YOANO 16 - Disambi Dipyadipya

¹ NAMANWAMBILA malo aa, binutaxeponexebwa.

² Bananwela bixingidilu ixongo ; ya, ola ulolwa unakala muntu mwoso unwaxipa nonu unakisa ene, utanasadila Ncembi.

³ Yi banakwenca bintu bebi bwalo butalubukwabo ndo Tete ndo meme.

⁴ Kate namanwambila bintu bebi, binuxebiela nkanyi, palolwa ola abio, munakanwambila. Kaninga kinwambidili bintu bebi pôi bubangabanga, bwalo bunakadi yinenu.

⁵ Mo nkyekyu ntanaya kudiyi akangutuma, yi kakuna muntu yinenu amangwapangusa ene, Kuyeya kudi kupai ?

⁶ Kate bwalo bunapunwambila bintu bebi, buxitu bwamakwolubisa mucima ěnu.

⁷ Kaninga meme napunwambila sôsôlwo ene, Kudi loko ku bwalo bwenu, meme kuncuka ; akali meme kisoya, Musamunini kanalwa kunudi ; kaninga meme ndo nakuya, nakumutuma kunudi.

⁸ Panakala yei amalwa, unatongola loboko dia kwona, yi dia nkwami, yi dia lopelo ;

⁹ dia kwona, bwalo butasongwetabuxilabo ;

¹⁰ dia nkwami, bwalo bungwancuka kuya kudi Tetemi, yi kanusongumona kabidi ;

¹¹ dia lopelo, bwalo bwamabelebwa fumu a loboko lolu.

¹² Nkidi yi bintu bingi kunwambila, kate kanuoponyañana yi kwombwa nkyekyu.

¹³ Kaninga panakala yei apulwa, Mwoxixi a sôsôlwo, unanuxiya xiya mu sôsôlwo mwoso ; kanaditôyela bienci kanana, kate bwalo bwoso bunakwombwayi ndo bunatôyayi ; yi unanwebesa bwalo bwa bintu bilolwa.

¹⁴ Yei unangutumbisa, bwalo bunangatayi ku bintu biamene, yi unanwebesabio.

¹⁵ Bintu bioso biapwangata Tete bidi ndo biamene ; ndo binaputôya ene, yei unangata biamene, yi unanwambilabio.

¹⁶ Mo kakondo kabende yi nonu kanusongumona ; kakondo kabidi kabende yi nunangumona.

¹⁷ Banga beyi banci lolo bakatôyañana ene, Diyi kai dedi ditwambilayi ene, Kakondo kabende, yi kanusongumona ; kabidi lolo ene, Kakondo kabende yi nunangumona ; yi ene, Bwalo buntanaya kudi Tete ?

¹⁸ Biakatôyabo ene, Diyi kai diatôyayi dia kakondo kabende ? Katubiyi diatôyayi.

¹⁹ Yisu akabalubukwa bamananga kumwapangusa, yi akabambila ene, Nonu nutanakwapangusañana dinaputôya ene, Mo kakondo kabende, yi kanusongumona, yi kakondo kabende kabidi, yi nunangumona ?

²⁰ Sôsôlwo, sôsôlwo, nwambila ene, nunancula masonci yi nunadila nonu, mo loboko lunaxekyeleia ; yi nonu nunakwombwa buxitu ; kate buxitu bwenu bunakulumunibwa ku kiango.

²¹ Mwamukaxi, oka alela udi yi buxitu bwalo bwapulwa kikondo kienci ; kaninga papulelebwa kana, kasokwela kabidi kusama lukanyi bwalo bwa kiango kia muntu amalelebwa ku loboko.

²² Mbwôso nonu nkyekyu nudi yi buxitu ; mo nakunumona kabidi, yi mucima ěnu unaxekyelela, yi kiango kienu,— muntu kasokincula kunudi.

²³ Yi ku diba dedi kunakala kanunangwapangusa kintu kioso. Sôsôlwo, sôsôlwo, nwambila ene, Aka nunalomba kintu kioso kudi Tete, unanupakio ku dina diamene.

²⁴ Pôi nkyekyu kanwalomba kintu kioso ku dina diamene ; nulombi yi nunangata, bixekukanana kiango kienu.

²⁵ Namanwambila bintu bebi ku miele ; ola ulolwa untasonwambila kabidi ku miele, kate nakunusakolela dyendeli dia Tete.

²⁶ Ku dituku dedi nunalomba ku dina diamene ; yi meme kisonwambila ene, meme nakunwapanguxila kudi Tete,

²⁷ bwalo bwamanunanga Tete mikyenci, bwalo bunwamangunanga meme, yi nwamakwetabusa ene, meme nakabatuka kudi Tete.

²⁸ Nakabatuka kudi Tete, yi namalwa ku loboko ; ngwaxiya kabidi loboko yi ntanaya kudi Tete.

²⁹ Beyi banci bakamwambila ene, Mona, nkyekyu wamasakola loko, kusotôya mwele pô.

³⁰ Nkyekyu twalubukwa ene, Owe ubili bintu bioso, yi kusokwabila muntu mwoso akwapangusi. Nako twamakwetabusa ene, wakabatuka kudi Ncembi.

³¹ Yisu akabapingasa ene, Nwamakwetabusa nkyekyu ?

³² Mona, ola utanalwa,—apulwa nkyekyu,—ununacakana, muntu kwanci, muntu kwanci, yi nunanguxiya mikyemi mutupu ; kaninga kiena mutupu, bwalo budi Tete yinami.

³³ Namanwambila malo aa binuxeakala yi polo munda mwamene. Ku loboko nunakala yi mpeya ; mo nukolesi micima yenu ; meme namapidila loboko.