LOMA 8 - Disambi Dipyadipya

¹ MBWÔSO nkyekyu ku bwalo bwa bantu badi munda mwa Kalistu Yisu, lopelo nyô.

² Bwalo bwamangupaula mulangu, ă Mwoxixi a môyo mu Kalistu Yisu ku mulangu ă bubi yi ă lufu.

³ Bwalo bobu butabiyi bwadi kufikisa bwalo bwakadibu kulebela kumucwe ă munyu, Ncembi ndo amabufikisa pa kutuma Mwananci yi bufwani bwa munyu ă bubi, yi ku mucwe ă bubi.

⁴ Akabela bubi mu munyu, bixefikixibwa mulangu ă bwadi munda mwecu batasokwenda yi mulangu ă munyu kate ă Mwoxixi.

⁵ Bobo badi bena munyu belela malo a munyu lukanyi ; yi bobo badi bena Mwoxixi belela malo a Mwoxixi lukanyi.

⁶ Bwalo budi lukanyi lwa munyu lufu ; mo lukanyi lwa Mwoxixi ludi môyo yi polo.

⁷ Bwalo budi lukanyi Iwa munyu nkyetekyete ya kutanda yi Ncembi ; kalusokwedeya mulangu ă Ncembi, yi kalusolubukwa kwenca noku ;

⁸ yi bobo badi mu munyu kababiyi kuxekyelesa Ncembi.

⁹ Kaninga nonu kanuna mu munyu kate mu Mwoxixi, ndo pako Mwoxixi a Ncembi apwakala munda mwenu ; mo ndo muntu mwoso kiena yi Mwoxixi a Kalistu, yei kiena muntu anci.

¹⁰ Mo ndo Kalistu udi munda mwenu, mumbidi udi mufu ku bwalo bwa bubi, mo Mwoxixi udi môyo ku bwalo bwa nkwami.

¹¹ Yi ndo Mwoxixi a you akabisa Yisu kudi bafu apwakala munda mwenu, you akabisa Kalistu kudi bafu unapa mimbidi yenu ya kufwa môyo kabidi ku bwalo bwa Mwoxixi anci apwakala munda mwenu.

¹² Mbwôso bakunyi, katuna yi munyu bena mbata pô ndo kwenda yi môyo ă mwosambu ă munyu ;

¹³ bwalo ndo nwendenda yi môyo ă mwosambu ă munyu, nutanalanda kufwa. Mo ndo nwaxipa makisa a mumbidi kudi Mwoxixi, nunakala yi môyo.

¹⁴ Bwalo bantu boso baxiyibwa xiyibwa kudi Mwoxixi a Ncembi, kababa badi bana ba Ncembi.

¹⁵ Bwalp bunutangacili kidimu kia bupika kabidi kia kucina bowa, kate nwamangata kidimu kia bwana utwamena yinakio ene, Aba, Tete.

¹⁶ Mwoxixi mikyenci ndo atôbôla yi kidimu kiecu ntôbô ene, tudi bana ba Ncembi ;

¹⁷ yi ndo bana, bakiti ba mwokito kabidi, bakiti ba mwokito ă Ncembi, yi bakitañani yi Kalistu ndongo, ndo twamatata yinanci sôsôlwo, bituxebongexebwa yinanci ku dikai dienci kabidi ndongo.

¹⁸ Bwalo bungwabala ene, masama a kikondo kieki kia nkyekyu kasolelekyela yi kwelekyexebwa yi dikai dinakwebexebwa kunyuma ku bwalo bwecu.

¹⁹ Bwalo budi mudingidilu ă kipangu kincimancima kiakapangibwa ndo kudingila dingila kiebexelu kia bana ba Ncembi.

²⁰ Bwalo bwakapwexebwa kipangu kindmancima ku kimbombo kanana kumoni ku nyinga yakio mikyekio, mo ku mucwe ă you akakipwesa nako ;

²¹ mo mudingidiiu udiko ă kipangu kieki mikyekio kabidi kupaudibwa mu bupika bwa musaiu, ndo kubwela mu bwana bwa bula bwa dikai dia bana ba Ncembi.

