Luke 12 - To'abaita Scripture NT

Kwaifa'amanataia sulia na lolelaa

¹ 'Ana si manga 'eri la'u bo'o, te'e ofufua 'ana malulu'i wane kera figu mai, adedea keka urida kwailiu na'a. Ma tha Jisas ka thafali ba'e tooto'ona'o 'una 'eri ura disaebol nia ki, “Muka fiia na iisi 'aina Farasi ki na abulalaa 'ana kwaiilifa'ilaa sulia kokotolaa.

² Doo ki na 'e tha'ufuni, tootoo keki thaito'omana, mada na doo agwa ki tootoo kai too laala'a.

³ Ma taa na mulu sore'a 'i laa ma'e rodo, keki rongoa 'i laa laala'a. Ma taa na mulu fu'arotania 'ana ta si kula banita'i laa biu ki, keki fa'ataloa 'i fafo biu ki.”

Talifilia tha God bona'a muka ma'unia

⁴ “Nau ku fa'arongo kamalu'a wane kwaimani nau ki, a'i musi ma'u la'u 'ana tei kera na keki thaungia se'edoo ma 'i buira a'i kesi iilia la'u ta si doo.

⁵ Nau kwai faatania tei na muki ma'u nia: Ma'u 'ani tei na buira si manga 'e thaungia se'edoo kamulu'a sui ka too 'ana suukwa'ia uria na kai 'uu 'ani kamalu'a 'i laa era na 'e tootoo si sui. Iu, ku sore'a 'i samulu'a, muki ma'u 'ani nia.”

⁶ “Ma lima fa gera'a kera usi 'anida 'ana roo kali fa seleni bana na ba. Sui God 'e a'i si liodora bo'o 'ana te'e fa doo 'ani kera.

⁷ Ma ifuna gwa'umulu'a mena, tha God 'e te'emanida te'efau. 'E a'i musi ma'u, liulamalu'a 'e talua gera'a 'oro ki.”

⁸ “Nau ku fa'arongo kamalu'a, tei bana na 'e faare'inoto 'ani nau 'i na'ofana imole ki, kaluwane imole kai faare'inoto 'ani nia la'u bo'o 'i na'ofana ensolo tha God ki.

⁹ Ma tei bana na 'e faarefa'ekwa 'ani nau 'i na'ofana imole ki, kwai faarefa'ekwa 'ani nia 'i na'ofana ensolo tha God ki.”

¹⁰ “Ma ta imole na 'e ngata labatania kaluwane imole keki lube kera bana, ma tei bana na 'e ngata faarefa'ekwa 'ana Ano'edoo Abu 'e a'i kesi manatalubea.”

¹¹ “Si manga na kera talai kamalu'a ura laa bi'u ni fo'alaa, ma 'i na'ofana wane'inoto ma to'a gwaunga'i ki, musi manata isifuufuli la'u sulia taa na muki lu'ua 'anida mada taa na muki sore'a,

¹² sulia Ano'edoo Abu na kai to'olangania 'i samulu'a si taa na muki sore'a 'ana si manga 'eri.”

Tarifula sulia na wane riki'i doo na 'e o'ewane'a

¹³ Te'e wane la figua 'eri ka ba'e 'una 'eri uri nia, “Wane ni to'odoo 'ae, fa'arongoa do'oraku ura kai ukalia nga aludooa ki na maka kamare'a 'e 'akwasia 'i famare'a.”

¹⁴ Ma tha Jisas 'e lu'ua ka 'una 'eri, “Wane nau 'ae, tei na falea suukwa'ia ura na kwai soredoo mada kwai ukalidoo 'i ma'alutamaro'a?”

¹⁵ Sui nia ka fa'arongo kera, “Moko fiia, ma moko beta kamaro'a fasia na birangaa 'oro 'ee'eta ki 'ana oogonilaa, sulia marukia 'e a'i si ni ngado 'ana riki'i doo 'oro ki.”

¹⁶ Ma nia ka fa'arongo kera 'ana si tarifula ne'e, “Na o'ola 'i laa na gano te'e wane riki'i doo 'e rafo maka 'oro.

¹⁷ Ma nia ka manata 'ana tala'ana, ka 'una 'eri, ‘Taa na kwai ilia? Nau 'e a'i kwasi too na'a 'ana ta si kula ura betalana foana o'ola nau ki.

¹⁸ Sui nia ka 'una 'eri, nau kwai ogea biu ni alu doo nau ki ma kwa kasia biu na 'e ba'ita, ma kwa alua fo'e 'ai nau ki ma doo nau ki sui 'i ei.

¹⁹ Sui nau kwa sore'a 'i saku 'i tala'aku, 'o too na'a 'ana doo 'oro tala'ana fa ngali 'oro ki. Mamalo 'amu'a, 'oko fanga, 'oko ku'u ma 'oko se'ethaathala 'amu'a.’

