MAKISA 11 - Disambi Dipyadipya

¹ YI batumibwi yi bakunyi bakadi mu Yudiya bakakwombwa ene, mabila kabidi bamangata diyi dia Ncembi.

² Yi pakaximuna Pita ku Yelusaleme, bobo ba bena bwadi bakafwilañana yinanci

³ ene, Wakabwela kudi bantu badi bena mientonto, wakadya yinabo.

⁴ Mo Pita akabangola, akabalwandwadila ndwandwa ene,

⁵ Nakadi mu bula bwa Yopa, ndi mu kulombela, yi nakamona bea mu dilu dia tulu, kintu kitanapweka bea mbuxa munene, kiamapwexebwa mu diulu pa macu anai, kiakalwa isanga kundi ;

⁶ binakanamacisa lolo meso amene koku nakaxingulula, yi nakamona nyama ya loboko ya mikolo inai, yi nyama ya mutu, yi bintu bialambalala paxi, yi nyonyi ya kulu.

⁷ Yi nakakwombwa kabidi diyi didi mu kungutôyela, ene, Emana Pita, xipa, dyaka.

⁸ Yi meme ene, Kañana, Fumu ; bwalo butabweleli kintu kia kanana ndo kia mbindu mu musuku ămene pô.

⁹ Yi diyi diakakulumuna diamubidi munda mwa diulu ene, Bintu biamakusula Ncembi, owe kutambi ene, bia kanana.

¹⁰ Nako kwakakwencebwa menca asatu, yi bungi bwanci bwakapucibwa kabidi munda mwa diulu.

¹¹ Yi mona babalumi basatu bakadiko mangwoso ku ncibo kunakakala, bamatumibwa kundi ku Kyesalia.

¹² Yi Mwoxixi akangutôyela dia kuya yinabo kutena kuxitaxita. Yi bakunyi basambomo baba bakasangila yinami kabidi, yi twakabwela munda mwa ncibo a muntu you ;

¹³ yei lolo akatwambila mwakamonayi mwangele mu ncibo anci, akakwemana akamwambila ene, Tuma bantu ku Yopa, kuya angata Ximono, abikidibwa ene, Pita,

¹⁴ unakutôyela meyi anapandixibwa owe yinao, mikyebe yi bungi bwa ncibo ebe.

¹⁵ Yi panakabanga kutôya, Mwoxixi a babala akabaponena kulu, bea kulu kwecu kabidi ku bubangabanga.

¹⁶ Yi nakakwela diyi dia Fumu lukanyi, diakatôyayi ene, Yoano akanumeya yi mai, kaninga nonu nunanumeyebwa yi Mwoxixi a babala.

¹⁷ Ndo Ncembi lolo akabapa dilongi dedi diakatupelayi kabidi coco, bitwakakwetabuxila Fumu Yisu Kalistu, meme nakadi ñani uxelubukwa kuximba Ncembi ?

¹⁸ Pakakwombwa bo lolo bintu bebi, bakapudikila, yi bakatumbisa Ncembi, ene, Mbwôso Ncembi amapela mabila kabidi kudibela bwalo bwa môyo.

¹⁹ Mbwôso bobo bakacakanixibwa ku kufinibwa kwakalwa ku bwalo bwa Stefano bakadikanana pôi ku Finiki, yi ku Kupuloso, yi ku Antioko, badi mu kwambila diyi kudi bena Yuda batupu, kudi banga kumoni.

²⁰ Kaninga bamo bakadi yinabo, bena Kupuloso, yi bena Kulene, pakabwelabo mu Antioko, bakakwambila bena Ngiliki kabidi, badi mu kusakola losangu lwa Fumu Yisu.

²¹ Yi kianca kia Fumu kiakadi yinabo, yi bantu bangi bakakwetabusa bakakulumuka kudi Fumu.

²² Yi mwoximo ăbo ăkafika ku macu a kikokye kiakadi ku Yelusaleme, yi bakatuma Banabasa pôi ku Antioko ;

²³ you, pakafikayi, akamona lwoxixi lwa Ncembi, akaxekyelela ; yi akabatôyela bungi bwabo ene, banamati kudi Fumu yi lukanyi lwa mucima ;

²⁴ bwalo bwakakalayi muntu unengela amakwolubila yi Mwoxixi a babala yi kwetabusa, yi bantu bangi bakabodeyebwa kudi Fumu.

²⁵ Yei lolo akaya ku Taso kuya palala Saulu ;

²⁶ pakadi amamusañana, akamucwala ku Antioko. Nako ku mbula muncimancima kwakasangilabo mu kikokye, bakakweyesa bantu bangi ; yi ku Antioko buxi kwakabikidibwa beyi ene, bena Kalistu.

²⁷ Ku matuku yia kwakapweka badimuxi ku Yelusaleme kuya ku Antioko ;

²⁸ umoumwe akakwemana akadi yinabo, dina dienci ene, Angabusu, akakwebesa kudi Mwoxixi ene, ku bungi bwa loboko kuxeakala lukombo lwa ncala lwa bubi, lwakafika ku matuku a Kolôdyo.

²⁹ Yi beyi bakakwela lukanyi, muntu mwoso ku lwedi Iwanci, lwa kutuma bintu kudi bakunyi bakakala mu Yudiya, ndo kubasadila ;

³⁰ yi bakakwenca noku kabidi, yi bakabituma kudi babakulu ku bianca bia Banabasa yi Saulu.