Numbers 28 - Ohiatonhseratokénti

Tsi Nihiorenhnáhon Tsi Tieiéstha

¹ Ne Roiá꞉ner wahorihónten ne Mahís

² nasakorihónhnien NʼIsraerʼró꞉nons nahonthahonwawísehke ne Rawenni꞉io kwáh wató꞉ken tsi nenhkaháwiʼke né꞉ne kákhwa tó꞉kens iahióntkaʼwe né rawerientiʼiostákwah.

³ Né kí꞉ken ne ká꞉khwas niaʼhiónhtkawe nahonthahónhion rahohénton ne Roiá꞉ner: né niaʼtewenhniseráke ahionteskónhten, tenihiáse ne énska tehonoserihiákon teiotinakaronhtónʼa owíra tenítsinn né kwáh iáh othènen tahotitsihiotharáke.

⁴ Saiáta iatshisewát꞉kaf noronkéne tánon ne saiáta né nènhne nokarasnéha nikaháwi,

⁵ né snihiatátʼtshons ne nonátsia enkenikwekonhátie né꞉ne tekakonhtsheráke othé꞉sera, né tenhkaiésthonke tekatshetáke iakenhʼiewátha kénhie né꞉ne kwáh wenhiení꞉io.

⁶ Né kí꞉ken ne iatewenhniseráke ienhiontkaʼwásehke né꞉ne kwáh iotʼtshon, thóh kíʼ ken ní꞉ioht ne tiotserénhton iewatʼkáwen né ká꞉khwa né꞉ne tsi tionónhte ne Sinai, né꞉ne tenwenhserateníhon rawerienhtiʼióstha ne Roiá꞉ner.

⁷ Né onenharatasehontserákeri né enhkenikweʼkonhátie nenhthatiérenhte teiotinakaronhtónʼa owíra, ietsienharakwáʼke tasehwáweron tekhatshétake ne onenharatasehontserákeri.

⁸ Nókarasnéha né hionshatshisehwátkaf ne tekeníhaton teiotinakaronhtónʼa owíra kwáh kíʼ né sá꞉ka kenhák tsi kíʼ ní꞉ioht ne shiʼhioronhkenéha iesehwatkáwen, skát꞉ke kenhák ne onenharatasehontserákeri. Né kíʼ nónh꞉ne ne ká꞉khwa í꞉ken tsi iewatkáwen, ne tewenhsehrateníhons ne rawerienhtiʼióstha ne Roiá꞉ner.

Ne Awenhtaʼtokenhtíʼke Entiéieste

⁹ Naʼwenhthatokentíke iehietsihiá꞉tkaf teniʼiáhse ne énska tehonosehrihiákon teiotinakaronhtónʼa owíra né꞉ne kwáh iahothènen tehotitsihióthare, 4 nikakonhtseráke othésera tekaiésthonk ne iakeniewá꞉tha kénhie né꞉ne onátsia tsi iahontkáwenhke, tánon ne onenharatasehontserákeri.

¹⁰ Ne kí꞉ken watéskonhte thóh nenhatiʼiérake né꞉ne iateiawenhtatokentiʼtsheráke ienhiowènhteke ne niaʼtewenhniseráke né thóh ní꞉ioht tsi ronhteriwathentiátha skát꞉ke ne onenharatasehontserákeri.

Né Tieiéstha Ne Tiotenhniseratierénhton Ne Wenhnítare

¹¹ Iasehwát꞉kaf ne watéskonhte rahonháke ne Roiá꞉ner né tiókonhte nensewenhnitárane: né꞉ne teniʼiáhse ne kenhnithonihiónha téro, saiáta teiotinakarontónʼa rátsinn, tsáta niháti ne énska tehonosehrihiákons teiotinakaronhtónʼa ratítsinn, ratikwékon ne iáh othènen tehothitsihióthare.

¹² Né onátsia iewatkáwen, iasehwát꞉kaf kaiéri níkon né tekaiestónhak ne iakeniewátha kénhie: né satihiatátshons teró, iáʼiak nikakontseráke othésera, né teiotinakaronhtónʼa rátsinn, 4 nikakonhtseráke;

¹³ né satiʼiatátshons teiotinakaronhtónʼa owíra, tekakonhtserakehá꞉ties nènhne.

¹⁴ Né tkarihwaiéri ne onenharatasehontserákeri né꞉ne 4 nikatshétakes nonenharatasehontserákeri ne saiáta teró, áhsen nikatshétakes ne teiotinakaronhtónʼa rátsinn, tánon tekatshétakes né satihiatátshons ne teiotinakaronhtónʼa owíra. Thóh kí꞉ken nikaianerenhseró꞉tens ne hionteskonhtákwah niahióntkawe nenhtewatenhniseratiérenhte ne enhsewenhnitáshon thóh nenhiotónhake né꞉ne kwáh tsi niióserehs.