²⁰ Sui ta, tha God ka ba'e 'una 'eri uri nia, ‘'O o'ewane'a! Laa fa rodo na 'i tara'ena 'oki ma'e. Sui 'una 'eri tei na kai ngalia doo ki na 'o kwaithathai 'ania 'i femu?’ ”

²¹ “Si doo 'una 'eri na kai fuli 'ana wane na kera ofu doo ki 'i fada tala'ada, sui 'i na'ofana tha God kera, 'e a'i kesi riki'idoo.”

Fito'ona tha God

²² Sui tha Jisas ka ba'e 'una 'eri uria disaepol nia ki, “Adelana bo'o, ku sore'a samulu'a, a'i musi manata isifuufuli sulia taa na muki 'ania, ma taa na muki 'afisia.

²³ Sulia na marukia 'e le'a ka tatha ka talua na fanga, ma se'edoo 'e le'a ka tatha ka talua na maku.

²⁴ Rikia fasi na tha'aro ki, kesi fasi doo bo'o mada kesi kwa'ia bo'o ta o'ola, mada kesi too bo'o 'ana bi'u ni alufangalaa. Sui, tha God 'e thareda bana. Liulamalu'a ba'ita ka talua tha'aro ki 'i maana tha God.

²⁵ “Tei amalu'a na si manga manatana 'e isifuufuli kai ladoa la'u ta si kade'e si manga 'ana marukia nia?

²⁶ Ma mada sa 'e a'i musi tala'ana ililana si doo fa'ekwa ura fa'ataulana marukilamu, uria taa na muka manata isifuufuli 'ana doo ba'ita ki la'u?

²⁷ “Rikia fasi na ta'elana lolo kwasi ki. 'E a'i kesi raa bo'o, ma a'i kesi thaungania bo'o ta maku fada. Sui ku fa'arongo kamalu'a, tha Solomon mena 'i laa riki'idoo nia 'e a'i si to'oni le'a bo'o mala ni kera.

²⁸ Mada sa tha God 'e fa'a'afisia na lolo na tha'egano 'una 'eri, doo na 'e too 'i tara'ena sui 'usungedi keka 'uu la'u bada 'ania 'i laa era, ma nia kai thai bona'a suli 'oe neri. 'Oe doo na fiito'oa 'oe 'e fa'ekwa!

²⁹ “'E a'i musi manata isifuufuli sulia taa na muka 'ania, ma taa na muka ku'ufia.

³⁰ Sulia wane ki na kesi adesulia tha God, nia na kera isifuufuli buira doo 'eki, sui maka kamalu'a 'i thalo 'e thaito'omana bana mulu 'ato'ia doo 'eki.

³¹ Muka manata fiifii 'amalu'a sulia 'inotoa tha God ka talua doo 'eki sui bo'o, ma nia kai falea 'i famalu'a doo ki sui na mulu 'ato'ia.”

Kwaifa'amanataia sulia tootodaa 'i thalo

³² Sui tha Jisas ka ba'e la'u 'una 'eri, “Musi ma'u, sifisifi nau ki na musi 'oro. Sulia maka kamalu'a 'e se'ethaathala ura falelana 'inotoa nia 'i famalu'a.

³³ Muka uusi 'ana aludooa kamalu'a ki ma muka fale 'ana to'a baro ki. Muki too 'ana wa'i ni alu malefolaa ki 'i thalo, na 'e 'afeta'i ka fufu'a, ma oogogonia 'i thalo na 'e too banita'i 'ana kula na 'e 'afeta'i ta wane ni bili si fula karangia, ma a'i ta fufu si labatania.

³⁴ Uria fei bana na oogogonia le'a 'oe ki 'e ni 'i ei, thathamilaa 'ana mangomu 'e ni la'u bo'o kula 'eri.

Wane ni raa ki muka too ni kwaithathailaa

³⁵ “Muka too ni kwaima'akwalilaa ma'asia raalaa ma muka alua na la'afa kamalu'a kai la'a 'ana,

³⁶ 'uria wanenira ki na kera ma'asia na wane 'inoto kera kai oli mai fasia ta faafangaa 'ana luma'aa. Si manga 'e fula mai ma ka kiikidi, kera 'eli'eli ma keka 'ifinia bona'a 'olofolo 'i fana.

³⁷ Ka le'a fana na wanenira 'eki na kera kwaithathai si manga na wane'inoto kera 'e oli mai. 'E mamana ku sore'a 'i samulu'a, nia kai fa'a'onofa'i kera te'efau, ka 'afisia to'oni ni raa nia ma ka thareda.

³⁸ Ka lae mena mai la 'inito'ona fa rodo, mada 'i thaathala 'ana dani, sui ta si manga bana na kai fula, nia kai kwaiarangania wanenira nia ki na kera kwaithathai.

³⁹ “Sui 'oko thaito'omana, mada sa wane 'ana luma 'e thaito'omana si manga na wane ni bili kai fula mai, 'e 'afeta'i na wane ni bili ka kotho laa na luma nia.

⁴⁰ Kamalu'a la'u bo'o muka too ni kwaima'akwalilaa, sulia kaluwane imole kai fula mai 'ana si manga na musi fiia bo'o na kai fula mai.”

