Psalms 91 - Ohiatonhseratokénti

Oriwiiohón꞉we ne Rawení꞉io tsi Shakohiatanónhstats

¹ Ónka kí꞉ken akénhake thóh nón꞉we nihiakonnhétie tsi niteshakónes ne kwáh éhʼneken tót꞉te ónhka kí꞉ken akénhake tsi nisakohiatanónstats ne roshaststenhseroʼwánen,

² enhonhwénhase ne Roiá꞉ner, “Í꞉seke nón꞉we nikatasehtákwah tánon í꞉se nakathenhénra í꞉ken; í꞉se nakení꞉io í꞉ken, shón꞉hake nón꞉we nitewaʼkethákwen.”

³ Asèken kwáh enhiaiatanónsthate tsi natehiesaniká꞉rahra nonkweʼshón꞉ha tánon tsi nòkwah ne iakorhiótha kanonkwahtsherák꞉sens;

⁴ kwáh enhiaróhroʼke tsi ní꞉ioht ne kítʼkit tsi iakohiataséhtha nakohiohʼokónha kanerahontsiókon, tánon ranerahontsiókonh nón꞉we nisataséhthaʼkwe; ne Rawenni꞉io rorihwaʼtóken kwáh kíʼ enhiaiatanónsthate tsi ní꞉ioht ne tehioniatasthákwa.

⁵ Iáh tatehiotonhontsóhon nasetʼtshanísehke ne ronhthenhénhnaras ne tsi niwaʼsónhtes, khés ne thènen ahiohonraká꞉rahke tsi niwenhníseres,

⁶ khés ne ronhthenhénhnaras ne tehonstikáfas tsi niwaʼsónhtes, ók ne tsi niwenhníseres iesakonatiatónhtses nonkweshón꞉ha nasakonátonhthe.

⁷ Tewenhniawehetʼtserásen niháti tiatákʼta ahatihiatiénenhne, oiéri tewennhniawehetʼserásen niháti taiesahonwaʼrónhni iáh kíʼ taiesakaréwaʼte.

⁸ Kwáh nek khók ne tesatʼkakwahrísi tánon kwáh ensatkátho satkátho ne Rawenni꞉io tsi ní꞉ioht tsi sakorewáʼtha ne ionhkwetahét꞉kens.

⁹ Ní꞉se waʼtseríhon ne Roiá꞉ner nahontáhiane, né kwáh éhʼneken tót꞉te nón꞉we nisathasehtákwah,

¹⁰ kwáh iáh tahó꞉then ne karihwaʼhetkénsera tahisárahne, iáh ne kanratarihnhétshera thahóntaʼwe tsi nón꞉we nishí꞉teron.

¹¹ Asèken ne Rawenni꞉io ensakó꞉nhane ne raoronhiakeró꞉nons nahiesathenhnikonhráhren nahontahiésahne ne kwáh tsík nón꞉we nienhénhse.

¹² Rathiʼtshanáhke énhonste tsi enhiesahiatakaráhthaʼte, né ká꞉ti ne tó꞉sa ahisashitaʼkwáhrase nonenhiákes.

¹³ Kwáh ensewaʼkwéni thóh nón꞉we naíhsewaʼthénhti tsi rónhnes ne kénhreks tánon ne konhtírios ó꞉ni né óniares, ne konhtisehró꞉hens kénreks tánon ne iotniarák꞉terons.

¹⁴ Tsi nihiákon ne ionhkenorónhkwa, kwáh kíʼ enkhenónsthaʼte; kwáh kíʼ enthékhene tsi nihiákon ne iontsenhnaʼientéri.

¹⁵ Nó꞉nen ienhionkenaton, kwáh kíʼ thenkherihwasehrakwahse; kwáh enhiakwakweʼkónhake tsi nathenhonhnikonhráhren, kwáh kíʼ enkheniákenhte tánon enkhekwéniensʼte.

¹⁶ Né thenkherihwaʼserakwáhthen nahonhnonnhésonhke, kwáh kíʼ enkhesenhnówanaʼte.