LUKA 18 - Disambi Dipyadipya

¹ AKABATÔYELA mwele kabidi ndo kubebesa ene, baxelomba matuku moso yi kabaxepwangwa ;

² ene, Mu bula bunga mwakadi musambodi utacina Ncembi yi utanemeka bantu.

³ Yi mu bula bobu mwakadi mukasa a mufu, akalwa kudiyi ene, Sombolesa you atanda yinami, angusomboli.

⁴ Yi akanyañana kikondo ; mo kunyuma kwakaditôyelayi munda ene, Isanga kisocina Ncembi yi kisonemeka bantu,

⁵ kaninga bwalo bwamanguxulula mukasa a mufu you nakumusombolesayi, ximbi uxengupenyusa pa kulwa lwa lwa matuku moso.

⁶ Yi Fumu ene, Nwombwi mwatôya musambodi you utena yi nkwami.

⁷ Ki Ncembi lolo unasombolesa bantu basungudibwi banci, bamwabila yi ku munyinya yi ku butuku, isanga amakwekyela yi kiekyelo kia mwengo ku bwalo bwabo ?

⁸ Nwatôyela ene, unabasombolesa mangwoso. Kaninga palolwa Mwana a Muntu, yei unasañana kwetabusa pa loboko ?

⁹ Yi akatôyela banga kabidi mwele ou bakadietabuxila mikyeabo ene, Tudi yi nkwami ; yi bakatamuna banga bantu boso ;

¹⁰ ene, Bantu babidi bakabwela mu tempelo kuya lomba ; umoumwe akadi muFalixi, yi munga akadi musangi a milambu.

¹¹ MuFalixi akakwemana, akalomba nako yinanci mikyenci ene, Ncembi, nkwaxinga bwalo buntasoakala bea banga bantu, basanci, bena masalu, bena mendela, ndo isanga bea luna musangi you a milambu kumoni.

¹² Ngwancila bidya ncilu matuku abidi ku lumingu lwoso ; ngwalongola Ncembi kicini kimokimwe kia disangi dioso dia bima binamatetowa.

¹³ Mo musangi a milambu akakwemana kulekule, akadi kasonanga kusangola isanga meso anci lwa diulu, kate akadikuma ku kiedi kienci ene, Ncembi, ungwombwelipo mwengo, meme, mwoni.

¹⁴ Nwatôyela ene, You muntu akapinana ku ncibo anci, amasuwixibwa, kumoni yiwa. Bwalo bunapwexebwa muntu mwoso udiabandisa, yi you udiapwesa unabandixibwa.

¹⁵ Yi bakacwala kudiyi bana kabidi babende nci, bixebabakayi bianca bienci ; mo pakamona beyi banci nako bakabakama makamu.

¹⁶ Kaninga Yisu akababikila kudiyi ene, Nulekyeli bana babende balwi kundi, yi kanubakandi, bwalo budi bufumu bwa Ncembi bwa bena noku.

¹⁷ Nwatôyela sôsôlwo ene, Muntu mwoso utasoangata bufumu bwa Ncembi bea mwana mubende kanabwela momu pô.

¹⁸ Yi munga muntu munene akamwapangusa ene, Mweyexi unengela nakukisa beci ndo kukita môyo ă kô kô ?

¹⁹ Mo Yisu akamutôyela ene, Kukai ungwabikila meme ene, kunengela ? Kakuna muntu udi kunengela utena umoumwe, Ncembi.

²⁰ Walubukwa milangu ene, Kwendedi mukaxi abene, kuxipi, kwebi, kudimbididi muntu, nemeka tetebe yi mabebe.

²¹ Yi akatôya ene, Namanama nama bintu bebi bioso pôi bwabuki bwamene.

²² Yi pakakwombwa Yisu noku akamutôyela ene, Ukiasaka yi kintu kimokimwe ; odisa bintu bioso bidi yinebe, yi abanyisa bakombi, yi unakala yi bobidi mu diulu ; lwaka lolo, lwa ngulandudili.

²³ Yi pakakwombwayi nako akadi yi buxitu bungi, bwalo bwakadiyi yi madidi mangi.

²⁴ Mo pakamumona Yisu, akatôya ene, Kai kukola, bobo badi yi madidi kubwela mu bufumu bwa Ncembi !

²⁵ Xamo kubwela mu diso dia ndongo kudi kulebela, mo mwodidi kubwela mu bufumu bwa Ncembi kudi kukola.

²⁶ Yi bobo bakakwombwa bakatôya ene, Ape, nani unapandixibwa ?

²⁷ Mo yei ene, Bintu biamapidila bantu kwenca biamalubikibwa kudi Ncembi kwencebwa.

²⁸ Yi Pita akatôya ene, Mona, coco twamaxiya bintu biecu yi twamakulandudila.

²⁹ Yi akabatôyela ene, Nwatôyela sôsôlwo ene, Kakuna muntu amaxiya ndo ncibo, ndo mukasanci, ndo bakunyi banci, ndo tetenci yi mamanci, ndo bana banci, ku mucwe ă bufumu bwa Ncembi,

³⁰ utasodika kwangata binga bintu bungi bungi ku kikondo kieki, yi ku mwociya ou ulolwa, môyo ă kô kô.

³¹ Yi akakokyeya disangi yi babidi kudiyi, yi akabatôyela ene, Mona, tuyeya ku Yelusaleme, yi bintu bioso biamafundibwa kudi badimuxi bwalo bwa Mwana a Muntu binafikixibwa.

³² Bwalo bunalongolebwayi kudi mabila, yi unakyecebwa, yi unatangolebwa, yi unakwelebwa mati.

³³ Banamukuma bintu, yi banamuxipa ; yi ku dituku diamusatu kunabikayi kabidi.

³⁴ Yi bakadi kabasolubukwa bintu bebi pô ; yi diyi dedi diakabasokokyebwa, yi bakadi kabasolembetela malo akatôyebwa.

³⁵ Yi pakakokyelayi pepe yi Yeliko, mufofo akaxikama ku mwanca ă ncila, udi mu kulomba bintu.

³⁶ Yi pakakwombwayi kimbukuma kia bantu badi mu kudika, akakwapangusa pa bwalo bobu.

³⁷ Yi bakamwambila ene, Yisu a Nasalete udi mu kudika.

³⁸ Yi akakwamena ene, Yisu Mwana a Dafidi, ungwombwelipo mwengo.

³⁹ Yi bobo bakadi mu kwenda ku buxi bakamukama makamu akali polo ; kaninga yei akadika kwamena kungi, ene, Mwana a Dafidi, ungwombwelipo mwengo.

⁴⁰ Yi Yisu akakwemana, yi akabatôyela bamufikisi kudiyi. Yi pakadi amakokyela pepe, akamwapangusa.

⁴¹ ene, Kinani kiakyeba nkukixili ? Yei ene, Fumu, ngwangati meso amene.

⁴² Yi Yisu akamutôyela ene, Angata meso ebe ; kwetabusa kwebe kwamakupandisa.

⁴³ Yi akangata meso anci mangwoso, yi akamulandudila udi mu kutumbisa Ncembi. Yi bungi bwa bantu pakamonabo bakatumbisa Ncembi.