Mathui 10 - Ṉa Alaofua Falu 1923 1949

¹ Ma nia ailia mai akwala ma ro wane nia ne toleda isana, ma ka falea sukwaia ifada fafia spirit taa ki, fasi keki arasida, bia fasi keki faamarukia toa na si do oro ki bana e thauṉida bia toa na kera matai ana mataia oro ki.

² Ma thatana akwala ma ro aposela ki nania: Wane inao, tha Saimona, na kera alaṉia atha Pita, ma doorana na tha Adaru; tha Jemesi kaluwane tha Sebede, ma doorana na tha Jone;

³ Tha Filifi, ma tha Batholomiu; tha Tomasi, ma tha Mathiu wane ne ṉaṉalia takisi ki; tha Jemesi kaluwane tha Alafiasi, ma tha Lebeasi, na kera alaṉia atha Thadeasi;

⁴ Tha Saimona ṉa Kenanaete, ma tha Judasi Isikarioto, wane eri lau boo ne faaalamai nia.

⁵ Akwala ma ro wane eki tha Jesus e arasida kau, ma ka faaroṉoda, ka una eri, Musi lae sula tale na kai lae isana Jenetaele ki, ma musi lae i la toaa susu toa i Sameria:

⁶ Ma sifi ne garo ana toa tha Isirela molo muka lae isada.

⁷ Ma si maṉa na muki lae, muki ṉata una eri, Tooa i thalo e ni karafi naa.

⁸ Faamarukia toa kera matai, faafalua toa na uru e thauṉida, tataea toa kera mae, arasia spirit taa ki: mulu tona ṉali, muki tona fale.

⁹ Musi thaluwania ta goloda, mado ta silifa, mado ta malefo ana thalo aadilaa i la wai ni alumalefo kamulua ki;

¹⁰ Bia musi ṉalia ta wai uria laea kamulua, ma musi tooni ana ro tooni, musi alua butu ki, ma ta kubau ka ai: uria na wane ni ra e farana kai faṉa.

¹¹ Ma toaa susu ifei mado toaa faekwa ifei na toto muki lae iei, muki rofe uria ni tei ana fanua eri e farana; ma muki to kula eri maasia si maṉa na muki lae kau.

¹² Ma si maṉa na muki kotho i biu, muki aratania toa eri.

¹³ Ma mada sa biu eri e farana, enenoa kamulua kai fula fafia: mada se ai si farana, enenoa kamulua kai oli mai isamulua.

¹⁴ Ma ni tei bana na kai lalakwee thathagoni kamulua mai, ma ka lalakwee roṉoa bae lamulua, si maṉa na muki lae kau faisia biu eri mado toaa susu eri, muki tagaraṉai nia gegeona theegano ana aemulua.

¹⁵ Mamana ku soree isamulua, Si do taa na kai uria fanua i Sodomo ma i Gomora kai faekwa asi do taa na kai uria toaa susu eri, afa boṉi ana kotu baita.

¹⁶ Rikia fasi, nau ku arasi kamulua kau muka ’uria sifi i maalutana koito kwasi ki: mania liomulua kai too ’uria wa aala ki, ma manatamulua kai dodoloa ’uria manatana bola ki.

¹⁷ Muki fia imole: uria na toto keki fale kamulua ifana ofu la ki, ma keki kwae tataria ana sulimulua i la biu ni ofu la kera ki;

¹⁸ iu ma toto keki talai kamulua mai isana inaofana wane inoto ki ma kiṉa ki inunufaku, uria faamamane la isadalua bia Jenetaele ki.

¹⁹ Ma si maṉa na keki fale kamulua, musi laloma fufuli uria ṉata la na toto muki ṉata ania, mado si do na toto muki sorea: sulia kadee maṉa eri keki falea si do na muki sorea ifamulua.

²⁰ Uria ni kamulua e ai na muki ṉata neri, Spirit Maka kamulua ana kai ṉata ani kamulua.

²¹ Ma wane kai falea doorana uria mae la, ma wane ana wela kai falea wela nia: ma ta baree wela keki lalakwatai nia maka kera ki bia thainada kera, ma keki adea keki thauṉida.