Tarifula sulia roo wanenira ki

⁴¹ Tha Pita ka ba'e 'una 'eri, “Lord, 'o fa'arongo 'ana tarifula 'eri famili'a bana neri, mada 'e a'i, fana imole ki sui?”

⁴² Nga Lord 'e lu'ua ka sore'a, “Nga wanenira na 'e raa mamana maka kokota na wane'inoto kai alu nia ura liolaa sulia wanenira nia ki, ura falelana si moringa 'ana fangalaa kera ki 'ana si manga ni fangalaa.

⁴³ 'E le'a fana nga wanenira 'eri, na wane'inoto 'e fula mai ka fulato'ona 'e ilia si raa 'eki!

⁴⁴ Mamana ku sore'a 'i samulu'a, nia kai alua wanenira 'eri ura liolaa sulia aludooa nia ki sui.

⁴⁵ Sui mada sa wanenira 'eri ka manata 'una 'eri 'i tala'ana, ‘wane'inoto nau 'e tau 'uu bana ura olilaa mai neri.’ Ma nia ka thafali kwa'ea na'a tei wanenira 'eki la'u. Ma ka too ni fangalaa ni bana, ma ku'ulaa ni bana ka daraga na'a.

⁴⁶ Wane'inoto ba ka fula ni fa'atonalana 'ana si manga 'e a'i si fiia bana. Nia kai falea kwaakwa'ea ba'ita 'asia na'a fana, ma ka alu nia 'asi kula to'a kesi fa'amamane.

⁴⁷ “Ma wanenira na 'e thaito'omana bana taa na wane'inoto 'e thathamia, ma ka a'i si kwaithathai, ma si ilia si raa 'eri, kai fulato'ona kwaakwa'ea ba'ita.

⁴⁸ Sui, tei na 'e a'i si thaito'omana, ma ka ilia si doo ne tala'ana kwaakwa'elaa, keki falea kwaakwa'ea fa'ekwa bo'o fana. “Fana tei bana kera takofalea 'ana si doo 'oro ki, si doo 'oro ki la'u bo'o na keki gani ura kai olitania.”

Enenoa a'i, ukalilaa

⁴⁹ “Nau ku lae mai ura su'unilana na fanua nai iano, ma 'ana thathamilaa nau era 'eri sa kai thafali tharu 'uu na mai!

⁵⁰ Sui na babataesilaa 'ana se'efiia ba'ita na kwai tathafia, ma kulu'alaa ba'ita ka too faafi nau ka fula bo'o 'ana si manga se'efiia 'eri ka sui.

⁵¹ Ma mulu sosa 'amalu'a ku fula mai biia enenoa laa fanua nai iano? 'E a'i! Ku fula mai bia ukalilaa.

⁵² 'Ita 'i tara'ena ka oli 'ala'a, na tooa 'ana lima imole keki ukali ma'alutada, ulu imole keki ila bia roo imole, ma roo imole keki ila bia ulu imole.

⁵³ Keki ukali, maka kai ila bia kaluwane nia, ma kaluwane ka ila bia maka nia, ma thaina ka ila bia thaari nia, ma thaari ka ila bia thaina, ma waifunga kini ka ila bia kinifungao nia, ma kinifungao ka ila bia waifunga kini nia.”

'Inifitalana si manga ki

⁵⁴ Tha Jisas 'e ba'e la'u 'i laa ofufua ba'ita 'eri ka sore'a, “Si manga na mulu rikia si datha 'e ta'e mai fasia suulana thato, muka thaito'omana na dani kai 'aru. Ma dani ka 'aru mamana bona'a.

⁵⁵ Ma mada sa thauthau ka ta'e mai fasi muutana fanua, muka sore'a, ‘Nia kai 'aa'ako,’ ma ka 'una 'eri bona'a.

⁵⁶ Mulu o'ewane'a! Sulia mulu thaito'omana bamalu'a 'inifitalana fanua nai iano bia maamangaa. 'Ufita fata'i na muka dora 'ana 'inifitalana si manga nai tara'ena.”

'Oko kokota 'oe bia tha God

⁵⁷ “Ura taa na musi tala filia 'amalu'a taa na 'e kokota?

⁵⁸ Si manga na 'o ni sula tala ura kula ni keeketoa bia tei ne 'alangi 'oe 'ana garolaa, ili ura kokotalana si garolaa 'eri sui fata'i 'oko fula si kula 'eri, 'ana tei na 'alangi 'oe 'ana garolaa ka tara 'oe 'i na'ofana na wane ni keeketoa, ma wane ni keeketoa ka fale 'oe 'abana wane ni kaakani wane, ma wane ni kaakani wane ka 'uu 'ani 'oe laa lokafo.

⁵⁹ Ku fa'arongo 'oe, 'oe 'osi kotho bona'a 'i ma laalae ka fula 'ana si manga na 'o du'ua si malefo 'i'isi 'eri.”