Daniel 3 - Ohiatonhseratokénti

Nebuchadnezzar Onkweʼtakwé꞉kon Wahshakohró꞉ri Nakonwasénnaien Ne Ohwistanó꞉ron Kaiaʼtón꞉ni

¹ Ronnontí꞉io Nebuchadnezzar wahaténhnhaʼne ahonwaiaʼtonnihserónnien à꞉ohskon ohwistanó꞉ron, tióhton niwáhsen niwahshítake naontaiótteke tánon tióhton niwahshítake naʼtaontaká꞉ron tánon Dura tsi aotonhwentsià꞉ke iahahiaʼtonnihseró꞉take, tsi watonhontsá꞉ien ne Babylònhne.

² Eʼthó꞉ne ne ronnontí꞉io iashakoteriʼwaniéhten ne raonkweʼtaʼshon꞉ʼa, ne aontahónne ne ronnontí꞉io shakoienʼokón꞉ʼa, ne ratikó꞉ra, tánon ne shonwatiià꞉tanonhne, ratiianerenhsherón꞉ni, tehontwistanónhnha, ratirihwéntha, karíhton, tánon ne ronatiaʼkéshon ne ronateríhonton ne kanakerahserá꞉kon. Né ne akonwatonhnhahéhrhase ne kaiaʼtón꞉ni tsi niká꞉ien ne ronnontí꞉io Nebuchadnezzar rokétskwen.

³ Nó꞉nen ratikwé꞉kon ne ronaterihónton wahontiaʼtaró꞉roke ne akonwatonhnhahérhase ne kaiaʼtón꞉ni aohén꞉ton waʼthatí꞉tane tsi nón꞉we nihohiathonnisehrakétskwen ne Nebuchadnezzar.

⁴ Ne rarihowanáhtha tahahkwísron tsi wahatá꞉ti, “Takwatahónhsatat! Kwáh tsi niaʼteienekwénhsake ne ón꞉kwe, tsi niionhsohkó꞉ten, tánon tsi niiewennó꞉ten!

⁵ Ensewathón꞉teʼne tsi entkarennó꞉taʼne ne iehonrawátstha, ne entióhsere ne teiehoroʼtahrénhohs, karenhsohtáron oʼnowaʼkó꞉wa, tánon enhontià꞉taren ne oiáʼshon niiohtánion ne ionterennotahkhwaʼshón꞉ʼa. Kwáh tsi niiohstó꞉re. ne enthontáhsawen ne ahonterennó꞉ten, tensewatshá꞉kete tánon ensewahsénnaien ne ohwistanó꞉ron kaiatón꞉ni ne ronnontí꞉io Nebuchadnezzar roiatonnisehrakétskwen.

⁶ Ónhka ne iáh thaʼtaiontshá꞉kete ne akonwahsénnaien ne kaiaʼton꞉ni kwáh óksaʼk ieniontatiaʼtón꞉ti tsi tiotékha ne teiotsenhanòn꞉niaʼni.”

⁷ Kwáh káti, tsi niiohstó꞉re wahonathón꞉teʼne ne ionterennotáhkhwa, kwáh tsi niaʼteienekwénhsake ne onkwehshón꞉ʼa, tsi niaʼteionhsóhkwake, ó꞉ni tsi niaʼteiewénnake, waʼthontshá꞉kete ne akonwahsénnaien ne ohwistanó꞉ron kaiaʼtón꞉ni tsi niká꞉ien ne Ronontí꞉io Nebuchadnezzar roiatonnisehrakétskwen.

Ne Áhsen Nihá꞉ti Ne Daniel Rontenroʼshón꞉ʼa Wahonwatirihwáhrho Iáh Tehontewennaráhkwa

⁸ Eʼthó꞉ne ó꞉tiaʼke ne Babylonians wahonateʼshennaién꞉taʼne ne ahonwatiríwenhten ne Sitaeró꞉nons.

⁹ Wahonwénhase ne ronnontí꞉io Nebuchadnezzar, “Sanóntí꞉io tsi nén꞉we sónnhek!

¹⁰ Sanontí꞉io sarihowanáhton kwáh tsi niiohstó꞉re enthontáhsawen nahonterennò꞉ten, kwáh onkweʼtakwé꞉kon taiontshá꞉kete ó꞉ni akonwahsénnaien ne ohwistanó꞉ron kaiaʼtón꞉ni,

¹¹ tánon ónhka ne iáh thaʼtaiontshá꞉kete ó꞉ni nakonwahsénnaien ne kaiaʼtón꞉ni ó꞉nenʼk tsi tiotsenhanón꞉niaʼni ieniontatiaʼtón꞉ti.

