LOMA 6 - Disambi Dipyadipya

¹ MBWÔSO tunatôya beci ? Twekyeli yi bubi bixelekola lwoxixi bungi bungi ?

² Ai, kumoni. Coco bamafwa ku bwalo bwa bubi tunakala yi môyo munda mwabu kabidi beci ?

³ Kanusolubukwa ene, bungi bwecu bamanumeyebwa kudi Kalistu Yisu bamanumeyebwa ku lufu lwanci ?

⁴ Mbwôso twamancikibwa yinanci pa kunumeyebwa ku lufu ; bea lolo biakabixibwa Kalistu kudi bafu ku mucwe ă dikai dia Tete, ndo bituxekwenda kabidi yi môyo mupyamupya.

⁵ Coco ndo twamalwa sambikanana yinanci ku kifwanisa kia lufu Iwanci, tunakala mo nako kabidi bwalo bwa kubika kwanci kudi bafu.

⁶ Twalubukwa ene, muntu ecu a kalikali akakopekyebwa yinanci ndongo, bixelengolebwa mumbidi ă bubi, bitutaxesadila bubi kabidi nyô.

⁷ Bwalo bwa you amafwa amasuwixibwa ku mucwe ă kimu kia bubi.

⁸ Ndo lolo twamafwa yi Kalistu, twamakwetabusa ene, tunakala kabidi yi môyo yinanci.

⁹ Twalubukwa ene, bwalo bwakabixibwa Kalistu kudi bafu, yei kasofwa kabidi ; lufu kaluna yi bumanya kulu kwanci kabidi nyô.

¹⁰ Bwalo bwakafwayi, akafwa bwalo bwa bubi dyendeli nya ; mo bwalo budiyi yi môyo, udi yi môyo ku bwalo bwa Ncembl.

¹¹ Mo nako nonu kabidi nudibali mikyenu bafu ku bwalo bwa bubi, yi bena môyo ku bwalo bwa Ncembi, munda mwa Kalistu Yisu.

¹² Mbwôso bubi kabwakadi yi bufumu mu mumbidi ěnu ă kufwa, nonu kubwedeya ku xindilu yabu kumoni.

¹³ Kanulongodi bicini bia mumbidi ěnu ku bubi, bea bipiko bia kwenca bwalo butena yi nkwami ; kate nudilongoli mikyenu kudi Ncembi bea bena môyo bamabixibwa kudi bafu, yi bicini bia mumbidi ěnu kudi Ncembi bea bipiko bia kwenca nkwami.

¹⁴ Bubi kabunakala yi bufumu kulu kwenu, bwalo bunutena muxi mwa bwadi kate muxi mwa lwoxixi.

¹⁵ Mbwôso kai ? Twoni, bwalo bututena muxi mwa bwadi kate muxi mwa lwoxixi ? Af, kumoni.

¹⁶ Kanusolubukwa ene, you unwamadilongola mikyenu kudiyi basadi kumwedeya, nudi basadi banci ba you unwedeya ; ndo ba bubi ku lufu, ndo ba diedya ku nkwami ?

¹⁷ Mo Ncembi axingibwi biloba ; buxi nwakadi basadi ba bubi, mo nwamakwedeya ku mucima butonga bwa kweyesa bunwakalongolebwa kudibu.

¹⁸ Binwakapaudibwa lolo ku bubi, nwakatulowa basadi ba nkwami.

¹⁹ Ndi mu kutôya yi mutôyelu ă bantu ku bwalo bwa munyu ěnu udi kulebela. Bea binwakalongola bicini bia mumbidi ěnu basadi ba mbindu yi ba Iwonu ndo kwona, mo nako nkyekyu nulongoli bicini bia mumbidi ěnu basadi ba nkwami ndo kwenca yi babala.

²⁰ Panwakadi basadi ba bubi, nwakakwenda kanana ku bwalo bwa nkwami.

²¹ Mbwôso nwakadi yi mamoma kai ku kikondo yikia ku bwalo bwa bintu binwamabifwila bundu nkyekyu ? Bwalo ku sula kwabio kudi lufu.

²² Mo nkyekyu binwamapaudibwa ku bubi yi binwamatulowa basadi ba Ncembi, nudi yi mamoma enu a kubalolebwa babala, yi ku sula môyo ă kô kô.

²³ Difuto dia bubi didi lufu, mo dilongi dia Ncembi didi môyo ă kô kô munda mwa Kalistu Yisu Fumwecu.