Mathui 11 - Ṉa Alaofua Falu 1923 1949

¹ Ma lalae mai, buriana na tha Jesus e faaroṉoa sui naa akwala ma ro wane nia ki ne toleda ana ade la sa keki ilia, nia lae kau fasi ka kwaifamanatai ma ka ṉata i la toaa susu kera ki.

² Ma si maṉa na tha Jone e roṉoa i la lokafu ra ṉa Christ ki, nia ka arasia ro wane ana toa nia ne toleda,

³ Ka soree isana, Oe wane ba na kai lae mai, mado miki lio uria ta wane eeta?

⁴ Tha Jesus e luuda, ka soree isada, Lae amaroa, moka faaroṉoa tha Jone asi do moki roṉodaki ma si do moki rikidaki:

⁵ Toa maade rodo keki lio naa, toa aede katu keki lae, toa uru e thauṉida keki faafaluda; toa aliṉade bani keki roṉo, ma toa mae keki tataeda, ma toa na kesi rikii do keki ṉata sulia faaroṉoa lea isada.

⁶ Ma lea ians, ni tei bana na ka ai si fulatoona ta si do ana faataofai lana ani nau.

⁷ Ma si maṉa na ro wane eki kero lae nadaroa, tha Jesus ka bii soree isana malului wane eki sulaania tha Jone, Si ta na mulu lalae kau uri fanua kwasi uri bubuṉi lana? fa ue na thauthau kai isua?

⁸ Ma sui si ta na mulu lalae kau uri fanua kwasi uria bubuṉi lana? wane ne tooni ana maku mausi? Rikia fasi, toa na kera tooni ana maku mausi kera ni ana biu kiṉa ki.

⁹ Si ta na mulu lalae kau uria? fasi muki rikia ta porofeta? Iu, nau ku soree isamulua, ma mulu lalae uria riki lana wane ne baita ka tatha ana porofeta.

¹⁰ Wane eri boo neri, na kera kekeda sulia na ba, Rikia fasi, kwai arasia wane nau ana ṉaliṉata kai tatha inaona maamu, Nia kai beta tala oe maakwali oe.

¹¹ Mamana ku soree isamulua, Ana toa na kera futa ana kini ki e ai ta wane ne baita ka tatha ana wane eri ni babataesi na tha Jone si fula u: una ena mena, wane ne faekwa bana ana tooa i thalo e baita ka tatha ani nia.

¹² Ma too ana si maṉa na wane ni babataesi na tha Jone e to u na ba ka fula asi maṉa eri tooa i thalo keki kwaisuuwai uria, ma toa na kera kwaisuuwai uria keki laua.

¹³ Uria na porofeta ki sui bana bia ṉa lo kera ṉaṉata, sui tha Jone ka fula.

¹⁴ Ma mada sa mulu thathamii ala fafia si kula eri, nia tha Elaeja, na kai lae mai.

¹⁵ Wane ana ta ro aliṉa uria roṉo la, nia kai roṉoi fasi.

¹⁶ Nifana si do na kwai toolaṉania ana unii wane nei? E ’uria kala wela na keki ono isana usia ki, na keki ’ai kau uria too lada,

¹⁷ Ma keka sorea, Kamilia mili ufifia aga uri kamulua, me ai musi wae boo; mili tatao uri kamulua, me ai musi aṉi boo.

¹⁸ Uria na tha Jone e fula, e ai si faṉa ma ka ai si kuu, ma keka sorea, Spirit taa ni ani nia.

¹⁹ Kaluwane imole e fula, ka faṉa ma ka kuu, ma keka sorea, Rikia fasi, wane kai fafaṉa kwasi, ma kai kuu ṉado ana waene, wane ne ado bia wane na kera ṉalia takisi ki bia toa kera abula taa! Ma liotooa, wela nia ki kera faamamanea na nia e kokoto.

²⁰ Sui nia kai bii sorea toaa susu eki kula na kera ilia baita lana ra baita nia ki iei, uria ne ai kesi akeletania manatada.

²¹ Taa la kai thauṉi oe, Korasina! taa la kai thauṉi oe, Betheseida! uria na ra baita ba ki na kera ililia ani kamaroa so kera ilia i Taera ma i Saedona, do keki akeletania u naa manatada ana maku rarasieila ma foa.

²² Una ena mena, ku soree isamulua, Si do taa na kai uria i Taera ma i Saedona afa boṉi ana kotu baita, kai faekwa asi do na kai uri kamaroa.

²³ Ma ni oe, Kapaneama, na kera kwau oa ia uri thalo, keki sifo fafi oe uri fanua toa mae: uria na ra baita ba ki na kera ililia ani oe so kera ilia i Sodomo, do kai to u bana ka fula itaraena.

²⁴ Una ena mena, ku soree isamulua, Si do taa na kai uria fanua i Sodomo afa boṉi ana kotu baita, kai faekwa asi do na kai uri oe.

²⁵ Asi maṉa eri tha Jesus e luua, ka sorea, Nau ku sore lea iamu, Maka ae, Lord ana thalo lo ma fanua nei iano, uria na thaufunia si do eki faisia toa liode too ma toa manatade kali, mo fatai nia isana wela aabu ki:

²⁶ Iu, Maka, sulia si do una eri o rikia ka lea.

²⁷ Si do ki sui bana Maka nau e falea naa ifaku: me ai ta wane si thaitoomana ṉa Kaluwane, talitoona ṉa Maka e thaitoomana; me ai ta wane si thaitoomana ṉa Maka, talitoona ṉa Kaluwane e thaitoomana, bia ni tei bana na ṉa Kaluwane e thathamia kai fatai nia isana.

²⁸ Lae mai isaku, kamulua sui, toa na muki ulafu ma muki ṉali kulua, ma nau kwai falea mamaloa ifamulua.

²⁹ Kwaua ioke nau, alua fafi kamulua, ma muka ili uria si do kwai tooa; uria nau ku abula marabibi ma ku kelawanea i ruruuku: ma muki fulatoona mamaloa uria maṉomulua.

³⁰ Uria na ioke nau e lea, ma si do nau na keki ṉalia e thathala.