²² Bwalo butwalubukwa ene, kipangu kieki kincimancima kidi mu kukabana yi kidi mu kwombwa loenu pôi nkyekyu.

²³ Yi kumoni noku kutupu, kate mikyecu kabidi badi yi somo ya Mwoxixi, isanga coco mikyecu twamakabana munda mwecu, tudi mu kukungila bwana bwa dyendeli, isanga kupikudibwa kwa mumbidi ěcu.

²⁴ Bwalo butwamapandixibwa yi mudingidilu ; mo mudingidilu ndo ămonebwa kauna mudingidilu ; ñani ukiadingidila kintu kiamonayi ku meso ?

²⁵ Mo ndo twamadingidila kintu kitutasomona, twamakikungila yi bwika.

²⁶ Mo nako Mwoxixi kabidi utwakolesa mu bubombu bwecu ; bwalo bututasolubukwa kulomba bea bituxelomba ; kate Mwoxixi mikyenci utwalombelela yi mikabanu yitabiyi kusakolebwa.

²⁷ Mo you axixima micima amalubukwa lukanyi lwa Mwoxixi bidilu, bwalo bwalombelelayi bena babala bea bialelekyela yi Ncembi.

²⁸ Mo twalubukwa ku bwalo bwa bantu bananga Ncembi ene, bintu bioso biamakwencañana ndo kubencela kunengela, isanga bantu baba bamabikidibwa bea biakadi lukanyi lwanci.

²⁹ Bwalo bwa bantu bakalubukwayi ku buxi, akalungika ku buxi kabidi ene, bafwanixibwi yi bufwani bwa Mwananci, bixeakalayi mwamukulu pakacikaci pa bakunyi bangi.

³⁰ Mo bobo bakalungikayi buxi, ka bobo ndo bakabikilayi kabidi ; yi bobo bakabikilayi, ka bobo ndo bakasuwisayi kabidi ; yi bobo bakasuwisayi, ka bobo ndo bakabongesayi kabidi yi dikai.

³¹ Mbwôso tunatôya beci ku bwalo bwa bintu bebi ? Ndo Ncembi udi ku bwalo bwecu, ñani atanda yinecu ?

³² You utaximba Mwananci mikyenci, kate akamulongola ku micwe yecu ya bungi bwecu, ki you unatupa bintu bioso yinanci kabidi kanana ?

³³ Ñani unasanya basungudibwi ba Ncembi bwalo bwoso ? Ncembi ndo you asuwisa ;

³⁴ ñani you abela lopelo ? Kalistu Yisu ndo yei akafwa, e, tuxetôya ene, akabixibwa, udi ku kianca kia Ncembi kia kidyo, utwalombelela kabidi.

³⁵ Ñani unatunamuna ku nyinga ya Kalistu ? Mpeya unakwenca nako ? ndo buxitu ? ndo lonci ? ndo ncala ? ndo butaka ? ndo mutete ? ndo mwele ?

³⁶ Bea biakafundibwa ene, Ku bwalo bwebe ndo kutwamaxipibwa dituku dincimancima ; twamabadibwa bea mikwakwa ya kixipilu.

³⁷ Kate ku bintu bioso bebi twamalekola kudika bumanya kudi you akatunanga.

³⁸ Bwalo bunamakwetabuxixibwa ene, lufu kalunalubukwa ndo môyo, ndo bangele, ndo bantu banene, ndo bebi bintu bidiko nkyekyu, ndo bintu bilolwa kunyuma, ndo bena ngulu,

³⁹ ndo bule bwoso pyô, ndo bule bwoso twakô, ndo kinga kipangu kioso,—kakuna kintu kimokimwe kinalubukwa kutunamuna ku nyinga ya Ncembi itani mu Kalistu Yisu Fumwecu.