I. Timothi 3 - Ṉa Alaofua Falu 1923 1949

¹ Si ṉata eri e mamana, Mada sa ta wane thathamii ra ana nanao la, ni nia e thathamia ra lea

² Mania wane nanao kai dodoloa, ana tee kwai boo, seena si inoto ani nia, kai seeeno, abula lana kai kokoto, kai beta ṉado sulia toa kwaita ki, liona kai too uria kwaifamanatai la;

³ E ai si kukuufia waene, e ai si firu ana abana, e ai si ogogoni ana malefo ne faataali kia; kai abula thathaore, si thathamii oli susuu, e ai si thathamia si do kera ki;

⁴ Wane na kai ana ni lea la ana maafera nia, ma wela nia ki keki roo suli nia ana enenoa;

⁵ (Uria mada sa ta wane ka dora ania ana la ana maa fera nia i talaana, kai beta ufita sulia figua tha God?)

⁶ Wane ne bii fitoo e ai, ada kai tala faabaita nia i talaana, ka tatha ana kwae la na kera kwaea atha devil.

⁷ Ma sui lau boo toa nai thara keki ala fafi nia; ada keka esi nia ma ka liu ana aikwai tha devil.

⁸ Una eri lau boo wane ni ra ki keki taiṉei, ka ai ada ta ro ṉata, kesi kukuufia waene, kesi ogogoni ana malefo ne faataali kia;

⁹ Keki rau asi do eki ne toto thaufuni na kulu fitoona, asi lio ne thathaulia.

¹⁰ Ma keki lio totonao uria abula lana toa eki lau boo; sui keki bii ra ana ra eri, mada sa kera dodoloa.

¹¹ Una eri lau boo kini ki keki to taiṉei, kesi lolole fafia imole, seeda si inoto iada, keki mamana asi do ki sui.

¹² Wane ni ra ki keki tolea boo tee kwai, keki ana ni lea la ana wela kera ki ma maafera kera ki.

¹³ Sulaania toa na kera ra lea ana ra eri keka fulatoona na kera ala fafida, ma keki seeraa faamau asi do eki na kulu fitoona na ni atha Christ Jesus.

¹⁴ Si do eki ku keda kau isamu, si maṉa ku thathamia kwai maka fula isamu;

¹⁵ Ma sui mada sa kwai to tau u, fasi oki thaitoomana abula la ne kokoto ana imole i lala biu tha God, na figua ṉa God maruki, betana mamana la eri ma si do ne takwe i fafona.

¹⁶ Me ai ta wane si tofea na do eri ne toto thaufuni asi lio ni fare baita la atha God e baita; kera fatai nia tha God ana seena imole, kera ala fafia kokoto lana atha Spirit, angel ki kera rikia, kera ṉata sulia isana Jenetaele ki, kera fitoona i fanua nei iano, kera tataea ana inotoa.