¹² Tóhʼka nihá꞉ti ne Sitaeró꞉nons ne sheríhonte tsi tiohwentsá꞉ien ne Babylon—né ne Shadrach, Meshach, tánon ne Abednego—né ne iáh tehonatewennaráhkwen ne Sanontí꞉io tsi ní꞉sen. Iáh tekonwahsénnaiens ne saní꞉io tánon iáh thaʼtekonwatentshotá꞉ni ne shahiathonnisehrakétskwen.”

¹³ Eʼthó꞉ne ne ronnontí꞉io wahotawénratshe tsi nahonà꞉kwen tánon wahatén꞉naʼne ne áhsen nihá꞉ti raohén꞉ton naontahonwatiiaʼténhawe.

¹⁴ Washakoriʼwanóntonhse, “Shadrach, Meshach, tánon Abednego, tó꞉ske ken iáh tesewathóntats ne aesewahsénnaien ne Akeʼní꞉io tánon ne taesewatentshóthase thí ohwistanó꞉ron watiathonnisehrakétskwen?

¹⁵ Ó꞉nen káti, tsi niiohstó꞉re ensewathón꞉teʼne nenwatewennó꞉ten ne iehonrawátstha, ne oná꞉kare, oʼnówa, ne oʼnowaʼkó꞉wa, ne karensotarahrónnion tánon oiáʼshon niiohtánions ne ionterennotahkwaʼshón꞉ʼa, tesewatshá꞉ket tánon sewahsénnaien ne kaiaʼtón꞉ni. Tánon tókaʼ iáh eʼtho thaeʼsewá꞉iere, kwáh kiʼ óksaʼk ienietshiiaʼtón꞉ti tsi tiotékha. Í꞉sewehre ónhte ken tókaʼ seʼnón꞉wa oknahaniiohseró꞉ten nahakwé꞉ni nahʼtshisewaʼniá꞉kenhte?”

¹⁶ Shadrach, Meshach, tánon Abednego waʼthonwarihwaʼserákwaʼse, “Sanontí꞉io iáh thaiakwateʼnién꞉ten ne aontaiakwataténnhe.

¹⁷ Tókaʼ ne Rawenni꞉io tsi niká꞉ien ne shakwaioʼténhse rokwénion ne aonsahshonkwaiaʼtatáhko tsi tiotekhaʼkó꞉wa tánon ó꞉ni tsi nonkwá ne í꞉se saʼshatsténhsera, thó katiʼ nenhá꞉iere.

¹⁸ Nok tánon tókaʼ iáh eʼtho thahá꞉iere, Sanónti꞉io kwáh saterién꞉tarak ne kwáh iáh nonwén꞉ton thiaiakwahsénnaien ne saní꞉io, tánon iáh ó꞉ni nonwén꞉ton thiaʼtaiakwatshá꞉kete tsi nonkwá ne ohwistanó꞉ron shaiathonnisakétskwen.”

Ne Áhsen Nihá꞉ti Ne Daniel Rontenroʼshón꞉ʼa Wahonwatirí꞉wenhte Ne Ahonníheie

¹⁹ Eʼthó꞉ne ne Nebuchadnezzar iahótonse tsi nahonákhwen, tanon ne rakonhsà꞉ke kwáh onekwénhtara naʼáwenʼne tsi nahshakonákhwaʼse ne Shadrach, Meshach, tánon ne Abednego. Sók ki wahatén꞉naʼne tsá꞉ta niiorí꞉wake sénha ahonʼtharihá꞉ton ne karístatsi.

²⁰ Tánon ó꞉ni wahatén꞉naʼne né ne kwáh thatiʼshátstes ne raonkwè꞉ta ne ronterí꞉iohs ne tahshakohshiʼtánerenke tánon tahonwatinéntsterenke ki áhsen nihá꞉ti tánon iashakotiiaʼtón꞉ti tsi tiotekhaʼkó꞉wa.

²¹ Sók kiʼ wahonwatí꞉nerenke, tiehonatsherón꞉ni raonatiá꞉tawi, ne waʼkóhses, tsehonanonhwaró꞉ron, tánon ó꞉ni ratikwé꞉kon iahonwatiiaʼtón꞉ti tsi tiotsenhowá꞉nen karístakon.

²² Né tsi nihaʼniakátste ne ronnontí꞉io rotenhnháʼon ne karístatsi kwáh taiotenonhianihtónhake tsi naioʼtarihénhake, ne oʼtónhkwa waʼakotiaʼtátshaʼahte tánon ne wahotíriohte ne shakotiʼnikónhrare, tsi karistákta niashakotiiaʼténhawe ne Shadrach, Meshach, tánon ne Abednego.

