Mathui 16 - Ṉa Alaofua Falu 1923 1949

¹ Ma Farisi ki bia Sadiusi ki kera fula, keka ilitoona, keka soree isana sa nia ka fatai nia bala ta si do i thalo mai isada.

² Nia luuda, ka soree isada, Si maṉa ne thaulafia naa, kamulua mulu sorea, Fanua kai thato lea: uria na thalo lo e memenaa.

³ Ma i uusuwadia mulu sorea, Fanua kai kuburua itaraena: uria na thalo lo e memenaa ma ka mafuaroa. Toa muka olodola, mulu thaitoomana olotoona lana seena thalo lo; ma sui mulu dora ana olotoona lana bala si maṉa eki.

⁴ Unii wane ne taa ma kai oe kai rofe uria bala si do; sui sa keki fatai nia bala ta si do isana e ai, talitoona bala tha Jona ṉa porofeta. Ma nia akwasida, ka lae nana.

⁵ Ma toa ne toleda kera fula bali laba ma liode dora, kesi ṉalia berede.

⁶ Sui tha Jesus ka soree isada, Muki to kinakina, muka fia lefena Farisi ki bia Sadiusi ki.

⁷ Ma kera ṉata uri kera i talaadalua, keka una eri, Uria na kusi ṉalia mai berede.

⁸ Ma tha Jesus e thaitoomana, ka soree isada, Toa na fitooa kamulua e faekwa, uria ta na muki ṉata uri kamulua i talaamulua, sulia ne ai amulua ta berede?

⁹ Musi thaitoomana u, ma musi onotoona lima bisikete ana lima tooni wane ba ki, ma nanadee do ba ki na mulu gwea na ba?

¹⁰ Bia fiu bisikete ana fai tooni wane ba ki, ma itee do ba ki na mulu gwea na ba?

¹¹ Nifana ade lana musi thaitoomana na nau kwasi ṉata isamulua sulia berede? Muka fia lefena Farisi ki bia Sadiusi ki.

¹² Ma keka bii filoa na nia e ai si sorea sa keka fia lefena ana berede e ai, si do na Farisi ki bia Sadiusi ki keki to’oa sa keka fia.

¹³ Ma si maṉa na tha Jesus e fula ana fanua kakali ki mai i Sesaria Filifae, nia ka soetoona toa nia ne toleda, ka una eri, Imole keki sorea ni tei bana ṉa Kaluwane imole?

¹⁴ Ma keka sorea, Tei toa keka sorea nia wane ni babataesi ba na tha Jone; ma tei toa keka sorea, tha Elaeja: ma tei toa lau keka sorea, tha Jeremaia ana, mado ta porofeta ana porofeta ba ki.

¹⁵ Nia ka soree isada, Ma ni kamulua muki sorea nau ni tei?

¹⁶ Ma tha Saimona Pita e luua, ka sorea, Oe ṉa Christ, Kaluwane ṉa God maruki.

¹⁷ Ma tha Jesus e luua, ka soree isana, Lea iamu, Saimona, kaluwane tha Jona: uria na imole, do ana mariko bia abu, e ai ne fatai nia isamu, Maka nau ana ne ni mei thalo

¹⁸ Ma nau ku sorea lau boo isamu, Ni oe tha Pita, ma fau baita nei kwai tabalia figua nau i fafona; ma maethaka eki fanua toa mae ki si kera so ka tatha fafia e ai.

¹⁹ Ma nau kwai falea ṉa ki eki ana tooa i thalo ifamu: ma atona bana si do noki kania i fanua nei iano keki kania i thalo: ma atona bana si do noki lukea i fanua nei iano keki lukea i thalo.

²⁰ Sui nia ka bae fifi isana toa ne toleda e ai kesi faaroṉoa ta wane na nia tha Jesus ṉa Christ.

²¹ Too asi maṉa eri tha Jesus e thafalia ka faaroṉoa toa nia ne toleda na kera too nia kai lae e ai si ei boo uri Jerusalema, ma kai to ana taa la oro ki e ai si ei boo sulia manatana ulunao ki ma wane inoto ni foa ki bia wane ni kekeda ki, ma keka thauṉi nia, ma nia kai tatae ana ula fa boṉi.

²² Sui tha Pita e tolea, ka bii sore nia, ka una eri, Si do eri ka to da faisi oe, Lord: sa ka fulatoomu ana ta si maṉa e ai.

²³ Ma nia akele, ka soree isatha Pita, Lae, oki tatha iburiku, Satan: oe ṉa si do ana faataofai laku: uria nosi manatatoona si do tha God ki, si do imole ki bana.

²⁴ Sui tha Jesus ka soree isana toa nia ne toleda, Mada sa ta wane kai thathamii lae iburiaku, nia kai sorea nia dora ani nia i talaana, kai ṉalia ’ai rarafolo nia, ma kai lae iburiaku.

²⁵ Uria ni tei bana ne thathamia kai faamarukia maṉona, maṉona kai aana: ma ni tei bana na kai faaaana maṉona inunufaku kai bii fulatoona.

²⁶ Uria si ta na ta wane kai ṉalia ana adomi lana, mada sa nia kai toda fanua nei iano sui bana, ma kai faaaana bana maṉona? mado si ta na ta wane kai falea kai taala ana maṉona?

²⁷ Sulaania Kaluwane imole kai lae mai ana inotoa Maka nia bia angel nia ki; ma asi maṉa eri nia kai kwaiaraṉai nia wane ni sui bana sulia abula lada.

²⁸ Mamana ku soree isamulua, Tei wane keki to bada ana toa na keki takwe kunei, ne ai dodoloa keki thaitoomana maea, keki rikia Kaluwane imole kai lae mai ana tooa nia, sui keka bii mae.