I. Korinitha 2 - Ṉa Alaofua Falu 1923 1949

¹ Ma ni nau, doora kera, si maṉa nau ku fula isamulua na ba, e ai kwasi fula ana ṉata laku mado ana liotooa nau ne inoto, si maṉa ba na nau ku faaroṉo lalaa asi do thaufuni tha God isamulua.

² Uria nau ku alua manataku ana tee si lio fasi e ai kwasi thaitoomana lau ta do i maalutamulua, talitoona bana tha Jesus Christ, nia na kera fota fafi nia ana ’ai rarafolo.

³ Ma nau ku toto isamulua ana feda la, ma ana mau la, ma ana leleba la baita.

⁴ Ma ṉata laku ma si do na nau ku ṉata sulia, ana si baea gwagwaria wane na lione too e ai, ana fatai lana ra tha Spirit ma ana sukwaia bana:

⁵ Fasi fitooa kamulua ka ai si to ana liotooa imole ki, ana sukwaia tha God ni ana.

⁶ Ma sui mili ṉata mala wane na lione too i maalutana toa na kera manata naa: sui ana liotooa i kada nei e ai, ma ana liotooa toa inoto ki i kada nei, na toto keki sui, ka ai lau boo:

⁷ Liotooa tha God neri na mili ṉata sulia asi do ne toto thaufuni, liotooa eri na kera agwafai nia inao, na tha God e alua mai inao inaofana thafali lana si maṉa totonao ki uria faainoto lakulua la:

⁸ Si do ne ai ta imole ana wane gwauwai i kada nei ki si thaitoomana: uria na mada sa kera thaitoomana bada, kesi fota fafia ṉa Lord, ne inoto ka tatha, ana ’ai rarafolo:

⁹ Ma ’uria si do na kera keda, Si do na maana imole si rikidaki, ma aliṉana si roṉoa. Na ruruuna imole si lalomatoona, Si do ki sui bana na tha God e thathaia maakwalia toa na kera liothau ani nia.

¹⁰ Ma tha God e fatai lalaa asi do eki isamilia atha Spirit: uria na tha Spirit ka rofea i maalutana si do ki sui bana, iu, si do tha God ki ne sifo ladoa.

¹¹ Uria ni tei ana wane ki ka thaitoomana si do ta wane? talitoona bana spirit wane eri na ni ani nia: talafana lau boo si do tha God ki e ai ta imole si thaitoomana, talitoona bana Spirit tha God.

¹² Me ai misi ṉalia spirit fanua nei iano, tha Spirit ne ita mai atha God ni ana; fasi mika thaitoomana si do ba ki na tha God e tona falea iamilia.

¹³ Ma si do eki mika ṉata lau boo sulia, ana si baea na liotooa imole ka tooa isamilia e ai, asi baea na tha Spirit ana e tooa; mili faaroṉo asi do tha Spirit ki asi ṉata tha Spirit ki.

¹⁴ Ma wane mala fanua nei iano sa ka ala fafia si do Spirit tha God ki e ai: sulaania nia alaṉia ana oewanea la; ma nia dora ana thaitoomana lana, uria na tha Spirit ana ka ṉata mala wane ni kotu sulia si do eki.

¹⁵ Ma wane tha Spirit ka ṉata mala wane ni kotu sulia si do ki sui bana, me ai ta wane si ṉata una eri suli nia.

¹⁶ Uria ni tei ne thaitoomana manatana tha Lord, fasi kai kwaifamanatai isana? Ma manatana tha Christ ka to ani kamilia.