Mathui 28 - Ṉa Alaofua Falu 1923 1949

¹ Asi maṉa ana oli lana fa boṉi mamaloa, si maṉa na kai dani afa boṉi totonao ana uiki, ni Meri Makadaline ka fula bia ruana Meri lau fasi keka rikia kwaiṉeia ba.

² Ma rikia fasi, tee anunu baita ka liu; uria na angel tha Lord e sifo mai faisia thalo, ka fula, ka abulisia kau fau eri, ma ka ono i fafona.

³ Riki lane ’uria manu, ma maku nia ka kwakwaoa mala sino:

⁴ Ma sulaania mau la ani nia toa eki na keki fono toi keka leleba, ma keka ’uria naa toa kera mae naa.

⁵ Ma angel e luuda, ka soree isana kini eki, Musi mamau: uria nau ku thaitoomana muki rofea tha Jesus, na kera fota fafia na ba.

⁶ E ai si ni kunei; uria ne tatae naa, ka ’uria ne sorea na ba. Lae mai, rikia si kula na ṉa Lord e teteo iei.

⁷ Ma muki lae fofoa, muka faaroṉoa toa nia ne toleda, Nia tatae naa faisia toa mae; ma rikia fasi, nia kai lae inaomulua uri Galili; kula eri muki riki nia iei: lio fasi, nau ku faaroṉokamulua naa.

⁸ Ma kera lae fofoa nada faisia kwaiṉeia eri fafia mau la ma seethathala la baita, ma keka fita fasi keka faaroṉo ania isana toa nia ne toleda.

⁹ Ma si maṉa na keki lae fasi keki faaroṉoa toa nia ne toleda, rikia fasi, tha Jesus ka toda anida, ka una eri, Muki seethathala. Ma kera fula, keka rau ana tafe ae nia ki, ma keka faabaita nia.

¹⁰ Sui tha Jesus ka soree isada, Musi mamau: lae, muki faaroṉoa dooraku kera keki lae kau uri Galili, ma toto keki riki nau kula eri.

¹¹ Ma si maṉa na keka lae nada, rikia fasi, tei wane ana toa eki na keki fono toi keka fula i la toaa susu, ma keka faaroṉoa wane inoto ni foa ki asi do eki sui bana ne fula mai.

¹² Ma si maṉa na kera ofu naa bia ulunao ki, ma keka furia ṉata sui naa, keka falea malefo oro ifana toa ana firua eki,

¹³ Keka una eri, Muki sorea, Toa nia ne toleda kera fula i la rodo, keka bili nia si maṉa na mili biṉa.

¹⁴ Ma mada sa do eri kai fula isana wane ni kotu kai roṉoa, do miki gae nia, fasi seemulua kai eno.

¹⁵ Mania keki ṉalia malefo eri neri, ma keka ili boo sulaania si do na kera to’oa isada: ma si ṉata eri kai to bana isana Ju ki, keki ṉata bada sulia ka fula itaraena.

¹⁶ Sui akwala eri ma tee wane ne toleda kera lae uri Galili, uri gwa tolo eri na tha Jesus e gwalua u boo isada.

¹⁷ Ma si maṉa na kera riki nia, keka faabaita nia: ma tei wane keka fitala.

¹⁸ Ma tha Jesus ka fula ma ka ṉata isada, ka una eri, Sukwaia sui bana kera falea naa ifaku i thalo mai ma i fanua nei iano.

¹⁹ Mania muki lae, muki to’oa si do ki isana kulee toa ki sui bana, muki babataesi kera ana thatana ṉa Maka ma ṉa Kaluwane ma tha Spirit Abu:

²⁰ Muki faamanatai kera keki manatatoona si do ki sui bana asi do eki ku fafaaroṉo kamulua ania: ma lio fasi, nau ku to bi kamulua sulia boṉi, lalae ka fula ana susui lana kada nei. Emeni.