Micah 1 - Ohiatonhseratokénti

¹ Ne raowén꞉na ne Roiá꞉ner wahoiató꞉renne ne Micah ne Moresheth nón꞉we nihaná꞉kere né꞉ne shionatenhniseraténionskwe ne Rontinontí꞉ioskwe Jotham, Ahaz, tánon ne Hezekiah, ne Judah nón꞉we nihatinákereʼkwe, ne tsi nahatkáto nahotirihwaʼshón꞉as ne Samaria tánon ne Jerusalem.

² Sewatóntet, í꞉se ne tiónkwes, sewakwé꞉kon; satenhnikòn꞉raren, O onwénhtsa, tánon akwé꞉kon né nón꞉we niká꞉ien; tánon tsi sewarí꞉hon ne Roiá꞉ner Ní꞉io rahrihwaní꞉rat tsi entsisewatkónten. Natiá꞉ner thóh nitré꞉tha ne raononsatokentikowáhne.

³ Awatkátho, ne Roiá꞉ner tahohiakenhenhátie tsi nón꞉we nihèn꞉teron, tánon kwáh entátsnenʼte tánon thenhatekhá꞉hakwe tsi nón꞉we ne kwáh tiotenón꞉tates ne tsi ionwenhtsá꞉te.

⁴ Ethò꞉ne ne tsi ionhnontarónnions kwáh enkawistaná꞉wen tsi nón꞉we ní꞉res tánon nahonráhkwakons kwáh tenwateraneká꞉re tsi enwatenhotón꞉ko, kwáh tsi ní꞉ioht ne ohtsinaʼkontahkwaʼne otsikhé꞉ta kwáh enkawistaná꞉wen ákta ká꞉ien tsi iotékha, kí꞉ken otsikhé꞉ta enkanahó꞉ten kwáh tsi ní꞉ioht nohné꞉kanos tsi nón꞉we nihiotenontsá꞉kon.

⁵ Akwé꞉kon kí꞉ken ne wakarihón꞉ni ne raorihwaneraháktsheras ne Jacob tánon né꞉ne karihwaneraháktsheras ne tsi kanónshote Nisraeró꞉nonke. Onhnahó꞉ten ne raorihwaneraháktshera í꞉ken ne Jacob? Iáh ken né꞉ne Samaria teiorihwá꞉ke? Tánon nahó꞉ten nenhné꞉e nehé꞉neken iokwenrá꞉re í꞉ken ne Judah? Iáh ken né꞉ne Jerusalem tè꞉ken?

⁶ Kwáh ne enkonhniá꞉te ne Samaria akentoniótake ne karihwaieshá꞉tsheras ne kahentá꞉kes; thóh nón꞉we niieienthótha ne watenenharí꞉seres kwáh tsateionarénion; kwáh ienkáweron naonenhiaó꞉kons thóh ahonráhkwakon, tánon enkéneste ne tsit kenskwáhere.

⁷ Akwé꞉kon nahoiatonhnishón꞉as kwáh tenkarihtón꞉ke kennenwáskes, akwé꞉kon nahokarhiák꞉tsheras ne wahthonwisentsherát꞉sen kwáh ki enwatsahá꞉tonke otsirá꞉ke, tánon akwé꞉kon nahoiatonhnishón꞉as eʼtá꞉ke enkaién꞉taʼne enkaiésha; asè꞉ken ne kí꞉ken aorì꞉wa nahotikarhiá꞉tsheras ne tionatakwahkaré꞉nis wakaró꞉rohke, tánon ki nahotikarhiák꞉tsheras ne tionatakwahkaré꞉ni kwáh ki tentkonwénhnon.

⁸ Asè꞉ken né kí kí꞉ken aorì꞉wa kwáh í꞉ken tsi tenkasénhto; tánon kwáh í꞉ken tsi enkatsarókwahte; kwáh akaská꞉we tánon akenhó꞉oskont thenkénhake; kwáh enkatewenhó꞉ten tsi ní꞉ioht ne kahentaʼkéha érhar, tánon enkatión꞉nion tsi ní꞉ioht ne skawirowaneʼkó꞉wa.

⁹ Asè꞉ken tsi niiotkarewá꞉ton iáh tehsewatewirón꞉nis. Judah nón꞉tawe; thóh nió꞉re niahá꞉he tsi thonatenhenraká꞉ronte nakonkweʼtashón꞉as; kwáh ó꞉ni tsi nió꞉re ne Jerusalem.

¹⁰ Tó꞉sa othé꞉nen satró꞉ri ne Gath nón꞉we, kwáh tó꞉sa othé꞉nen tesashéntho; ne Beth-leaphrah nón꞉we tiatsatakaraténiat okenrá꞉ke.

¹¹ Satohéstak, ne Shaphir nón꞉we nisewanákere, tsi sewahneós꞉kok thí꞉ken tánon sewatehén꞉en; ne Zaanan nón꞉we nihatinákeres iáh tethotiiakén꞉en nahontiónnion; Bethezel, ienhiaiaténhawe tsi kinonnistákwe.

¹² Asè꞉ken ne Maroth nón꞉we niienákere iakorarénion tsi nateiakostériens nahonsonterihwakwahtá꞉ko, tiorì꞉wa ne karihwahét꞉kens Roiá꞉ner nón꞉we nitsiostsnénton thóh ón꞉we tsi iotenhenrakà꞉ronte ne Jerusalem.

¹³ Ietsiiatanihiónten ne koshá꞉tens thóh notiónkwas, í꞉se né꞉tho sewaná꞉keres ne Lachish; ne tesewathásawen naorihwanerahák꞉tsheras ne Zion aoiènha; tánon í꞉seke nón꞉we nontetshén꞉ri ne Israel aorihwanerahák꞉tshera.

¹⁴ Ne káti aorì꞉wa kwáh enietsiiáwion atatawí꞉tsheras ki Moresheth-Gath tsi shontentiónʼhe; ne tsi kanonshó꞉tons ne Achzib kwáh kaʼnikonrá꞉ton enkénhake rononhà꞉ke ne rotinontí꞉ios ne Israeronónke.

¹⁵ Shé꞉kon ó꞉ni enskwahwatsirónhnien, i꞉se ne tiónkwes ne Mareshah sewanákere; naoiatanerakwáhtshera ne Israel kwáh ienwáwe tsi nió꞉re ne Adullam.

¹⁶ Onahónsta tión꞉ni tánon akwé꞉kon sewathatenónkar ne ne raotirihwà꞉ke ne ratitsaokónhas ne ietsinorónhkwas! Ohnahonsta tionhni ne sewanón꞉tsines tsi ní꞉ioht ne akwekskó꞉wa, asè꞉ken é꞉ren roné꞉ton ne shonhà꞉ke.