²² Ma toto toa ni sui bana keki riki kamulua ka taa inunufana thataku: ma wane na kai susuu ka fula ana ṉa susui la, wane eri keki faamaruki nia.

²³ Ma lalae keki tona ilamatai kamulua i la toaa susu nei, muki thaka uria toaa iburiana: uria na mamana ku soree isamulua, Musi lae i la toaa susu i Isirela ki si sui u, ma Kaluwane imole ka fula.

²⁴ Wane na kera tolea e ai si inoto ana wane ni kwaifamanatai nia, ma wane ni ra e ai si inoto ana wane inoto nia.

²⁵ Si do baita ni bonaa na wane kera tolea kai ’uria wane ni kwaifamanatai nia, ma wane ni ra kai ’uria wane inoto nia. Mada sa kera alaṉia wane ana biu eri ana Bielasibaba, toa i la biu nia, sulia tonee toa ni bana, keki bii alaṉida ania!

²⁶ Mania musi mau anida: uria ne ai ta si do kera thu agwa fafia, na toto kesi fatai nia; me ai ta si do kera thaufunia, na toto kesi thaitoomana.

²⁷ Si do ku faaroṉo kamulua ania i la maerodo, muki sorea i la lalaa la: ma si do kera fuaroṉania, muki ’ai kwaitalofi ania i fafo biu ki.

²⁸ Ma musi mau ana toa na keki thauṉia seena imole, ma sui kesi talaana thauṉi lana si maṉo: muki mau molo ani nia ne talaana labatai lana si maṉo bia seena imole i la hell.

²⁹ Ta na sa ro geraa ki keki usi ania uria ta ro migee lifoia, mado? ma ta do iada so ka aru i theegano e ai, mada sa Maka kamulua e ai si alamatai nia;

³⁰ Ma ifuna gwaumulua ki mena kera teemai nia ka sui.

³¹ Mania musi mau; kamulua mulu lea ka tatha ana geraa oro ki.

³² Mania ni tei bana na kai faamamane nau inaofana imole, nia lau boo kwai faamamane nia inaofana Maka nau ne ni mei thalo.

³³ Ma ni tei bana na kai sorea e dora ani nau inaofana imole, ni nau lau boo toto kwai sorea ku dora ani nia inaofana Maka nau ne ni mei thalo.

³⁴ Ada manatamulua soso ku fula uria naṉa la ana enenoa i fanua nei iano: kwasi fula uria naṉa la ana enenoa e ai, nini ni firu ni ana!

³⁵ Uria nau ku fula fasi ta wane si kwaimani bia maka nia, ma thari si kwaimani bia thainana, ma kinifuṉao si kwaimani bia thainana kwaina:

³⁶ Ma toa eri lau bana na kera ni la maafera ta wane keki maalimae ani nia.

³⁷ Wane na kai liothau ana maka nia mado thainana ka tatha ani nau e ai si faraku; ma wane na kai liothau ana kaluwane nia mado thari nia ka tatha ani nau e ai si faraku.

³⁸ Ma wane ne ai si ṉalia ’ai rarafolo nia ma si lae iburiaku, e ai si faraku.

³⁹ Wane ne fulatoona maṉona, maṉona kai aana lau bana faisi nia; ma wane ne faaaana maṉona inunufaku kai fulatoona.

⁴⁰ Wane na kai thathagona kamulua kai thathagoni nau, ma wane na kai thathagoni nau kai thathagoni nia ne arasi nau mai.

⁴¹ Wane na kai thathagonia ta porofeta sulia nia ṉa porofeta toto kai ṉalia kwaiara porofeta; ma wane na kai thathagonia wane kokoto sulia nia wane kokoto kai ṉalia kwaiara wane kokoto.

⁴² Ma ni tei bana na kai falea ta titiui kafo gwari ni bana ifata wane ana wane faekwa nei ki kei kuu, sulia nia wane na nau ku tolea, mamana ku soree isamulua, sa kwaiara nia ka ai e ai.