²³ Eʼthó꞉ne ne Shadrach, Meshach, tánon ne Abednego, shé꞉kon naʼtehatinéntsteren, kwáh shaʼtekatsenhíhen iahatiiaʼtakehrón꞉taʼne ne katsenhowá꞉nen.

²⁴ Thontaiawénstsi ne Nebuchadnezzar iaʼthaniʼtsónhkwahkwe tsi nahorihwanehrá꞉ko. Washakoriʼwanóntonhse ne raonhaʼtsheraʼó꞉kon, “Iáh ken ne áhsen nihá꞉ti thaʼteietshinéntsteren ó꞉ni thiieietshiiaʼtóntion ne tsi tiotsenhowá꞉nen?” Waʼthatirihwaʼserá꞉ko, “Hen thoʼ niionkwaié꞉ren, Sanónti꞉io.”

²⁵ “Oh kátiʼ nontié꞉ren tsi kaié꞉ri nihá꞉ti khé꞉kenhs ronnenónties ne tsi iotékha”? wahariʼwanón꞉ton. “Iáh thaʼtehatinéntsteren, tánon iáh oʼthé꞉nen tewé꞉ne nahonatiaʼtátson tánon ne kaieríhaton teskaieróntare ne ieronhiaʼkehró꞉non.”

Ne Áhsen Nihá꞉ti Sahonwanáhtkaʼwe Tánon Sénha È꞉neken Tiohttenáktate Tsi Ní꞉ioht Tsi Sahonterihónten

²⁶ Sók ne Nebuchadnezzar kanhohákta niahá꞉re ne teioʼthónhkwakwen karístatsi tanon iashakoná꞉ton, “Shadrach! Meshach! Abednego! Etshisewaioʼténhse ne kwáh thoʼsatstenhserowá꞉nen Rawenni꞉io! Tasewaiá꞉kenʼt!” Tánon kwáh óksaʼk tahatiiá꞉kenʼne.

²⁷ Ratikwé꞉kon ne ronnontí꞉io shakoienʼokón꞉ʼa, ratikó꞉ra, ne ieshonwatiiá꞉tanonhne, ó꞉ni otiaʼkéshon ne ronnontí꞉io raonkwéʼtaʼshón꞉ʼa wahotiataró꞉roke ne ahonwatí꞉ken kí áhsen nihá꞉ti ronnón꞉kwe, né ne kwáh iáh oʼthé꞉nen tehonatkarewáhton tsi iotékha. Ne raotinónhkwis kwáh iáh oʼthé꞉nen tehiotsihenstharíkon, ne raonatsherónnia iáh thaʼteiótson, tánon ó꞉ni kwáh iáh thé꞉nen tehatiienʼkwarákerahs.

²⁸ Ne ronnontí꞉io wahén꞉ron, “Ronwahsénnaien ne Ronwawenní꞉io ne Shadrach, Meshach, tánon ne Abednego! Tahoténiehte ne raoronhiaʼkehró꞉non ne aonsahonwatiʼniá꞉kenhte kí ronnón꞉kwe tsi ronwaioʼténhse ó꞉ni thonwehtáhkwen. Iáh teionkewennaráhkwen ó꞉ni eʼtho ronnonnhárahkwe né tsi iáh thatehonatshákton ó꞉ni nakonwahsénnaienke oktiʼká꞉te ne ní꞉io kwáh né khók ne ronónha ronwawenní꞉io.

²⁹ “Ó꞉nen kiʼ nón꞉wa entianerenhserón꞉ni ne kwáh tsik naienekwenhsoténhake, naionhsohkoténhake, tsi naiewennoʼténhake ne oʼthé꞉nen ahonwahsénhten ne Raotiʼní꞉io ne Shadrach, Meshach, tánon Abednego, enhonwaiaʼtaratsón꞉ko kwáh tsi niió꞉re thostiéntare, ó꞉ni entkení꞉kwekte ne tsi ronóhnsote aiotstohkó꞉take tsi ní꞉ioht tsi takahríhton. Iáh teká꞉ien ne akó꞉ren akenhá꞉ke ne Rawenni꞉io ne ahakwé꞉ni ne éhthoh ní꞉ioht tsi aonsahshakoʼniá꞉kenhte.”

³⁰ Sók ne ronnontí꞉io sénha è꞉neken tiotenáktahte tsi ní꞉ioht tsi sahshakorihónten ne Shadrach, Meshach, tánon ne Abednego ne eʼtho nón꞉we Babylònhne.