Markus 3 - Miyawa

Yesu lai wi basa Pakusɨ mukwa Sawakɨ

¹ Daga ɗame wuya Yesu dɨmɨna zusa Bali mana pagham,wi sim basa pakusɨ dɨ jeyi.

² Niwi aɗe tlɨn dɨ va ti Yesu dama kuyusa lyapɨ, j e tlɨne va ya giɗi ko dɨ laiya gam mukwa sawakɨ.

³ Yesu dɨ ɗɨnga ba sɨsa pakusɨka ndu, “Tlakwe tsatsɨr vɨnatlɨn.”

⁴ Je tsiya tlɨnaYesu du, “Madɨ kɨsa mukwa sawaka: ɗɨmakɨ saɗaɗawa ko ɗɨmaka mbirsɨ wa, bɨraka rayiwa ko takɨ viyyowa?” Ama dɨ maka ndɨ natlɨn.

⁵ Yesu dɨ nayatlɨna a kɨmayakɨ ta canhɨ, tɨ data ɗaɗuwa ghama kwasa-kwasa canhɨ natlɨn, dɨ ɗɨnga sɨnka du, “Tsaɗe kɨnfu.” Je te tsaɗe kɨnwasɨka dɨ lai njaal.

⁶ Nda bawahiya tlɨna farasiyawa dɨ zda kwa gwahiyaya ngwazar ɨna sɨbɨni Hiridus adama dɨ maa ghamusai.

Sɨbɨ cas ɗi Yesu wa ta vɨna Madzɨ gyarya ta Galili

⁷ Aɗɨka Yesu dɨ tlusai fa sɨbana gyagiya tirusɨ dɨ batlɨna ta vɨna madzɨ gyarya, sɨbɨ cas dɨbawatlɨna a Galili dɨ ɗiyusɨ.

⁸ Daga dɨkaya ndyam hamba tɨdata ɗɨmau, sɨbɨ cassɨ dɨbuwatlina tirusɨ a Yahudiya, Urushalima, Idumiya, ɨna pɨlaka pakɨ ta Urdum fa Taya ɨna Sidon.

⁹ Adama wiha sɨbɨ dɨ ɗɨnga sɨba gyagiyakɨ niwasɨ dɨ donaya wuna kwatal dɨ araya, aha tabi ndiwusɨ da zakutusa sɨbu.

¹⁰ Aha a alai su sɨbɨ cassɨ jika, sɨba tlɨnda vɨzhazhau cassɨ da zakutayau dama dɨ tɨkɨnusɨ.

¹¹ Nda nayahɨyusa mbasaka ryuwan dɨ dɨda bɨɗa Yesu da ɓaa kwararɨ, du, “Faji Laina Ghɨnsɨ.”

¹² Je gɨtla tlɨna ndu tabɨ bɨla wii ndɨrusu ko tɨ vare wena sɨmeki.

Yesu par sɨba gyagiyakɨ dirɓitin bahɨn tsɨr

¹³ Yesu dɨ ghɨmusa ghama ɗai dɨ zara sɨba tɨda lu, dɨ buwa tlina tirusɨ.

¹⁴ Dɨ para dɨrɓitim bahɨn tsɨr, damana make wute dɨfa ti, da kafatlɨne na bɨla ɗɨngɨ ta Ghɨnsɨ.

¹⁵ Dɨ tsatlɨn kalpɨ nusu bana raka tɨmbɨzɨm.

¹⁶ Nikin ji dirɓitin bahɨn tsɨreni sɨba dɨ paratlɨn: Saminu (ba tsaya gɨnusanu Bitrus),

¹⁷ Yakubu laina Zabadi ɨna yasɨwasɨ Yuhanna (sɨbana zaratlɨna ndu Buwanarjis, wato ji “wɨtlɨ araduwa”)

¹⁸ Andarawus,Filibus, Bartalamawas, ɨna Matiyu, Toma, a Yakubu laina Alfa, Tadiyus, Saminu ba can wasɨ ɗahɨ,

¹⁹ fa Yahuda Iskariyoti ba dɨ tsusɨ.

Yesu ɨna Ba'alzabul

²⁰ Je busa kamai a Yesu, dɨ mɨna pa ghamatlina wiha sɨbɨ, ti dɨ ɨna sɨba gyagiyakɨ niwasɨ dɨ iyamanan taa hambatau.

²¹ Daga dɨkaya wanka dawanwasɨ, dɨ batlɨne kuyusɨ, je tlɨne ɗɨnga ndu, “Tɨmanan ndera rau.”

²² Sɨba sɨnakɨ ɗe ridlɨ ta Musa sɨba buwa tlɨna Urushalima dɨ ɗɨnga ndu “Ai Ba'alzabul ji ɗewasɨ Malvu na Tɨmbɨzɨm! Hambazai jika tɨ da kalpɨ bana bawai tɨmbɨzɨm.”

²³ Je zara tlɨna tirusa Yesu dɨ dzakwa bɨla hiya tlɨn vɨna do du: “Tɨmbɨzɨm ga bawai tɨmbɨzɨm wa?

²⁴ Gwalfu kwa dzaraza tsɨr ɗaheka to nji mana ta vɨna hu.

²⁵ Kwa dzarusɨ tsɨr ɗaha kan ka, to naka kan ka tɨma tsɨrusu.

²⁶ Kaɗɨnga du tɨmbɨzɨma ta kaye ghamusɨ aha adzarta su tsɨr ɗaheka tɨma tsɨrusu, mbahi tusu ɗansai.

²⁷ Agashɨ jika, wi moyi bada bɨ zusa kanha sɨm ba kalpɨ awanakwa ɗahɨnahiyusu. Dɨ iyaɗɨ kɨrma wihi ta naka ba kalpɨka a kan wasɨ.”

²⁸ Agashɨ mɨna ta bɨlana, ga iya zuwa lyapɨ na sɨbabau wai ɨna kɨmayaka ngɨna Ghɨnsɨ batlɨne ɗɨmau,

²⁹ Ama ndyam badɨ kɨmaya ngɨna Riwan Ghɨnsɨ ma Cartɨka dɨma zuwaya lyapɨ nusu. Adama aɗin lyapɨ ba mahiya ghamatlɨn.

³⁰ Ta taa ɗɨnga wankaka adama tlɨna ta ɗɨnga ndu, “Ta tɨmbɨzɨm.”

Gharahodzaku ta Yesu ɨna dawanwasɨ

³¹ Je ɗama gharahodzaku ta Yesu ɨna dawanwasɨ.Tlɨnde tsatsɨra viyakam, dɨ kafa wi ɗahe zarusɨ.

³² Sɨbɨ casɨ dɨ je tsɨga tirusɨ, Je Tlɨne bɨlaya ndu, “Gharahodzaku tafu ɨna dawan fa lu nayafa vikam.”

³³ Jete tsiyatlɨn du “Niwe ji dawanwan ɨna gharahodzaku tuna?”

³⁴ Jete naya sɨba dɨ ndiwuseyi dɨ ɗɨnga tlɨna ndu, “Nikɨn kɨn ji gharahodzaku tuwun fa dawanwan!

³⁵ Ndɨ ba tɨdata ɗima hamba Ghɨnsɨ da luka tiji yasɨwan avakiyuwun ɨna gharahodzaku tuwun.”