EBELEO 12 - Disambi Dipyadipya

¹ MBWÔSO coco kabidi, bwalo butwamadingibwa yi kimbukuma bunene noku kia bena ntôbô bea lubungi, twekyeyi buxitu bwoso yi bubi budi yi lungwoso lwa kutucimbila, yi tusamboli sambo yi bwika amaxembama ku mpala ecu ;

² tudi mu kudingila Yisu sosonyi, mubangodi yi musudeyi a kwetabusa. Yei, ku bwalo bwa kiango kiakatekyebwa ku mpala anci, akatata nkulusu yi bwika, akatamuna bundu bobu, yi amaxikama ku kidyo kia lukwasa lwa Ncembi.

³ Nwelekyesi pako you akakwekyela yi mpeto bungi noku yakapetolebwa kudi boni, binutaxepenyuka yi binutaxepwangwa mu micima yenu.

⁴ Nonu nukidi kanutandili pôi ku maxi pa kusungwañana yi bubi.

⁵ Yi nwamakwelwa kibondelu kinwabondabonda luna bana, ene, Mwanami, kutamuni kwekyelesa kwa Fumu, kupwangwi pa kukamibwa dikamu kudiyi ;

⁶ bwalo bwamakwekyelesa Fumu muntu you amanangayi, yi amakuma mwana mwoso amangatayi.

⁷ Nonu nwombombwa kusama bwalo bwa kwekyelexebwa ; Ncembi udi mu kwenca yinenu bea yi bana. Ape mwana kai udiko utasomukuma tetenci ?

⁸ Mo ndo nwakala kutena kwekyelexebwa, kwamatekyebwa bana boso babanyañani yinaku, nudi lolo bana ba sanga, kumoni bana.

⁹ Bunga bwalo kabidi ; twakadi yi batetecu ba munyu ěcu ba kutwekyelesa, yi twakabanemeka ; ki tuxedika kwedeya Tete a bidimu ndo kwakala yi môyo ?

¹⁰ Bwalo bwakatwombwesabo kusama matuku mabende bea biakadi loko ku meso abo, mo yei ku bwalo bwa kutetowa kwecu, bituxekwabanyañana ku babala anci.

¹¹ Kusama kwoso kutwamakwombwexebwa kakusomoneka kiango ku kikondo kieki, kate buxitu ; kaninga kunyuma kulolwa dimona dia polo ku bwalo bwa bantu bamakixixibwa kudiku, dimoma dia nkwami.

¹² Mbwôso nusangoli bianca bialembelela muxi, yi binu bialukuta ;

¹³ yi nuxembeyi ncila swi bwalo bwa makasa enu, ximbi muna kitumbi uxepengowexebwa ; mo bixencincidixibwayi.

¹⁴ Nulabeli polo yi bantu boso, yi mwosambu ou ă kubalolebwa utasolubukwa muntu kumona Fumu kutena udi yinau.

¹⁵ Nuxexeli ximbi muntu mwoso udiko amaxikila bwalo bwa lwoxixi lwa Ncembi ; ximbi dicina dioso dia bululu dixemena yi dixenutepesa, yi bangi baxepindixibwa kudidio ;

¹⁶ ximbi mudibi mwoso udiko, ndo muna mwotangu luna Esô, akakwodisa bwabukulu bwanci ku diso dia kidilu kimokimwe kia kudya,

¹⁷ Bwalo bunwalubukwa kabidi ene, kunyuma pakakyebayi kukita mwokito ă kulwangwasanibwa, akanyañanibwa, bwalo butasañanayi kidi kia kwela lwombixi isanga akapalala kulwangwasanibwa yi masonci.

¹⁸ Bwalo bunutaluli ku lupongo lubili kubakibwa bianca, lwakalumuxibwa mudilu, ndo ku kupindañana kwa diulu, ndo ku mwedima, ndo ku ngiembi,

¹⁹ ndo ku mukuma ă mpungi, ndo ku diyi dia miiangu kumoni. Bobo bakadiombwa dedi bakaxengula ene, dinga diyi kadibambidibwi kabidi nyô.

²⁰ Bwalo butalubukwabo kwombwa mulangu ăkalangibwa ene, Aka isanga nyama anabakama yi lupongo, unakwelebwa mabwe.

²¹ Yi kimonenu kiakadi bowa bungi noku biakatôya Mosese ene, Ndi yi bowa yi lokomba bongonco.

²² Kate nwamalwa ku lupongo lwa Siono ; yi ku bula bwa Ncembi a môyo, Yelusaleme a diulu ; yi ku bimbukuma bia bangele, kisangilu kiabo bungi bwabo ;

²³ yi ku kikokye kia bana ba buxi bamafundibwa mena abo mu diulu ; yi kudi Ncembi, musambodi a bantu boso ; yi kudi bidimu bia bena nkwami bamakukixibwa ;

²⁴ yi kudi Yisu, musambodi a disambi dipyadipya ; yi ku maxi akacakibwa amadika aa a Ebele yi kutôya kwa loko.

²⁵ Nudingili binutaxenyañana you atôya. Bwalo ndo bobo bakadi kabasopanduka, pakamunyañanabo akadimusa pa loboko, coco katunapanduka po, bamakulumuka kudi you amadimusa mu diulu.

²⁶ Ku kikondo kieki kwakanyingisa diyi dienci loboko ; mo nkyekyu amaxiya kilaka ene, Ku kinga kikondo nakunyingisa kumoni loboko lutupu, kate diuiu kabidi.

²⁷ Mo diyi dedi, ene, Ku kinga kikondo kimokimwe, diamakwebesa dia kuncudibwa kwa bintu bebi biamanyingixibwa, bilexi yi bintu biamapangibwa, bixesala bintu bebi bitasonyingixibwa.

²⁸ Mbwôso bwalo bututanangata bufumu butabiyi kunyingixibwa, coco twakali yi lwoxixi lutuxexingila Ncembi yinalu yi fionu, yi diedya yi bowa.

²⁹ Bwalo budi Ncembi ecu kabidi mudilu ă kupisafiana nya.