¹⁵ Tánon ne ienhiowènhtheke ne niatewenhniseráke ahionteskónhten skát꞉ke ne onenharataʼsehontserákeri, iatsisehwát꞉kaf saiáta kaiatákeras né꞉ne kariwáneren aorihwáke.

Né Tkaiéston Ne Kaʼkhwáhere Ne Iáh Tewatthenkwáton Kaná꞉taro

¹⁶ Né É꞉neken Watohetstáhkwa kakhwáhere né nahonwakwéniensthe ne Roiá꞉ner né enwaterihwatentiáthonke né kaiéri iawénhre senskárake né nenhtewathenhniʼtatiérenhte enská꞉rane.

¹⁷ Né wísk-iawénhre senhskárake né nènhne ne kariwihiostónhtshera aorihwáke tsi enkaʼkhwárake tsi enhtewatásawen né꞉ne tsáta nónhta nikaríhwes, nék khók né iáh tewathenkwáton kanátaro énhieke.

¹⁸ Nenhtewateniseratiérenhthe ne kakhwáhere tsi ensewatiataró꞉rohke né nahisehwaterénhnaien, tánon iáh tehiówenk ne thènen ahiakohióten né wenhniseráte.

¹⁹ Sehwateskónhten né꞉ne ká꞉khwa aoriwáke tsi iensewát꞉kawe rahonháke ne Roiá꞉ner: tenihiáse nithotihiónha teró, saiáta teiotinakaronhtónʼa rátsinn, tánon tsáta niháti nénska tehonosehrihiákon teiotinakaronhtónʼa ratítsinn owíra, ratikwékon ne iáh othènen tehotitsihiótare.

²⁰ Tasehwáiest ne tkariwaiéri nonátsia aorihwáke nothésehra tekaiestónhak ne iakeniewátha kénhie: né꞉ne iáʼiak nikakonhtseráke né saiáta teró, 4 nikakonhtseráke ne teiotinakaronhtónʼa rátsinn,

²¹ tánon tekakonhtserakehá꞉tie ne teiotinakaronhtónʼa owíra.

²² Tánon ó꞉ni iatsisehwát꞉kaf saiáta kaiatákeras né꞉ne kariwáneren aorihwáke, tánon thóh kíʼ ní꞉ioht tsi sewaterihwaténhtsiat ne orihwakahionhnéha tsontonhnakanonhnitákwa né nonhkweshón꞉ʼa akorihwáke.

²³ Tasehwá꞉iest kí꞉ken ne iehiowèntek ne iorihwató꞉ken onhronhkéne ionhteskónhtha.

²⁴ Kwáh thóh niʼiohtónhak, né꞉ne tsáta nónta nikaríhwes tsi thatshítson ne Roiá꞉ner ne ká꞉khwa aorihwáke, né tenwenhserateníhon né rawerientiʼióstha. Né kí꞉ken tasehwá꞉iest tsi ienhiowénhteke ne watéskonhte tánon ne onenharatasehontserákeri tkaiéston.

²⁵ Sewatiatarórok nahisewaterénhnaien ne tsatákaton niwenhniserakéhaton tánon tó꞉sa othènen sewahióten.

Né Tkaiesthánion Ne Kaientwá꞉kwen Tehiontenonhweratóntha

²⁶ Nentewenhniseratiérente ne kaientwá꞉kwen tehiontenonhweratóntha, nónen iensewát꞉kaʼwe ne tkaiéston nonátsiase rahohénton ne Roiá꞉ner, ónenk tsi ensewatiaʼtaró꞉rohke nahisehwaterénhnaien, tánon iáh othènen thakahioténhʼen.

²⁷ Iasehwá꞉tat nahonteskónhtake aorihwáke né nahón꞉sehra rawerientiʼióstha ne Roiá꞉ner: tenihiáse teró nithoʼtihiónha, saiáta teiotinakaronhtónʼa rátsinn, tánon tsáta niháti nénska tehonoserihiákon teiotinakaronhtónʼa ratítsinn owíras, ratikwékon né꞉ne iáh othènen tehotitsihióthare.

²⁸ Iasewát꞉kaf ne tkariwaiéri nonátsia aorihwáke nothésera tekaiesthónhak ne iakenhiewátha-kénhie: iáʼiak nikakonhtseráke ne saiáta teró, 4 nikakonhtseráke ne teiotinakaronhtónʼa rátsinn.

²⁹ Tánon tekakonhtseráke ne satihiatáʼtshons teiotinakaronhtónʼa owíra.

³⁰ Tánon ó꞉ni iatsisewát꞉kaf saiáta kaiatákeras né nènhne ne karihwáneren aorihwáke, tánon thóh kíʼ ní꞉ioht tsi sewaterihwaténtsiat norihwakáhion tsontonhnakanonʼnitáhkwa nonhkweshón꞉a akorihwáke.

³¹ Né kí꞉ken tasehwá꞉iest tánon ne onenharatasehontserákeri né iehiowènhtek niatewenhniseráke ionhteskónhtha aorihwáke tánon nonátsia aorihwáke.