.

³⁷ Ṉata lamulua kai una eri, Iu, iu; E ai, e ai: ma atona bana si do na kai safua si ṉata eki si do tha Taa.

³⁸ Kamulua mulu roṉoi naa ba kera sosorea, Keki duua ta maa ata maa, ma ta gwa lifo ana ta gwa lifo:

³⁹ Ma ni nau ku soree isamulua, Musi suusi kamulua faisia wane ne taa: ma ni tei bana na kai fidalia balii babali aola oe, oko akeletania lau boo balii babali mauli oe ifana.

⁴⁰ Ma mada sa ta wane sorea lae moki kotu, ma kai ṉalia tooni lalo oe, oki alamatania lau boo tooni nai thara ifana.

⁴¹ Ma ni tei bana na kai bare oe uria lae la sulia ta tee maele, oko lae bi nia sulia ta ro ai.

⁴² Oko fale ana wane na kai gani oe, ma wane na kai gania do na toto kai duua, osi falaburi ani nia.

⁴³ Kamulua mulu roṉoi naa ba kera sosorea, Oko liothau ana wane oe, ma oko rikia maalimae oe ka taa:

⁴⁴ Ma ni nau ku soree isamulua, Muka liothau ana maalimae kamulua ki, muki falea lea la ifana toa na kera alua taa la kai to fafi kamulua, muki ade lea uria toa na kera riki kamulua ka taa, ma muka foa faisia toa na keki fare taa iamulua ma keki tona ilamatai kamulua;

⁴⁵ Fasi ṉa Maka kamulua ne ni mai thalo, wela nia ki na ni kamulua: uria nia kai adea thato nia kei tae ana toa na kera taa bia toa na kera lea, ma kai falea mai dani ana toa na kera kokoto bia toa na kesi kokoto.

⁴⁶ Uria na mada sa muki liothau ana toa na keki liothau iamulua, nifenia kwaiara kamulua? ta na sa toa na kera ṉalia takisi ki keki ade lau boo una eri, mado?

⁴⁷ Ma mada sa muki aratai lea la ana talitoona dooramiu ki bana, si ta na muki ilia kei eeta? ta na sa Jenetaele ki keki ade lau boo una eri, mado?

⁴⁸ Mania muka lea bonaa, ’uria na Maka kamulua ne ni mei thalo e lea bonaa.